AKP ភ្នំពេញ ថ្ងៃទី២៩ ខែកក្កដា ឆ្នាំ២០២៥ -- ក្រសួងសុខាភិបាលបាននិយាយកាលពីថ្ងៃចន្ទថា យ៉ាងហោចណាស់ជនជាតិប៉ាឡេស្ទីនចំនួន១៤នាក់បន្ថែមទៀតដែលរួមទាំងកុមារពីរនាក់ផង បានស្លាប់ដោយសារការអត់ឃ្លាននៅក្នុងតំបន់ហ្គាហ្សាស្ទ្រីបក្នុងរយៈពេល២៤ម៉ោងចុងក្រោយនេះ ដោយសារគ្រោះទុរ្ភិក្សដែលបណ្តាលមកពីការឡោមព័ទ្ធអស់រយៈពេលជាច្រើនខែរបស់អ៊ីស្រាអែលដែលបន្តកាន់តែអាក្រក់ទៅៗ។

ក្រសួងបាននិយាយនៅក្នុងសេចក្តីថ្លែងការណ៍មួយថា «មន្ទីរពេទ្យបានកត់ត្រានូវករណីស្លាប់ថ្មីចំនួន ១៤នាក់ក្នុងរយៈពេល ២៤ម៉ោងចុងក្រោយនេះដោយសារតែគ្រោះទុរ្ភិក្ស និងកង្វះអាហារូបត្ថម្ភ រួមទាំងកុមារចំនួន ២នាក់ផងដែរដែលបានស្លាប់ដោយសារភាពអត់ឃ្លាន»។

អ្នកស្លាប់ថ្មីនោះបានធ្វើឱ្យចំនួនអ្នកស្លាប់ដោយសារការអត់ឃ្លាននៅតំបន់ហ្គាហ្សាចាប់តាំងពីខែតុលា ឆ្នាំ២០២៣ មក កើនឡើងដល់ ១៤៧នាក់ដោយក្នុងនោះមានកុមារចំនួន ៨៨នាក់។

ដោយ​បដិសេធចំពោះ​ការ​អំពាវនាវ​ជា​អន្តរជាតិ​ឱ្យ​មាន​បទ​ឈប់​បាញ់កងទ័ព​អ៊ីស្រាអែល​បាន​បន្ត​ការ​វាយលុក​យ៉ាង​ព្រៃផ្សៃ​ទៅលើ​តំបន់​ហ្គាហ្សា​ចាប់​តាំង​ពី​ថ្ងៃ​ទី០៧ ខែ​តុលា ឆ្នាំ២០២៣ មក ដោយ​បាន​សម្លាប់​ប្រជាជន​ប៉ាឡេស្ទីនប្រមាណ​ជិត ៦០.០០០នាក់ ដែល​ភាគ​ច្រើន​ជា​ស្ត្រី និង​កុមារ។ ការទម្លាក់គ្រាប់បែកឥតឈប់ឈរបានបំផ្លាញតំបន់ជុំវិញ និងនាំឱ្យមានការខ្វះខាតស្បៀងអាហារ។

កាលពីខែវិច្ឆិកាឆ្នាំមុន តុលាការឧក្រិដ្ឋកម្មអន្តរជាតិបានចេញដីកាចាប់ខ្លួននាយករដ្ឋមន្ត្រីអ៊ីស្រាអែល លោក បេនចាមីន ណេតាន់យ៉ាហ៊ូ (Benjamin Netanyahu) និងអតីតរដ្ឋមន្ត្រីការពារជាតិ លោក យ៉ូអាវ ហ្កាល់លេនត៍ (Yoav Gallant) ពីបទឧក្រិដ្ឋកម្មសង្រ្គាម និងឧក្រិដ្ឋកម្មប្រឆាំងមនុស្សជាតិនៅក្នុងតំបន់ហ្គាហ្សា៕

ដោយ៖ យា ចិន្ដាខន្ដី (ប្រភព៖ AA-AKP)