AKP ភ្នំពេញ ថ្ងៃទី០៧ ខែសីហា ឆ្នាំ២០២៥ -- ប្រធានាធិបតីសហរដ្ឋអាមេរិកលោក ដូណាល់ ត្រាំ (Donald Trump) នៅក្នុងសប្តាហ៍នេះនឹងធ្វើជាម្ចាស់ផ្ទះនៃកិច្ចចរចាសន្តិភាពនៅទីក្រុងវ៉ាស៊ីនតោន រវាងលោក អ៊ីលហាំ អាលីយ៉េវ (Ilham Aliyev) ប្រធានាធិបតីអាស៊ែរបៃហ្សង់ និងលោក នីកូល ប៉ាស៊ីនយ៉ាន់ (Nikol Pashinyan) នាយករដ្ឋមន្រ្តីអាមេនី។

កិច្ចពិភាក្សានេះត្រូវបានបញ្ជាក់កាលពីថ្ងៃពុធដោយលោកស្រី ណាហ្សេលី បាកដាសារីយ៉ាន់ (Nazeli Baghdasaryan) លេខាធិការសារព័ត៌មានរបស់លោក ប៉ាស៊ីនយ៉ាន់ នៅលើបណ្តាញសង្គមហ្វេសប៊ុកដោយបានកត់សម្គាល់ថា លោកនាយករដ្ឋមន្រ្តីអាមេនីនឹងទៅបំពេញទស្សនកិច្ចនៅសហរដ្ឋអាមេរិកនៅថ្ងៃព្រហស្បតិ៍ និងថ្ងៃសុក្រ ហើយនឹងមានការជួបពិភាក្សាទ្វេភាគីជាមួយប្រធានាធិបតីសហរដ្ឋអាមេរិកក្នុងពេលដែលស្នាក់នៅទីក្រុងវ៉ាស៊ីនតោននោះ។

លោកស្រី បាកដាសារីយ៉ាន់ បានសរសេរថា កិច្ចចរចាត្រីភាគីនឹងស្វែងរកការលើកកម្ពស់សន្តិភាព វិបុលភាព និងកិច្ចសហប្រតិបត្តិការសេដ្ឋកិច្ចក្នុងតំបន់។

សេចក្តីថ្លែងការណ៍​របស់​លោកស្រី​ខាងលើនេះ ធ្វើឡើង​បន្ទាប់​ពីមានការរាយការណ៍​របស់​កាសែតវ៉ាស៊ីនតោនប៉ុស្តិ៍ ដែលបាន​និយាយ​ថាលោក ត្រាំ នឹង​ធ្វើជា​ម្ចាស់ផ្ទះ​ទទួល​មេដឹកនាំ​ទាំងពីរ​នៅ​សេតវិមាន​នៅ​ថ្ងៃ​សុក្រស្អែកនេះ។

ការរាយការណ៍នោះក៏បានលើកឡើងអំពីលទ្ធភាពនៃកិច្ចព្រមព្រៀងសន្តិភាពមួយដែលត្រូវបានប្រកាសជាលទ្ធផលនៃកិច្ចចរចាត្រីភាគីនោះផងដែរ។

ភាគីអាស៊ែរបៃហ្សង់ មិន​បាន​បញ្ជាក់​ភ្លាមៗ​នូវ​សេចក្តី​ថ្លែងការណ៍​របស់​អាមេនី ឬ​ធ្វើ​អត្ថាធិប្បាយ​ទៅលើការរាយការណ៍​នោះ​ទេ។

លោក អាលីយ៉េវ និងលោក ប៉ាស៊ីនយ៉ាន់ បានជួបគ្នាលើកចុងក្រោយនៅទីក្រុងអាប៊ូដាប៊ី រដ្ឋធានីនៃប្រទេសអេមីរ៉ាត់អារ៉ាប់រួមកាលពីខែមុនក្នុងអំឡុងពេលដែលពួកគេបានពិភាក្សាគ្នាអំពីកិច្ចខិតខំប្រឹងប្រែងដើម្បីធ្វើឱ្យទំនាក់ទំនងរបស់ប្រទេសទាំងពីរមានលក្ខណៈធម្មតាវិញ ហើយបានព្រមព្រៀងបន្តកិច្ចចរចា និងវិធានការកសាងទំនុកចិត្ត។

នៅក្នុងខែដដែលនោះ លោក ដូណាល់ ត្រាំ បាននិយាយនៅក្នុងកិច្ចប្រជុំមួយជាមួយអគ្គលេខាធិការអង្គការណាតូ លោក ម៉ាក រុតតេ (Mark Rutte) នៅក្នុងការិយាល័យអូវ៉ល់ថា កិច្ចខិតខំប្រឹងប្រែងដើម្បីឈានដល់កិច្ចព្រមព្រៀងសន្តិភាពរវាងអាមេនី និងអាស៊ែរបៃហ្សង់ ហាក់ដូចជាកំពុងឆ្ពោះទៅរកការសន្និដ្ឋានមួយប្រកបដោយជោគជ័យ។

ទំនាក់ទំនងរវាងអតីតសាធារណរដ្ឋសូវៀតទាំងពីរមានភាពតានតឹងចាប់តាំងពីឆ្នាំ១៩៩១ មក នៅពេលដែលយោធាអាមេនីបានកាន់កាប់តំបន់ការ៉ាបាក ដែលជាទឹកដីដែលត្រូវបានទទួលស្គាល់ជាអន្តរជាតិថាជាផ្នែកមួយនៃប្រទេសអាស៊ែរបៃហ្សង់ និងតំបន់ជាប់ៗគ្នានោះចំនួនប្រាំពីរទីតាំង។

ទឹកដីភាគច្រើនត្រូវបានរំដោះដោយអាស៊ែរបៃហ្សង់ក្នុងអំឡុងពេលសង្រ្គាមរយៈពេល ៤៤ថ្ងៃនៅរដូវស្លឹកឈើជ្រុះឆ្នាំ២០២០ ដែលបានបញ្ចប់បន្ទាប់ពីមានកិច្ចព្រមព្រៀងសន្តិភាពដែលសម្របសម្រួលដោយរុស្ស៊ី ដោយបានបើកទ្វារដល់ការធ្វើឱ្យមានប្រក្រតីភាព និងកិច្ចចរចាព្រំដែន។

នៅខែកញ្ញា ឆ្នាំ២០២៣ អាស៊ែរបៃហ្សង់បានបង្កើតអធិបតេយ្យភាពពេញលេញនៅក្នុងទីក្រុងការ៉ាបាក បន្ទាប់ពីកងកម្លាំងបំបែកខ្លួននៅក្នុងតំបន់បានចុះចាញ់។

នៅក្នុងខែមីនា ឆ្នាំនេះ ប្រទេសទាំងពីរបានប្រកាសថា ពួកគេបានឈានដល់ការឯកភាពគ្នាលើមាត្រាទាំង១៧ នៃកិច្ចព្រមព្រៀងសន្តិភាព បើទោះបីជាកិច្ចព្រមព្រៀងនេះមិនទាន់ត្រូវបានចុះហត្ថលេខាក៏ដោយ៕

ដោយ៖ យា ចិន្ដាខន្ដី (ប្រភព៖ AA-AKP)