AKP ភ្នំពេញ ថ្ងៃទី០៦ ខែសីហា ឆ្នាំ២០២៥--
ឯកឧត្តម ជុំ សុន្ទរី រដ្ឋលេខាធិការ និងជាអ្នកនាំពាក្យក្រសួងការបរទេស និងសហប្រតិបត្តិការអន្តរជាតិ នៃព្រះរាជាណាចក្រកម្ពុជាបានធ្វើការបំភ្លឺជុំវិញបញ្ហាមួយចំនួនដែលត្រូវបានលើកឡើងក្នុងកិច្ចប្រជុំជាមួយអ្នកសារព័ត៌មានរបស់ក្រសួងការបរទេសថៃ កាលពីថ្ងៃទី០៥ ខែសីហា ឆ្នាំ២០២៥ ដែលជាការលើកឡើងដោយគ្មានការពិត។ ការលើកឡើងរបស់អ្នកនាំពាក្យក្រសួងការបរទេសកម្ពុជានេះ ក្នុងឱកាសនៃការធ្វើសេចក្តីសង្ខេបព័ត៌មានប្រចាំថ្ងៃស្តីពីលទ្ធផលនៃការអនុវត្តបទឈប់បាញ់រវាងកម្ពុជា-ថៃ នាសៀលថ្ងៃទី០៦ ខែសីហា ឆ្នាំ២០២៥នៅទីស្តីការគណៈរដ្ឋមន្ត្រី។
ឯកឧត្ដម ជុំ សន្ទរី បានលើកឡើងដែលមានខ្លឹមសារដូចខាងក្រោមនេះ ទី១. ក្រសួងការបរទេសថៃបានលើកឡើងពីការនាំកម្ពុជាមកកាន់កិច្ចចរចាវិញ ដែលការថ្លែងជាសាធារណៈរបស់ក្រសួងការបរទេសថៃយ៉ាងដូច្នេះ គឺគ្រាន់តែមានគោលដៅដើម្បីទទួលបាននូវការទុកចិត្តតែប៉ុណ្ណោះ។ ការថ្លែងបែបនេះគឺពុំមានមូលដ្ឋានអ្វីត្រឹមត្រូវឡើយ ហើយវាជាការមើលរំលងពីកិច្ចខិតខំប្រឹងប្រែងរបស់កម្ពុជាក្នុងការធ្វើឱ្យភាពតានតឹងថយចុះ និងការរក្សាសន្តិភាព។ កម្ពុជាសូមអះអាងជាថ្មីម្តងទៀតនៅក្នុងការតាំងចិត្តដ៏មុតមាំរបស់ខ្លួនក្នុងការដោះស្រាយរាល់បញ្ហាទាំងអស់ជាមួយភាគីថៃតាមរយៈមធ្យោបាយសន្តិវិធី ដោយកម្ពុជាត្រៀមជាស្រេចដើម្បីធ្វើការប្រកបដោយការស្ថាបនាតាមរយៈការសន្ទនាទ្វេភាគី និងការបំពេញបន្ថែមដោយការសម្របសម្រួលរបស់អាស៊ាន ដើម្បីសម្រេចឱ្យបាននូវដំណោះស្រាយដ៏ស្ថិតស្ថេរ និងដោយសន្តិភាពឈរលើមូលដ្ឋាននៃកិច្ចព្រមព្រៀងឈប់បាញ់ រួមនឹងច្បាប់អន្តរជាតិ។ ទី២. កម្ពុជាសូមធ្វើការបដិសេធយ៉ាងដាច់អហង្ការចំពោះការលើកឡើងរបស់ថៃអំពីការបង្ករឿងរបស់កម្ពុជា ហើយក៏សូមសម្តែងនូវការព្រួយបារម្ភយ៉ាងជ្រាលជ្រៅចំពោះការបន្តសកម្មភាពបង្ករឿងផ្នែកយោធារបស់ថៃនៅតាមបណ្តោយព្រំដែននៃប្រទេសទាំងពីរ ដែលសកម្មភាពនេះមិនត្រឹមតែជាការរំលោភបំពានទៅលើកិច្ចព្រមព្រៀងឈប់បាញ់ប៉ុណ្ណោះទេ ប៉ុន្តែធ្វើឱ្យប៉ះពាល់ដល់កិច្ចខិតខំប្រឹងប្រែងខាងទូតដែលកំពុងតែដំណើរការដើម្បីធ្វើឱ្យភាពតានតឹងមានការថយចុះ។ 

ឯកឧត្តម អ្នកនាំពាក្យក្រសួងការបរទេសបានគូសបញ្ជាក់ថា កម្ពុជាបានប្រកាន់យកនូវការអត់ធ្មត់ជាអតិបរមានៅចំពោះមុខនៃការបង្ករឿងរបស់ថៃ ហើយមានការតាំងចិត្តដ៏ពេញលេញចំពោះដំណោះស្រាយដោយសន្តិវិធី។ ទន្ទឹមនេះ កម្ពុជា សូមអំពាវនាវឱ្យភាគីថៃបញ្ឈប់ជាបន្ទាន់នូវរាល់សកម្មភាពយោធាជាឯកតោភាគីដែលអាចនឹងធ្វើឱ្យឆាបឆេះឡើងវិញនូវការប្រទុសរាយ និងការបាត់ស្ថិរភាពចំពោះសន្តិភាពដ៏ផុយស្រួយ។ កម្ពុជាទាមទារឱ្យភាគីថៃគោរពនូវការតាំងចិត្តរបស់ខ្លួនក្រោមកិច្ចព្រមព្រៀងឈប់បាញ់គ្នា និងការចូលរួមដោយស្ថាបនា ដោយសុទ្ធចិត្តក្នុងកិច្ចសន្ទនា រួមទាំងការគោរពចំពោះច្បាប់អន្តរជាតិ។ ទី៣. ការលើកឡើងរបស់ថៃអំពីការការពារខ្លួនដោយសមស្របសមាមាត្ររបស់ថៃ កម្ពុជាបដិសេធជាដាច់ខាតចំពោះការលើកឡើងរបស់ថៃដែលថាសកម្មភាពយោធារបស់ខ្លួនគឺមានភាពសមាមាត្រសមស្រប ហើយមានលក្ខណៈជាអ្នកការការពារខ្លួន ដែលការលើកឡើងរបស់ថៃបែបនេះគឺជាការបំភាន់ការពិត មិនឆ្លុះបញ្ចាំងបាននូវការពិតដែលបានកើតមានឡើង ដែលតាមការពិតខាងយោធាថៃគឺជាអ្នកចាប់ផ្តើមធ្វើឱ្យមានភាពតានតឹងជាមួយកម្ពុជា តាមរយៈការទន្ទ្រានជាបន្តបន្ទាប់ចូលមកក្នុងទឹកដីរបស់កម្ពុជា ដែលសកម្មភាពនេះគាំទ្រដោយការបាញ់ផ្លោង រួមនឹងប្រតិបត្តិការតាមផ្លូវការអាកាសថែមទៀតផង។ ទី៤. ការផ្សព្វផ្សាយព័ត៌មានមិនពិតគឺជាការលើកឡើងដោយគ្មានមូលដ្ឋានរបស់ភាគីថៃ ដែលបានចោទប្រកាន់កម្ពុជាថាជាអ្នកបានផ្សព្វផ្សាយព័ត៌មានមិនពិត ដែលការចោទប្រកាន់នេះមិនត្រឹមតែគ្មានមូលដ្ឋានច្បាស់លាស់ ហើយក៏ជាប៉ុនប៉ងដោយចេតនាក្នុងការបង្វែរការចាប់អារម្មណ៍ពីការពិតដែលបានកើតមានឡើង ដែលចង់ឱ្យសកម្មភាពបង្ករឿងរបស់ខ្លួនមានភាពត្រឹមត្រូវ។
ឯកឧត្ដមអ្នកនាំពាក្យក្រសួងការបរទេសកម្ពុជាបានគូសបញ្ជាក់បន្ថែមថា កម្ពុជាមិនដែលបានធ្វើសកម្មភាពក្នុងការបង្កើតព័ត៌មាន ឬក៏លក្ខណៈជាការអុជអាលញុះញង់ ហើយក៏សូមអំពាវនាវដល់ភាគីថៃឱ្យចៀសវាងនូវការយកបញ្ហានយោបាយទៅប្រើប្រាស់នៅក្នុងការងារព័ត៌មាន ខណៈដែលកម្ពុជាសូមអះអាងជាថ្មីម្តងទៀតនូវការគាំទ្ររបស់ខ្លួនក្នុងការជូនព័ត៌មានដោយចំហរដោយការទទួលខុសត្រូវ និងត្រូវបានផ្ទៀងផ្ទាត់ និងស្វាគមន៍ចំពោះការចូលរួមពីភាគីទី៣ រួមទាំងអាស៊ាន និងអ្នសង្កេតការណ៍អន្តរជាតិដើម្បីវាយតម្លៃពីការពិតដោយឥត    លម្អៀង៕

ដោយ៖ ចាន់ សុភឿន