AKP ភ្នំពេញ ថ្ងៃទី០៧ ខែសីហា ឆ្នាំ២០២៥ -- ប្រទេសស៊ូដង់​បាន​បន្ត​ការ​សន្យា​របស់​ខ្លួន​ក្នុង​ការ​កម្ចាត់​កង​កម្លាំង​គាំទ្រ​រហ័ស (RSF) ដែល​ជា​កង​យោធា​នៅ​តំបន់ដាហ្វូរនៅភាគ​ខាងលិចរបស់​ប្រទេសនេះ។

ប្រធានក្រុមប្រឹក្សាអធិបតេយ្យភាពអន្តរកាលរបស់ស៊ូដង់ លោក អាប់ឌែល ហ្វាតតាហ៍ អាល់-បឺហាន់ (Abdel Fattah al-Burhan) បាននិយាយថា «យើងបន្តការប្តេជ្ញាចិត្តរបស់យើងចំពោះពួកទុក្ករបុគ្គលដើម្បីបន្តការប្រឈមមុខ និងកម្ចាត់កងជីវពលឧទ្ទាម RSF និងកងទាហានស៊ីឈ្នួលបរទេស រហូតដល់គ្រប់អ៊ីញនៃទីក្រុងដាហ្វូរត្រូវបានរំដោះ»។

ការកត់សម្គាល់របស់លោកខាងលើនេះ ត្រូវបានធ្វើឡើងក្នុងអំឡុងពេលនៃដំណើរទស្សនកិច្ចទៅកាន់ភូមិវ៉ាដ អាល់-នូរ៉ា ក្នុងរដ្ឋហ្គេហ្ស៊ីរ៉ា នៅភាគកណ្តាលនៃប្រទេសស៊ូដង់កាលពីថ្ងៃអង្គារ ជាកន្លែងដែលកងកម្លាំង RSF ត្រូវបានរាយការណ៍ថាបានធ្វើការសម្លាប់រង្គាលកាលពីក្នុងខែមិថុនា ឆ្នាំ២០២៤។ នេះបើយោងតាមទីភ្នាក់ងារសារព័ត៌មានរដ្ឋ SUNA ។

លោក បឺហាន់ បានសង្កត់ធ្ងន់ថា កងទ័ពស៊ូដង់នឹងមិនទម្លាក់អាវុធទេ«រហូតដល់ការបះបោរ និងការឈ្លានពានដ៏ឃោរឃៅនេះត្រូវបានកម្ចាត់ចោល»។

លោក បឺហាន់ បាននិយាយថា «ដំណើរទស្សនកិច្ចរបស់ខ្ញុំទៅកាន់ភូមិនេះ គឺបំពេញតាមការសន្យាពីមុនដែលខ្ញុំបានធ្វើចំពោះអ្នករបួសនៅក្នុងតំបន់និងជាកាតព្វកិច្ចដែលជំពាក់ដើម្បីលួងចិត្តគ្រួសារនៃទុក្ករបុគ្គល»។

នៅថ្ងៃទី០៧ ខែមិថុនា ឆ្នាំ២០២៤ ក្រសួងការបរទេសស៊ូដង់បានចោទប្រកាន់កងកម្លាំង RSF ថា បានធ្វើការសម្លាប់រង្គាលនៅក្នុងភូមិវ៉ាដ អាល់-នូរ៉ា ដោយបានសម្លាប់ជនស៊ីវិលចំនួន ១៨០នាក់។

ក្រុម​ប៉ារ៉ា​យោធានោះ​បាន​បដិសេធ​ម្តង​ហើយ​ម្តង​ទៀត​នូវ​ការ​ទទួល​ខុស​ត្រូវ​ចំពោះ​អំពើ​ឃោរឃៅ​បែប​នេះ​លើ​ជន​ស៊ីវិល។

កងទ័ពស៊ូដង់បានប្រកាសការគ្រប់គ្រងពេញលេញនៃរដ្ឋហ្គេហ្ស៊ីរ៉ានៅក្នុងខែមីនា បន្ទាប់ពីដណ្តើមវាបានពីកងកម្លាំង RSF បានជិតមួយឆ្នាំ។

ប្រទេសស៊ូដង់បានរងការបំផ្លិចបំផ្លាញដោយការប្រយុទ្ធគ្នារវាងកងទ័ពនិងកងកម្លាំង RSF ចាប់តាំងពីខែមេសា ឆ្នាំ២០២៣ មក ដោយបានសម្លាប់មនុស្សជាង ២០.០០០នាក់ និង ១៤លាននាក់ត្រូវបានជម្លៀសខ្លួន។ នេះបើយោងតាមអង្គការសហប្រជាជាតិ និងអាជ្ញាធរមូលដ្ឋាន។ ទោះជាយ៉ាងណាក៏ដោយ ការស្រាវជ្រាវពីបណ្តាសាកលវិទ្យាល័យរបស់អាម៉េរិក បានប៉ាន់ប្រមាណចំនួនអ្នកស្លាប់មានប្រហែល ១៣០.០០០នាក់៕

ដោយ៖ យា ចិន្ដាខន្ដី (ប្រភព៖ AA-AKP)