AKP ភ្នំពេញ ថ្ងៃទី០១ ខែសីហា ឆ្នាំ២០២៥ -- អ្នកការទូតកំពូលរបស់ទីក្រុងសេអ៊ូលបាននិយាយកាលពីថ្ងៃព្រហស្បតិ៍ថា ប្រទេសកូរ៉េខាងត្បូង និងសហរដ្ឋអាមេរិកបានចាប់ផ្តើមកិច្ចពិភាក្សាដើម្បីកំណត់កាលបរិច្ឆេទសម្រាប់កិច្ចប្រជុំកំពូលរវាងប្រធានាធិបតីកូរ៉េខាងត្បូង លោក លី ជេយ៉ុង (Lee Jae Myung) និងប្រធានាធិបតីសហរដ្ឋអាមេរិក លោក ដូណាល់ ត្រាំ (Donald Trump) ។

រដ្ឋមន្ត្រីការបរទេស លោក ចូ យ៉ុន (Cho Hyun) បានធ្វើការកត់សម្គាល់នៅក្នុងជំនួបជាមួយអ្នកសារព័ត៌មានកូរ៉េខាងត្បូងនៅទីក្រុងវ៉ាស៊ីនតោន បន្ទាប់ពីលោក និងរដ្ឋលេខាធិការក្រសួងការបរទេស លោក ម៉ារកូ រូប៊ីអូ (Marco Rubio) បានធ្វើកិច្ចចរចាលើកដំបូងរបស់ពួកគេចាប់តាំងពីការចាប់ផ្តើមនៃរដ្ឋបាលលោក លី កាលពីខែមិថុនា។

លោក ចូ បាននិយាយថា «ភាគីទាំងពីរកំពុងសម្របសម្រួលដើម្បីកំណត់កាលបរិច្ឆេទ សម្រាប់កិច្ចប្រជុំកំពូល»។ លោកបានបន្ថែមថា «យើងក៏បានយល់ព្រមក្នុងការរៀបចំខ្លឹមសារនៅក្នុងកម្រិតការងារ» ដោយលោកបានសំដៅទៅលើការរៀបចំរួមគ្នាសម្រាប់របៀបវារៈនៃកិច្ចប្រជុំកំពូល។

ទាក់ទងនឹងការរៀបចំកិច្ចប្រជុំកំពូលនេះ មន្ត្រីជាន់ខ្ពស់ទីក្រុងសេអ៊ូលបាននិយាយថា វានឹងត្រូវការពេលវេលាបន្តិចទៀតដើម្បីបញ្ចប់កាលបរិច្ឆេទ ហើយលោកបានបន្ដថា វាពិបាកក្នុងការនិយាយឱ្យច្បាស់លាស់ថាតើកិច្ចប្រជុំកំពូលនឹងប្រព្រឹត្តទៅក្នុងរយៈពេលពីរសប្តាហ៍ដូចដែលលោក ត្រាំ បាននិយាយដែរឬទេ។

ប្រសិនបើកិច្ចប្រជុំកំពូលនេះត្រូវបានប្រារព្ធឡើង លោក លី និងលោក ត្រាំ ត្រូវបានគេរំពឹងថានឹងពិភាក្សាគ្នាអំពីបញ្ហាសម្ព័ន្ធភាពជាច្រើន ចាប់ពីការការពារប្រឆាំងនឹងការគំរាមកំហែងនុយក្លេអ៊ែរ និងមីស៊ីលរបស់ប្រទេសកូរ៉េខាងជើង រហូតដល់កិច្ចខិតខំប្រឹងប្រែងរួមគ្នាដើម្បីបង្កើនសន្តិសុខសេដ្ឋកិច្ចសម្រាប់ប្រទេសទាំងពីរ៕

ដោយ៖ មូល មិនា (ប្រភព៖ យ៉ុនហាប់)