AKP ភ្នំពេញ ថ្ងៃទី៣០ ខែកក្កដា ឆ្នាំ២០២៥ -- បណ្តាញអង្គការមិនមែនរដ្ឋាភិបាលប៉ាឡេស្ទីន (PNGO Net) បានព្រមានថា ជំនួយដែលទម្លាក់ពីយន្តហោះនឹងមិនអាចបញ្ចប់គ្រោះទុរ្ភិក្សនៅក្នុងតំបន់ហ្គាហ្សានោះទេ ហើយបានទាមទារឱ្យអ៊ីស្រាអែលបើកច្រកព្រំដែនឡើងវិញដើម្បីដោះស្រាយវិបត្តិមនុស្សធម៌នៅក្នុងដែនដីនេះ។

លោក អាំចាដ អាល់-ស្សាវ៉ា (Amjad al-Shawa) នាយក PNGO Net បានពន្យល់ថា «ខណៈដែលយើងថ្លែងអំណរគុណចំពោះបណ្តាប្រទេសទាំងអស់ដែលបានបញ្ជូនជំនួយតាមអាកាស តែវានឹងមិនអាចដោះស្រាយវិបត្តិបានទេ ផ្ទុយទៅវិញ វាបានបណ្តាលឱ្យមានជនស៊ីវិលស្លាប់និងការខូចខាត»។

នៅក្នុងសេចក្តីថ្លែងការណ៍ទៅកាន់ទីភ្នាក់ងារសារព័ត៌មានសាហ្វាលោក អាល់-ស្សាវ៉ា បានអះអាងថា ការចែកចាយជំនួយនៅតាមដីគោក ជាវិធីសាស្ត្រដែលមានប្រសិទ្ធភាពបំផុត និងមានគ្រោះថ្នាក់តិចតួចបំផុត។

សកម្មជនរូបនេះបានរំលឹកឡើងវិញអំពីតម្រូវការក្នុងការបង្កើនសម្ពាធអន្តរជាតិទៅលើអ៊ីស្រាអែល ដើម្បីបង្ខំឱ្យបើកច្រកឆ្លងកាត់ឡើងវិញ ហើយអនុញ្ញាតឱ្យនាំចូលទំនិញសំខាន់ៗ និងធានាឱ្យមានលំហូរទំនិញដ៏ធំ។

លោក​បាន​កត់​សម្គាល់​ថា ប្រជាជននៅតំបន់ហ្គាហ្សា​ស្ទ្រីប​ឥឡូវ​នេះ​ត្រូវ​បាន​គេ​បង្ខាំង​នៅ​ក្នុង​តំបន់​ដែល​មាន​មនុស្ស​រស់នៅ​យ៉ាង​ក្រាស់​ក្រែលដែល​បង្កើន​ឱ្យមានការ​ភ័យ​ខ្លាច​ថា​ការទម្លាក់ជំនួយពី​យន្តហោះ​នោះអាច​បណ្ដាល​ឱ្យមាន​អ្នក​ស្លាប់ ​និង​របួស»។

នៅចុងសប្តាហ៍នេះ សហភាពអារ៉ាប់រួម (UAE) និងហ្ស៊កដានី បានធ្វើប្រតិបត្តិការទម្លាក់ជំនួយជាច្រើនដើម្បីកាត់បន្ថយវិបត្តិមនុស្សធម៌នៅក្នុងតំបន់ឆ្នេរនោះ៕

ដោយ៖ យា ចិន្ដាខន្ដី (ប្រភព៖ ប្រេនសាឡាទីណា)