AKP ភ្នំពេញ ថ្ងៃទី២៥ ខែកក្កដា ឆ្នាំ២០២៥ -- ការិយាល័យរបស់ប្រធានាធិបតីកូរ៉េខាងត្បូងបាននិយាយថា លោក លី ជេយ៉ុង (Lee Jae Myung) កាលពីថ្ងៃព្រហស្បតិ៍បានសន្ទនាតាមទូរស័ព្ទជាមួយសមភាគីរបស់លោកនៅក្នុងប្រទេសអាល្លឺម៉ង់ និងអ៊ូសបេគីស្ថាន ដើម្បីពិភាក្សាអំពីការពង្រឹងកិច្ចសហប្រតិបត្តិការទ្វេភាគី។

ក្នុង​អំឡុង​ពេល​សន្ទនាតាមទូរស័ព្ទ​ជាមួយ​អធិការបតី​អាល្លឺម៉ង់ លោក ហ្វ្រីដរីច មឺហ្ស (Friedrich Merz) លោក លី បាន​គូសបញ្ជាក់​អំពី​ទំនាក់ទំនង​ដ៏រឹងមាំ​រវាង​ប្រទេស​ទាំងពីរ។

លោក មឺហ្ស បានយល់ព្រមដោយកត់សម្គាល់ថា ប្រទេសអាល្លឺម៉ង់ និងកូរ៉េខាងត្បូងគឺជាដៃគូដ៏សំខាន់ដែលចែករំលែកតម្លៃស្នូលនៃលទ្ធិប្រជាធិបតេយ្យ សិទ្ធិមនុស្ស និងពាណិជ្ជកម្មសេរី។

នៅក្នុងការសន្ទនាជាមួយប្រធានាធិបតីអ៊ូសបេគីស្ថាន លោក សាវកាត់ មៀហ្សីយ៉ូយ៉េវ (Shavkat Mirziyoyev) លោក លី បានបង្ហាញពីក្តីសង្ឃឹមរបស់លោកក្នុងការលើកកម្ពស់ «ភាពជាដៃគូយុទ្ធសាស្ត្រពិសេស» រវាងប្រទេសកូរ៉េខាងត្បូង និងអ៊ូសបេគីស្ថាន។

លោក មៀហ្សីយ៉ូយ៉េវ បានឆ្លើយតបវិញដោយនិយាយថា លោកមាន «ក្តីស្រឡាញ់ពិសេស» សម្រាប់ប្រទេសកូរ៉េខាងត្បូង ហើយចង់ឃើញទំនាក់ទំនងបន្តរីកចម្រើន។

ភាគីទាំងពីរក៏បានទទួលស្គាល់កិច្ចសហប្រតិបត្តិការប្រកបដោយជោគជ័យ និងជាក់ស្តែងក្នុងវិស័យផ្សេងៗ រួមទាំងហេដ្ឋារចនាសម្ព័ន្ធ និងការដឹកជញ្ជូនផងដែរ។ លោក លី បានស្នើឱ្យ លោក មៀហ្សីយ៉ូយ៉េវ យកចិត្តទុកដាក់ជាពិសេសចំពោះការលំបាកដែលក្រុមហ៊ុនកូរ៉េខាងត្បូងជួបប្រទះនៅពេលប្រតិបត្តិការនៅក្នុងប្រទេសអ៊ូសបេគីស្ថាន៕

ដោយ៖ មូល មិនា (ប្រភព៖ យ៉ុនហាប់)