AKP ភ្នំពេញ ថ្ងៃទី០៧ ខែសីហា ឆ្នាំ២០២៥--លោក គង់ សុភាព គ្រូជំនួយក្រុមជម្រើសជាតិទូកកម្ពុជាបានគូសបញ្ជាក់ថា ក្រុមជម្រើសជាតិកីឡាទូកនាគកម្ពុជារំពឹងខ្ពស់ ក្នុងការឈានដល់វគ្គផ្តាច់ព្រ័ត្រ ឬអាចទទួលបានមេដាយ នៅក្នុងការប្រកួត World Game នៅខេត្ត Chengdu សាធារណរដ្ឋប្រជាមានិតចិន ពីថ្ងៃទី០៧-១១ ខែសីហា ឆ្នាំ២០២៥ ដោយមាន១២ប្រទេស ជាប់វគ្គជម្រុះកាលពីឆ្នាំ២០២៤ នៅប្រទេសហ្វីលីនពីន។

ការលើកឡើងរបស់លោកបានធ្វើឡើង មុនពេលចេញដំណើរនៅអាកាសយានដ្ឋានអន្តរជាតិភ្នំពេញទៅកាន់ប្រទេសចិន កាលពីថ្ងៃទី០៦ ខែសីហា ឆ្នាំ២០២៥។ លោក គង់ សុភាព លើកឡើងថា មុនឈានដល់ការប្រកួតពិភពលោកនេះ គឺក្រុមទូកកម្ពុជាបានឆ្លងកាត់ការប្រកួតក្នុងព្រឹត្តិការណ៍ជាច្រើនមកហើយ ទាំងអាស៊ីអាគ្នេយ៍ អាស៊ី និងពិភពលោក ដោយគិតចាប់តាំងពីឆ្នាំ២០២៣មក។ សម្រាប់ការប្រកួតពិភពលោកនៅចិននេះ ក្រុមទូករបស់កម្ពុជាបានឆ្លងកាត់វគ្គជម្រុះនៅហ្វីលីពីនរួមមកហើយ ដោយកាលនោះកម្ពុជាទទួលបានចំណាត់លេខរៀងទី៩ ក្នុងចំណោម១២ប្រទេស ដែលត្រូវបានឡើងមកប្រកួតក្នុងព្រឹត្តិការណ៍ World Games នៅប្រទេសចិន ឆ្នាំ២០២៥នេះ។

លោកអះអាងថា ការប្រកួតពិភពលោកនេះ ក្រុមជម្រើសជាតិទូកកម្ពុជា បានហ្វឹកហាត់ត្រៀមខ្លួនបានយ៉ាងល្អលើគ្រប់វិញ្ញាសា ប៉ុន្តែ២ប្រទេសដែលជាឧបសគ្គធំ គឺឥណ្ឌូណេស៊ី និងម្ចាស់ផ្ទះចិន។ ប្រតិភូ អត្តពលិកទូកនាគកម្ពុជាមាន១៥នាក់ ក្នុងនោះប្រធានប្រតិភូ១នាក់ គ្រូបង្វឹក២នាក់ កីឡាករ៦នាក់ និងកីឡាការិនី៦នាក់ ដឹកនាំដោយ លោក វ៉ា គ្រី ប្រតិភូ។

គួរបញ្ជាក់ថា ក្រុមជម្រើសជាតិទូកកម្ពុជានឹងត្រូវចូលរួមប្រកួតលើ៦វិញ្ញាសា រួមមាន៖ វិញ្ញាសា២០០ម៉ែត្រចំណុះ៨នាក់ ២០០ម៉ែត្រចំណុះ១២ចម្រុះបុរស-នារី វិញ្ញាសា៥០០ម៉ែត្រចំណុះ៨នាក់ វិញ្ញាសា៥០០ម៉ែត្រចំណុះ១២ចម្រុះបុរស-នារី វិញ្ញាសា ២០០០ម៉ែត្រចំណុះ៨នាក់ និងវិញ្ញាសា២០០០ម៉ែត្រចំណុះ១២នាក់ចម្រុះបុរស-នារី។ ព្រឹត្តិការណ៍ World Games ដែលប្រទេសចិនទទួលរៀបចំធ្វើម្ចាស់ផ្ទះ ឆ្នាំ២០២៥នេះ មាន ១១៧ប្រទេសចូលរួម ដោយប្រកួតលើ៤២ប្រភេទកីឡា ចាប់ពីថ្ងៃទី០៧-១៧ ខែសីហា ឆ្នាំ២០២៥ ខណៈប្រភេទកីឡាទូកមានប្រទេសចូលរួមចំនួន១២ប្រទេស៕

ដោយ ហេង ណាលីន