AKP ភ្នំពេញ ថ្ងៃទី២៩ ខែកក្កដា ឆ្នាំ២០២៥ -- រដ្ឋមន្ត្រីក្រសួងយុវជននិងកីឡាម៉ាឡេស៊ី លោកស្រី ហានណាហ៍ យេអូ ធីសូវ ស៊ូអាន (Hannah Yeoh Tseow Suan) បាននិយាយកាលពីថ្ងៃអាទិត្យថា ប្រទេសម៉ាឡេស៊ីស្វាគមន៍កិច្ចសហប្រតិបត្តិការយុវជន និងកីឡាកាន់តែជិតស្និទ្ធជាមួយប្រទេសចិន ហើយទន្ទឹងរង់ចាំការពង្រឹងទំនាក់ទំនងទ្វេភាគីដោយការធ្វើឱ្យកាន់តែស៊ីជម្រៅនូវការផ្លាស់ប្តូររវាងប្រជាជន និងប្រជាជន។

ថ្លែងនៅក្នុងកម្មវិធីប្រកួតមិត្តភាពម៉ាឡេស៊ី-ចិនដែលធ្វើឡើងនៅរដ្ឋសាបាហ៍ លោកស្រី យេអូ បានលើកឡើងពីភាពរឹងមាំយូរអង្វែងរបស់ប្រទេសចិនក្នុងវិស័យកីឡា ដោយលោកបានកត់សម្គាល់ថា ប្រទេសម៉ាឡេស៊ីបានទាញយកការយល់ដឹងពីការផ្លាស់ប្តូរទ្វេភាគី និងកិច្ចសហប្រតិបត្តិការហ្វឹកហាត់ជាមួយប្រទេសចិន។

លោកស្រីបានបន្ថែមថា «ប្រទេសចិនតែងតែត្រូវបានគេស្គាល់ថាជាមេដឹកនាំដ៏សំខាន់មួយផ្នែកកីឡានៅទ្វីបអាស៊ី សូម្បីតែនៅកម្រិតអូឡាំពិកក៏ដោយ»។

ការប្រកួតមិត្តភាពនៅទីក្រុងសាបាហ៍ដែលរៀបចំដោយសមាគមមិត្តភាពម៉ាឡេស៊ី-ចិនសាបាហ៍ បានទាក់ទាញអ្នកចូលរួមជាង៥.០០០នាក់ រួមទាំងយុវជនមកពីប្រទេសទាំងពីរ គ្រួសារក្នុងស្រុក និងនិយោជិតនៃសហគ្រាសចិនដែលមានមូលដ្ឋាននៅប្រទេសម៉ាឡេស៊ី៕

ដោយ៖ មូល មិនា (ប្រភព៖ ភីបផលដេលី)