AKP ភ្នំពេញ ថ្ងៃទី០១ ខែសីហា ឆ្នាំ២០២៥ -- តុលាការធម្មនុញ្ញរបស់ប្រទេសថៃ បានផ្តល់ការពន្យារពេលសម្រាប់នាយករដ្ឋមន្ត្រីព្យូរតួនាទី លោកស្រី ផែថុងថាន ស៊ីណាវ៉ាត់ (Paetongtarn Shinawatra) រហូតដល់ថ្ងៃទី០៤ ខែសីហា ឆ្នាំ២០២៥ ដើម្បីដាក់ពាក្យការពារក្តីរបស់លោកស្រីក្នុងសំណុំរឿងក្រមសីលធម៌ខ្ពស់ ដែលបានធ្វើឱ្យលោកស្រីត្រូវបានព្យួរពីតួនាទីជានាយករដ្ឋមន្រ្តីជុំវិញការដោះស្រាយជម្លោះព្រំដែន។

តុលាការបាននិយាយនៅក្នុងសេចក្តីថ្លែងការណ៍មួយកាលពីថ្ងៃទី៣០ ខែកក្កដា ឆ្នាំ២០២៥ ថា ការពន្យាពេលនេះគឺជាលើកចុងក្រោយ ហើយតុលាការនឹងបន្តសំណុំរឿងនេះដោយមិនគិតថាតើវាទទួលបានការការពារក្តីរបស់លោកស្រីឬក៏អត់នោះទេ។ កន្លង​មក តុលាការ​បាន​ផ្តល់​ការ​ពន្យារ​ពេលរយៈពេល​ពីរ​សប្តាហ៍​ដល់លោកស្រី ផែថុងថាន រហូត​ដល់​ថ្ងៃ​ទី៣១ ខែ​កក្កដា ឆ្នាំ២០២៥ ដើម្បីដាក់ពាក្យ​ការពារ​ក្តី។

តុលាការ​បាន​ផ្អាកតួនាទី​លោកស្រី ផែថុងថាន ​ជា​នាយករដ្ឋមន្ត្រី​កាលពី​ថ្ងៃទី០​១ ខែកក្កដា ឆ្នាំ២០២៥ បន្ទាប់ពី​ទទួលបាន​ពាក្យបណ្តឹង​ពី​សមាជិក​ព្រឹទ្ធសភា​មួយក្រុមដែលបាន​ចោទប្រកាន់​លោកស្រី​ពីបទ​បំពាន​ក្រមសីលធម៌ បន្ទាប់ពី​មានការ​បែកធ្លាយការសន្ទនាតាមទូរសព្ទ​ជាមួយ​អតីត​នាយករដ្ឋមន្ត្រី​កម្ពុជា សម្តេចតេជោ ហ៊ុន សែន អំពី​ការប្រឈមមុខ​ដាក់គ្នា​តាម​ព្រំដែនរវាង​ប្រទេស​ទាំងពីរ​។

លោកស្រី ផែថុងថាន បានឡើងកាន់អំណាចកាលពីខែសីហាឆ្នាំមុន បន្ទាប់ពីអ្នកអតីតនាយករដ្ឋមន្រ្តីថៃ លោក ស្រេតថា ថាវីស៊ីន (Srettha Thavisin) ត្រូវបានបណ្តេញចេញពីតំណែងនៅក្នុងករណីដែលទាក់ទងនឹងក្រមសីលធម៌ស្រដៀងគ្នានេះ ជុំវិញការតែងតាំងរដ្ឋមន្ត្រីនៃគណៈរដ្ឋមន្ត្រីថៃ៕
ដោយ៖ យា ចិន្ដាខន្ដី (ប្រភព៖ VNA)