AKP ភ្នំពេញ ថ្ងៃទី២៩ ខែកក្កដា ឆ្នាំ២០២៥ -- មន្ត្រីកូរ៉េខាងត្បូងបាននិយាយកាលពីថ្ងៃចន្ទថា ប្រមុខកងទ័ពអាកាសនឹងធ្វើទស្សនកិច្ចនៅប្រទេសអារ៉ាប៊ីសាអូឌីតក្នុងសប្តាហ៍នេះ ដើម្បីពិភាក្សាអំពីវិធីពង្រឹងកិច្ចសហប្រតិបត្តិការទ្វេភាគីលើវិស័យការពារជាតិ និងឧស្សាហកម្មផលិតសម្ភារៈការពារជាតិ។

ក្នុងដំណើរទស្សនកិច្ចរយៈពេល ៥ថ្ងៃរបស់លោកដែលចាប់ផ្តើមកាលពីថ្ងៃច័ន្ទ អគ្គសេនាធិការកងទ័ពអាកាស លោកឧត្តមសេនីយ៍លី យុងស៊ូ (Lee Young-su) នឹងជួបជាមួយមន្ត្រីយោធាជាន់ខ្ពស់នៃប្រទេសអារ៉ាប៊ីសាអូឌីត រួមទាំងលោកឧត្តមសេនីយ៍ឯក ហ្វាយយ៉ាដហ៍ ប៊ីន ហាមេដ អាល់ រូវៃលី (Fayyadh Bin Hamed Al Ruwaili) អគ្គសេនាធិការអារ៉ាប៊ីសាអូឌីត និងមេបញ្ជាការកងទ័ពអាកាសអារ៉ាប៊ីសាអូឌីត លោក តួគី ប៊ីន បានដារ អាល់ សូដ (Turki Bin Bandar Al Saud) ។

លោក លី ក៏ត្រូវបានគេរំពឹងថានឹងទៅទស្សនកិច្ចមជ្ឈមណ្ឌលសង្គ្រាមតាមអាកាសរបស់កងទ័ពអាកាសអារ៉ាប៊ីសាអូឌីត និងសាលាទ័ពអាកាសក្នុងស្រុកផងដែរ។

មន្ត្រីយោធាម្នាក់បាននិយាយថា ដំណើរទស្សនកិច្ចនេះគឺមានគោលបំណងលើកកម្ពស់យន្តហោះចម្បាំង KF-21 ក្នុងស្រុក និងប្រព័ន្ធCheongung-II ដែលជាប្រព័ន្ធការពារមីស៊ីលពីដីទៅអាកាស (M-SAM) ។ប្រព័ន្ធ Cheongung-II ដែលបានអភិវឌ្ឍដោយប្រទេសកូរ៉េខាងត្បូងត្រូវបាននាំចេញទៅកាន់ប្រទេសអេមីរ៉ាតអារ៉ាប់រួម និងអារ៉ាប៊ីសាអូឌីត៕

ដោយ៖ មូល មិនា (ប្រភព៖ យ៉ុនហាប់)