AKP ភ្នំពេញ ថ្ងៃទី០៦ ខែសីហា ឆ្នាំ២០២៥ -- ប្រធានាធិបតីសហរដ្ឋអាមេរិក លោក ដូណាល់ ត្រាំ (Donald Trump) បាននិយាយនៅក្នុងបទសម្ភាសន៍មួយជាមួយទូរទស្សន៍ CNBC ថា សហរដ្ឋអាមេរិកនឹងដំឡើងពន្ធសម្រាប់ប្រទេសឥណ្ឌានៅថ្ងៃខាងមុខនេះ ដោយសារតែឥណ្ឌានៅតែបន្តការទិញប្រេងពីប្រទេសរុស្ស៊ី។

លោក ត្រាំ បាននិយាយថា «យើងបានដាក់ពន្ធ ២៥% ប៉ុន្តែខ្ញុំគិតថាខ្ញុំនឹងបង្កើនវាឱ្យបានច្រើនក្នុងរយៈពេល ២៤ម៉ោងខាងមុខ ពីព្រោះពួកគេកំពុងទិញប្រេងពីរុស្ស៊ី»។ លោក​បាននិយាយ​បន្ថែម​ថា ប្រសិនបើ​ឥណ្ឌា​បន្ត​ទិញ​ធនធាន​ថាមពល​របស់​រុស្ស៊ី «ខ្ញុំ​នឹង​មិន​សប្បាយ​ចិត្ត​ទេ»។

មេដឹកនាំសហរដ្ឋអាមេរិករូបនេះបាននិយាយថា «ឥណ្ឌាមិនមែនជាដៃគូពាណិជ្ជកម្មដ៏ល្អទេ» ហើយដោយសារតែដូច្នេះហើយ ទើបមានការដាក់ចេញនូវពន្ធគយខ្ពស់៕

ដោយ៖ យា ចិន្ដាខន្ដី (ប្រភព៖ តាសស៍)