AKP ភ្នំពេញ ថ្ងៃទី០៥ ខែសីហា ឆ្នាំ២០២៥ -- កិច្ចសហប្រតិបត្តិការសេដ្ឋកិច្ចអាស៊ីប៉ាស៊ីហ្វិក (APEC) បានបើកកិច្ចប្រជុំថ្នាក់រដ្ឋមន្ត្រីឌីជីថល និងបញ្ញាសិប្បនិម្មិត (AI) លើកដំបូងដែលមិនធ្លាប់មានរបស់ខ្លួនកាលពីថ្ងៃចន្ទ ដោយបានប្រមូលផ្តុំមន្ត្រីជាន់ខ្ពស់ក្នុងវិស័យបច្ចេកវិទ្យា និងឌីជីថល ដើម្បីបង្ហាញពីសករាជថ្មីនៃកិច្ចសហប្រតិបត្តិការក្នុងតំបន់ក្នុងវិស័យបច្ចេកវិទ្យាទំនើប។

ខណៈដែលសេដ្ឋកិច្ចប្រទេសជាម្ចាស់ផ្ទះនៃកិច្ចប្រជុំកំពូលឆ្នាំនេះដែលគ្រោងនឹងធ្វើនៅចុងខែតុលាខាងមុខនេះ នៅទីក្រុងជីយឹងជូ ខេត្តជីយឹងសាងខាងជើង របស់ប្រទេសកូរ៉េខាងត្បូងនោះ រដ្ឋមន្ត្រីក្រសួងវិទ្យាសាស្ត្រ និងព័ត៌មានវិទ្យារបស់កូរ៉េខាងត្បូង លោក បេ គ្យុងហ៊ូន (Bae Kyung-hoon) បានបើកកិច្ចប្រជុំដោយលើកឡើងអំពីសារៈសំខាន់នៃការប្រើប្រាស់បច្ចេកវិទ្យាថ្មីៗ។

លោក បេ បាននិយាយនៅក្នុងសុន្ទរកថាបើករបស់លោកក្នុងអំឡុងពេលព្រឹត្តិការណ៍ដែលធ្វើឡើងនៅសាលសន្និសីទសុងដូ ថា «ឥឡូវនេះ យើងកំពុងឈរនៅជួរមុខនៃរលកនៃការផ្លាស់ប្តូរដ៏ធំសម្បើមដែលជំរុញដោយ AI និងបច្ចេកវិទ្យាឌីជីថល។ របៀបដែលយើងឆ្លើយតបទៅនឹងរលកខាងមុខដ៏ធំនេះ នឹងកំណត់អនាគតសម្រាប់យើងទាំងអស់គ្នា»។

លោកបាននិយាយថា «ជាពិសេស បច្ចេកវិទ្យាឌីជីថលកម្រិតខ្ពស់ និង AI ដែលនឹងផ្តល់ឱកាសថ្មីដើម្បីដោះស្រាយបញ្ហាប្រឈមដែលយើងជួបប្រទះ»។

ដោយបង្ហាញអំពីសុទិដ្ឋិនិយមចំពោះកិច្ចប្រជុំនេះ លោករដ្ឋមន្ត្រីបានកត់សម្គាល់ថា វាបង្ហាញពីឱកាសដ៏មានតម្លៃសម្រាប់ប្រទេសជាសមាជិកក្នុងការបង្កើតផ្លូវថ្មីជាមួយគ្នា។

លោករដ្ឋមន្រ្តីបាននិយាយថា «នៅក្នុងកិច្ចប្រជុំថ្នាក់រដ្ឋមន្ត្រីនេះ យើងនឹងស្វែងយល់ពីកិច្ចខិតខំប្រឹងប្រែងគោលនយោបាយ និងទិសដៅនៃកិច្ចសហប្រតិបត្តិការអន្តរជាតិ ដែលប្រទេសជាសមាជិកនីមួយៗកំពុងស្វែងរកដើម្បីឆ្លើយតបទៅនឹងឱកាសថ្មីៗទាំងនោះ។ លើសពីនេះទៀត យើងនឹងផ្តោតសំខាន់ទៅលើការពង្រីកការតភ្ជាប់ឌីជីថលជាសកល និងប្រកបដោយអត្ថន័យ ទន្ទឹមនឹងការពិភាក្សាអំពីវិធីបង្កើតប្រព័ន្ធអេកូឌីជីថល និង AI ដែលមានស្ថេរភាព»៕

ដោយ៖ យា ចិន្ដាខន្ដី (ប្រភព៖ កូរ៉េថាមស៍)