AKP ភ្នំពេញ ថ្ងៃទី០៦ ខែសីហា ឆ្នាំ២០២៥ -- យោងតាមសេចក្តីថ្លែងការណ៍ដែលចេញដោយសភារដ្ឋអ៊ូហ្គង់ដា កាលពីថ្ងៃអង្គារ បានឱ្យដឹងថា ប្រធានាធិបតីអ៊ូហ្គង់ដា លោក យូវេរី មូសេវេនី (Yoweri Museveni) និងរដ្ឋមន្ត្រីការបរទេសអេហ្ស៊ីបដែលកំពុងបំពេញទស្សនកិច្ច លោក បាដឺ អាប់ដេឡាតទី (Badr Abdelatty) បានជួបពិភាក្សាគ្នាទាក់ទងនឹងការប្រើប្រាស់ទឹកទន្លេនីល (Nile) និងកិច្ចសហប្រតិបត្តិការក្នុងតំបន់យ៉ាងទូលំទូលាយ។

សេចក្តីថ្លែងការណ៍បាននិយាយថា មេដឹកនាំទាំងពីរបានពិភាក្សាអំពីការព្រួយបារម្ភជាអាទិភាពរបស់ប្រទេសអេហ្ស៊ីបចំពោះសន្តិសុខលើប្រព័ន្ធធារាសាស្រ្ដនៅក្នុងកិច្ចប្រជុំដែលបានធ្វើឡើងកាលពីថ្ងៃចន្ទនៅឯវិមានរដ្ឋ Entebbe មានចម្ងាយប្រហែល ៤០គីឡូម៉ែត្រភាគខាងត្បូងនៃរដ្ឋធានីកាមប៉ាឡា នៃប្រទេសអ៊ូហ្គង់ដា។

លោក​ មូសេវេនី បាននិយាយក្នុងការបង្ហោះនៅលើគណនីអ៊ិចផ្លូវការរបស់លោកថា             «យើងបានពិភាក្សាអំពីបញ្ហាមួយចំនួនទាក់ទងនឹងទឹកទន្លេនីល និងប្រទេសដែលមានភាគហ៊ុនល្អបំផុតអាចធ្វើការរួមគ្នាដើម្បីការពារ និងប្រើប្រាស់វាឱ្យកាន់តែប្រសើរឡើង» ។

លោក​បានអំពាវនាវឱ្យប្រទេសនានានៅអាងទន្លេនីលចូលរួមក្នុងកិច្ចសន្ទនាកម្រិតកំពូលអំពីរបៀបប្រើប្រាស់ទឹកទន្លេប្រកបដោយនិរន្តរភាពដែលមិនបង្កគ្រោះថ្នាក់ដល់អនាគតរបស់ទន្លេនេះ។

លោក អាប់ដេឡាតទី បានលើកឡើងពីសក្តានុពលសម្រាប់គម្រោងរួមគ្នាត្រូវបានគាំទ្រដោយយន្តការហិរញ្ញប្បទានដែលបង្កើតឡើងដោយប្រទេសអេហ្ស៊ីបនាពេលថ្មីៗនេះ ដើម្បីលើកកម្ពស់ការអភិវឌ្ឍនៅក្នុងបណ្តាប្រទេសភាគខាងត្បូងនៃអាងទន្លេនីល។ លោកក៏បានកោតសរសើរដល់ប្រទេសអ៊ូហ្គង់ដាសម្រាប់ការរួមចំណែករបស់ខ្លួនក្នុងបេសកកម្មរក្សាសន្តិភាពនៅក្នុងប្រទេសសូម៉ាលី និងប្រទេសអាហ្វ្រិកដទៃទៀត។

កិច្ចប្រជុំបានស្វែងយល់បន្ថែមអំពីកាលានុវត្តភាពក្នុងការពង្រឹងកិច្ចសហប្រតិបត្តិការសេដ្ឋកិច្ចរវាងប្រទេសទាំងពីរលើវិស័យផ្សេងៗ រួមទាំងថាមពល សន្តិសុខ និងឌីជីថលនីយកម្ម៕

ដោយ៖ មូល មិនា (ប្រភព៖ ស៊ីនហួ)