AKP ភ្នំពេញ ថ្ងៃទី៣០ ខែកក្កដា ឆ្នាំ២០២៥ -- នាយក​រដ្ឋមន្ត្រី​ម៉ាឡេស៊ីលោក អាន់វ៉ា អ៊ីប្រាហ៊ីម (Anwar Ibrahim) បាន​ទៅ​បំពេញ​ទស្សនកិច្ច​នៅ​លេខាធិការដ្ឋាន​អាស៊ាន​នៅ​ទីក្រុង​ហ្សាការតា​កាលពី​ថ្ងៃ​ទី២៩ ខែ​កក្កដាឆ្នាំ២០២៥។

លោកត្រូវបានទទួលស្វាគមន៍ដោយលោកបណ្ឌិត កៅ គឹមហួនអគ្គលេខាធិការអាស៊ាន ថ្នាក់ដឹកនាំលេខាធិការដ្ឋាន និងឯកអគ្គរដ្ឋទូត និងតំណាងអចិន្ត្រៃយ៍នៃរដ្ឋសមាជិកអាស៊ាន។

នៅក្នុង​សុន្ទរកថា​ស្វាគមន៍ ​លោក​អគ្គលេខាធិការ​ កៅ​ គឹមហួន បាន​គូស​បញ្ជាក់​ថា ​នេះ​ជា​ដំណើរ​ទស្សនកិច្ច​ផ្លូវការ​លើក​ដំបូង​របស់​នាយក​រដ្ឋមន្ត្រី​នៃ​ប្រទេស​ដែល​កាន់​តំណែង​ជា​ប្រធាន​អាស៊ាន។

នេះ​ជា​លើក​ទី​ប្រាំ​ហើយ​ដែល​ម៉ាឡេស៊ី​បាន​កាន់​តួនាទី​នេះ ដោយ​បង្ហាញ​ពី​ការ​ប្តេជ្ញា​ចិត្ត​យ៉ាង​មុតមាំ​របស់​ខ្លួន​ចំពោះ​របៀបវារៈ​រួម​របស់​អាស៊ាន។លោកបាននិយាយថា ចាប់តាំងពីក្លាយជាសមាជិកស្ថាបនិកអាស៊ាននៅក្នុងឆ្នាំ១៩៦៧ មករហូតដល់ធ្វើជាម្ចាស់ផ្ទះនៃកិច្ចប្រជុំកំពូលសំខាន់ៗ និងគាំទ្រដល់ការកសាងសហគមន៍របស់អាស៊ាន ដែលរួមមានទាំងការពង្រីកអតីតកាលរបស់ខ្លួន ក៏ដូចជាការជំរុញភាពជាដៃគូខាងក្រៅនោះ ប្រទេសម៉ាឡេស៊ីបានដើរតួនាទីជាអ្នកដឹកនាំយ៉ាងខ្ជាប់ខ្ជួនក្នុងការរៀបចំទិសដៅយុទ្ធសាស្ត្រ និងអនាគតរួមរបស់ប្លុក។

លោកនាយករដ្ឋមន្ត្រី អាន់វ៉ា បានសង្កត់ធ្ងន់ថា ដំណើរទស្សនកិច្ចរបស់លោកមិនមែនជាទម្លាប់ការងាររបស់ប្រធានអាស៊ាននោះទេ ប៉ុន្តែជាការឆ្លុះបញ្ចាំងពីការប្តេជ្ញាចិត្តយ៉ាងមុតមាំរបស់ម៉ាឡេស៊ីចំពោះឧត្តមគតិ និងអាទិភាពរបស់សមាគម។

នៅក្នុងសុន្ទរកថាគោលនយោបាយរបស់លោក មេដឹកនាំម៉ាឡេស៊ីរូបនេះបានសង្កត់ធ្ងន់ថា ក្នុងរយៈពេលជិតប្រាំមួយទសវត្សរ៍កន្លងមកនេះអាស៊ានបានជំរុញតំបន់មួយដែលត្រូវបានកត់សម្គាល់យ៉ាងទូលំទូលាយដោយសន្តិភាព ស្ថិរភាព និងកំណើនសេដ្ឋកិច្ចយ៉ាងស្វាហាប់។ លោកបាននិយាយថា សមិទ្ធិផលទាំងនេះកើតចេញពីមូលដ្ឋានគ្រឹះនៃការជឿទុកចិត្តកិច្ចសន្ទនា និងការកសាងការឯកភាពគ្នា ដែលអាចឱ្យរដ្ឋជាសមាជិកគ្រប់គ្រងបាននូវភាពខុសគ្នា និងទប់ស្កាត់ការកើនឡើងនៃជម្លោះ។ លោកបានកត់សម្គាល់ថា ក្របខណ្ឌនៃកិច្ចសហប្រតិបត្តិការរបស់អាស៊ានបានជួយរក្សាស្ថិរភាពក្នុងតំបន់ បើទោះបីមានបញ្ហាប្រឈមកើតឡើងក៏ដោយ។

លោក អាន់វ៉ា ក៏បានរំលឹកអំពីតួនាទីរបស់ម៉ាឡេស៊ីក្នុងឋានៈជាប្រធានអាស៊ាន សម្រាប់ការសម្រុះសម្រួលភាពតានតឹងរវាងកម្ពុជា និងថៃ ជុំវិញបញ្ហាព្រំដែន ដោយអំពាវនាវឱ្យមានកិច្ចសន្ទនាគ្នាដើម្បីទប់ស្កាត់ជម្លោះ និងការបាត់បង់អាយុជីវិតប្រជាជន។

លោកបានបញ្ជាក់សារជាថ្មីនូវការជឿជាក់របស់ម៉ាឡេស៊ីទៅលើកិច្ចសន្ទនា ការគោរពគ្នាទៅវិញទៅមក និងការប្តេជ្ញាចិត្តចំពោះស្ថិរភាព ដោយលោកបានកត់សម្គាល់ថា គោលការណ៍ទាំងនេះរួមជាមួយនឹងការអត់ធ្មត់ទំនុកចិត្ត និងកិច្ចកាងារការទូតប្រកបដោយនិរន្តរភាព នឹងបង្កើតបានជាគុណតម្លៃស្នូលរបស់អាស៊ាន និងធានាបាននូវការឯកភាព និងភាពជាកណ្តាលរបស់ខ្លួន។

លោកបានបញ្ចប់ដោយការអំពាវនាវឱ្យអាស៊ានជំរុញបន្ថែមទៀតនូវទំនុកចិត្តជាយុទ្ធសាស្ត្រ កិច្ចសន្ទនា និងការឯកភាពគ្នាពិតប្រាកដទាំងពាក្យសម្តី និងសកម្មភាពឆ្ពោះទៅរកការកសាងសហគមន៍កាន់តែរឹងមាំ មានសន្តិភាព និងវិបុលភាព៕

ដោយ៖ យា ចិន្ដាខន្ដី (ប្រភព៖ VNA)