AKP ភ្នំពេញ ថ្ងៃទី៣១ ខែកក្កដា ឆ្នាំ២០២៥ -- «សេចក្តីប្រកាសញូវយ៉ក» ដែលបានប្រកាសកាលពីថ្ងៃអង្គារនៅក្នុងសន្និសីទអង្គការសហប្រជាជាតិ បានបញ្ជាក់សារជាថ្មីនូវការគាំទ្រសម្រាប់ដំណោះស្រាយរដ្ឋពីរចំពោះជម្លោះប៉ាឡេស្ទីន និងអ៊ីស្រាអែល ចំពេលដែលមានការកើនឡើងនៃគ្រោះទុរ្ភិក្ស និងគ្រោះមហន្តរាយមនុស្សធម៌នៅតំបន់ហ្គាហ្សា បន្ទាប់ពីការវាយលុករបស់អ៊ីស្រាអែល។

ចាប់តាំងពីថ្ងៃទី០៧ ខែតុលា ឆ្នាំ២០២៣ មក ការវាយលុករបស់អ៊ីស្រាអែលលើតំបន់ហ្គាហ្សាបានសម្លាប់ប្រជាជនប៉ាឡេស្ទីនជាង ៦០.០០០នាក់។ ការទម្លាក់គ្រាប់បែកឥតឈប់ឈរបានបំផ្លិចបំផ្លាញតំបន់ជុំវិញ ដែលបណ្តាលឱ្យមានការខ្វះខាតស្បៀងអាហារយ៉ាងធ្ងន់ធ្ងរ។ យ៉ាងហោចណាស់មនុស្សចំនួន ១៥៤នាក់ ដែលរួមទាំងកុមារ ៨៩នាក់បានស្លាប់ដោយសារការអត់ឃ្លាន។

សេចក្តីប្រកាសនេះត្រូវបានដាក់ចេញនៅចុងបញ្ចប់នៃសន្និសីទអន្តរជាតិកម្រិតខ្ពស់ ស្តីពីដំណោះស្រាយសន្តិភាពនៃបញ្ហាប៉ាឡេស្ទីន និងការអនុវត្តដំណោះស្រាយរដ្ឋពីរ ដែលធ្វើឡើងក្រោមអធិបតីភាពរួមនៃប្រទេសអារ៉ាប៊ីសាអូឌីត និងបារាំង។

សេចក្តីថ្លែងការណ៍បាននិយាយថា «យើងបានព្រមព្រៀងចាត់វិធានការរួមដើម្បីបញ្ចប់សង្រ្គាមនៅតំបន់ហ្គាហ្សា ដើម្បីសម្រេចបាននូវដំណោះស្រាយដ៏ត្រឹមត្រូវ សន្តិភាព និងយូរអង្វែងនៃជម្លោះអ៊ីស្រាអែល និងប៉ាឡេស្ទីន ដោយផ្អែកលើការអនុវត្តប្រកបដោយប្រសិទ្ធភាពនៃដំណោះស្រាយរដ្ឋទាំងពីរ ព្រមទាំងដើម្បីកសាងអនាគតដ៏ល្អប្រសើរសម្រាប់ប៉ាឡេស្ទីន អ៊ីស្រាអែល និងប្រជាជនទាំងអស់នៅក្នុងតំបន់»។

យោងតាមសេចក្តីប្រកាសបានឱ្យដឹងថា ប្រសិនបើគ្មានវិធានការសម្រេចចំពោះដំណោះស្រាយរដ្ឋទាំងពីរ និងការធានាអន្តរជាតិដ៏រឹងមាំទេ ជម្លោះនឹងកាន់តែស៊ីជម្រៅ ហើយសន្តិភាពក្នុងតំបន់នឹងនៅតែពិបាកសម្រេចបាន៕

ដោយ៖ យា ចិន្ដាខន្ដី (ប្រភព៖ AA-AKP)