AKP ភ្នំពេញ ថ្ងៃទី០៤ ខែសីហា ឆ្នាំ២០២៥ -- តួសម្តែងល្ខោនអាយ៉ងមកពីមហោស្រពអាយ៉ងសូហ្វីយ៉ា និងមហោស្រពអាយ៉ង PUK របស់ប្រទេសជប៉ុន នឹងសម្តែងជាពីរភាសា នៃរឿងសត្វរំពេសមុទ្រមួយក្បាល និងហ្វូងសត្វឆ្មាបាកំហូច នៅទីក្រុងលីហ្ស៊ូកានៃខេត្តហ្វូគូអូកា កាលពីថ្ងៃសៅរ៍ សប្តាហ៍មុន។

ការសម្តែងនេះប្រព្រឹត្តទៅនៅមជ្ឈមណ្ឌលវប្បធម៌ទូទៅ Cosmos របស់ទីក្រុងលីហ្ស៊ូកា ដែលនេះជាការសម្តែងលើកទីបួននៅក្នុងខេត្តហ្វូគូអូកា បន្ទាប់ពីការសម្តែងលើកទីមួយនៅទីក្រុងជីគូស៊ីណូ កាលពីថ្ងៃទី៣១ ខែកក្កដា និងការសម្តែងលើកទីពីរ និងទីបី នៅទីក្រុងហ្វូគូអូកា កាលពីថ្ងៃទី០១ ខែសីហា។ ក្រុមល្ខោនទាំងពីរបានសម្តែងជូនទស្សនិកជនជប៉ុនទស្សនា ដែលជាផ្នែកមួយនៃដំណើរកម្សាន្តរួមគ្នារយៈពេល ៣ខែនៅទូទាំងប្រទេសជប៉ុន។

ការបង្ហាញខ្លួននៅលើឆាកនៅក្នុងខេត្តហ្វូគូអូកា គឺជាផ្នែកមួយនៃដំណើរទេសចរណ៍រួមគ្នានៃមហោស្រពអាយ៉ងរបស់ប៊ុលហ្គារី និងជប៉ុន។ ដំណើរកម្សាន្តនេះមានកម្មវិធីចំនួន៣៣ នៅក្នុងទីក្រុងចំនួន១៣ នៅទូទាំងប្រទេសជប៉ុន ដោយនាំយកនូវរឿងរ៉ាវដ៏កក់ក្តៅរបស់ ល្វីស សេភូលវេដា (Louis Sepulveda) ទៅកាន់ទស្សនិកជនចម្រុះទាំងភាសាប៊ុលហ្គារី និងជប៉ុន។

ការសម្តែងនីមួយៗត្រូវបានបង្ហាញជាទម្រង់ពីរភាសា ដោយបង្ហាញពីកិច្ចសហការរវាងមហោស្រពអាយ៉ងមកពីទីក្រុងសូហ្វីយ៉ា និងមហោស្រពអាយ៉ង PUK របស់ទីក្រុងតូក្យូនៅលើឆាក។

ដំណើរកម្សាន្តបានចាប់ផ្តើមជាមួយនឹងការសម្តែងលើកដំបូងនៅទីក្រុងតូក្យូកាលពីថ្ងៃអង្គារ ទី២៥ ខែមិថុនា ឆ្នាំ២០២៥ ដោយមានការចូលរួមពីឯកអគ្គរដ្ឋទូតប៊ុលហ្គារីប្រចាំប្រទេសជប៉ុន លោកស្រី ម៉ារីតា អារ៉ាបាដហ្ស៊ីវ៉ា (Marieta Arabadzhieva) បុគ្គលិកស្ថានទូត និងកូនៗរបស់ពួកគេ ព្រមទាំងសមាជិកនៃសហគមន៍ប៊ុលហ្គារីក្នុងរដ្ឋធានីរបស់ប្រទេសជប៉ុន។

ការសម្តែងនេះ គឺជាគំនិតផ្តួចផ្តើមផ្លាស់ប្តូរវប្បធម៌រវាងប៊ុលហ្គារី និងជប៉ុន។ វាត្រូវបានធ្វើឱ្យទស្សនិកជនរីករាយជាមួយនឹងល្ខោនអាយ៉ងបែបស្រមើលស្រមៃ និងការនិទានរឿង ដែលបង្ហាញពីភាពជាដៃគូដ៏ជោគជ័យរវាងមហាស្រពកុនទាំងពីរ៕

ដោយ៖ យា ចិន្ដាខន្ដី (ប្រភព៖ BTA)