AKP ភ្នំពេញ ថ្ងៃទី០៥ ខែសីហា ឆ្នាំ២០២៥ -- រដ្ឋមន្ត្រីក្រសួងបង្រួបបង្រួមរបស់កូរ៉េខាងត្បូង លោក ជុង ដុងយ៉ាំង (Chung Dong-young) បាននិយាយកាលពីថ្ងៃចន្ទថា រដ្ឋាភិបាលកូរ៉េខាងត្បូងគ្រោងនឹងបន្តប្រើប្រាស់មូលនិធិសហប្រតិបត្តិការអន្តរកូរ៉េសម្រាប់គម្រោងមនុស្សធម៌នៅក្នុងប្រទេសកូរ៉េខាងជើងឡើងវិញ នៅពេលដែលទំនាក់ទំនងទ្វេភាគីត្រូវបានស្តារឡើងវិញ។

លោក ជុង បាននិយាយក្នុងអំឡុងពេលនៃកិច្ចប្រជុំជាមួយក្រុមប្រឹក្សាអង្គការមិនមែនរដ្ឋាភិបាលសម្រាប់កិច្ចសហប្រតិបត្តិការអន្តរកូរ៉េថា «វាគួរឱ្យភ្ញាក់ផ្អើលណាស់ដែលមិនមានមូលនិធិសហប្រតិបត្តិការអន្តរកូរ៉េណាមួយត្រូវបានប្រតិបត្តិកាលពីឆ្នាំមុន»។

មូលនិធិនេះត្រូវបានបង្កើតឡើងក្នុងឆ្នាំ១៩៩១ ដែលគាំទ្រដល់កិច្ចសហប្រតិបត្តិការសេដ្ឋកិច្ច ក៏ដូចជាការផ្លាស់ប្តូរសង្គម និងវប្បធម៌រវាងប្រទេសកូរ៉េទាំងពីរ។

ថវិការបស់មូលនិធិនេះបានកើនឡើងដល់ ៤៣៩,៧ពាន់លានវ៉ុន (៣១៧,៤លានដុល្លារអាម៉េរិក) នៅក្នុងឆ្នាំ២០០៧ ប៉ុន្តែចាប់តាំងពីពេលនោះមកបានធ្លាក់ចុះយ៉ាងខ្លាំង ចំពេលដែលមានការបន្តបង្កហេតុដោយអាវុធនុយក្លេអ៊ែរ និងគ្រាប់មីស៊ីលរបស់កូរ៉េខាងជើង។ ការប្រើប្រាស់មូលនិធិចុងក្រោយបំផុត គឺនៅក្នុងឆ្នាំ២០២៣ នៅពេលដែលថវិការបស់មូលនិធិចំនួន ៩០០លានវ៉ុនត្រូវបានបម្រុងទុកសម្រាប់កម្មវិធីអាហារូបត្ថម្ភរបស់កុមារ។

ថ្មីៗនេះ លោក ជុង បានអនុម័តទៅលើការកែប្រែចំពោះគោលការណ៍ណែនាំរបស់ក្រសួងដែលគ្រប់គ្រងការប្រកាសទំនាក់ទំនងជាមួយប្រជាជនកូរ៉េខាងជើង។ នៅក្រោមច្បាប់ថ្មី ជនជាតិកូរ៉េខាងត្បូងអាចចូលរួមដោយសេរីជាមួយជនជាតិកូរ៉េខាងជើង ដរាបណាពួកគេរាយការណ៍អំពីទំនាក់ទំនងនោះជាមុន។

លោក ជុង បាននិយាយថា «វាគ្រាន់តែជាការរាយការណ៍ប៉ុណ្ណោះ ហើយពួកគេអាចជួបគ្នាដោយសេរី»។

ជាការឆ្លើយតប លោក ឆយ ឆាងណាម (Choi Chang-nam) អនុប្រធានក្រុមប្រឹក្សា NGO បាននិយាយថា ការបន្ធូរបន្ថយការរឹតបន្តឹង គឺជាភាពធូរស្រាលសម្រាប់សកម្មជន។

យោងតាមក្រសួងនេះ បានឱ្យដឹងថា មិនមានគម្រោងជំនួយមនុស្សធម៌ដែលដឹកនាំដោយរដ្ឋាភិបាល ឬជនស៊ីវិល ដែលត្រូវបានអនុវត្តសម្រាប់ប្រទេសកូរ៉េខាងជើងនៅក្នុងឆ្នាំ២០២៤ ទេ៕

ដោយ៖ យា ចិន្ដាខន្ដី (ប្រភព៖ កូរ៉េថាមស៍)