AKP ភ្នំពេញ ថ្ងៃទី៣១ ខែកក្កដា ឆ្នាំ២០២៥ -- សហរដ្ឋអាមេរិកគួរតែធ្វើការជាមួយប្រទេសចិនដើម្បីបន្តពង្រឹងការយល់ស្រប កាត់បន្ថយការយល់ច្រលំ ពង្រឹងកិច្ចសហប្រតិបត្តិការ ពង្រឹងកិច្ចសន្ទនា និងកិច្ចពិគ្រោះយោបល់ឱ្យកាន់តែស៊ីជម្រៅ និងខិតខំស្វែងរកលទ្ធផលឈ្នះ-ឈ្នះបន្ថែមទៀត។ នេះបើយោងតាមឧបនាយករដ្ឋមន្ត្រីចិន លោក ហេ លីហ្វេង (He Lifeng) បាននិយាយនៅប្រទេសស៊ុយអែតកាលពីល្ងាចថ្ងៃអង្គារ។

លោកបានសង្កត់ធ្ងន់ថា ទំនាក់ទំនងសេដ្ឋកិច្ច និងពាណិជ្ជកម្មរវាងចិន និងសហរដ្ឋអាមេរិកដែលមានស្ថិរភាព មានភាពល្អប្រសើរ និងនិរន្តរភាព មិនត្រឹមតែបម្រើឱ្យគោលដៅអភិវឌ្ឍន៍រៀងៗខ្លួនរបស់ប្រទេសទាំងពីរប៉ុណ្ណោះទេ ប៉ុន្តែថែមទាំងរួមចំណែកដល់កំណើនសេដ្ឋកិច្ច និងស្ថិរភាពពិភពលោកផងដែរ។

លោកបានធ្វើការកត់សម្គាល់ខាងលើនេះនៅក្នុងអំឡុងពេលនៃការចូលរួមកិច្ចពិគ្រោះយោបល់ជុំថ្មីមួយ ស្តីពីសេដ្ឋកិច្ច និងពាណិជ្ជកម្មចិន-សហរដ្ឋអាមេរិក នៅទីក្រុងស្តុកខុម ចាប់ពីថ្ងៃច័ន្ទដល់ថ្ងៃអង្គារជាមួយក្រុមអ្នកចរចារបស់សហរដ្ឋអាមេរិកដែលដឹកនាំដោយលោក ស្កុតត៍ បេសសេនត៍ (Scott Bessent) រដ្ឋមន្រ្តីក្រសួងតនាគារ និងអ្នកតំណាងពាណិជ្ជកម្មសហរដ្ឋអាមេរិក លោក ចាមីសុន ហ្រ្គៀ (Jamieson Greer)។

ដោយផ្អែកលើការឯកភាពគ្នានៅក្នុងកិច្ចប្រជុំ ភាគីទាំងពីរនឹងបន្តជំរុញឱ្យមានការបន្តរយៈពេល ៩០ថ្ងៃទៀតនៃការផ្អាកអនុវត្តការយកពន្ធគយ ២៤% របស់ភាគីសហរដ្ឋអាមេរិក ក៏ដូចជាវិធានការតបតរបស់ភាគីចិនផងដែរ។

លោក លី ឆេងកាង (Li Chenggang) អ្នកតំណាងពាណិជ្ជកម្មអន្តរជាតិរបស់ចិន ជាមួយក្រសួងពាណិជ្ជកម្មចិន បាននិយាយនៅក្នុងសន្និសីទសារព័ត៌មានមួយបន្ទាប់ពីកិច្ចពិភាក្សារយៈពេលពីរថ្ងៃនោះថា ភាគីទាំងពីរបានដឹងយ៉ាងច្បាស់អំពីសារៈសំខាន់នៃការការពារស្ថិរភាព និងទំនាក់ទំនងសេដ្ឋកិច្ចរវាងចិន និងសហរដ្ឋអាមេរិក ហើយក្រុមការងារនៃភាគីទាំងពីរបានព្រមព្រៀងគ្នាក្នុងការបន្តរក្សាទំនាក់ទំនងឱ្យបានជិតស្និទ្ធទៅលើបញ្ហាសំខាន់ៗ ដែលមានផលប្រយោជន៍ទៅវិញទៅមក៕

ដោយ៖ យា ចិន្ដាខន្ដី (ប្រភព៖ ឆាយណាដេលី)