AKP ភ្នំពេញ ថ្ងៃទី១៩ ខែកក្កដា ឆ្នាំ២០២៥–

សម្ដេចមហាបវរធិបតី ហ៊ុន ម៉ាណែត នាយករដ្ឋមន្ត្រី បានជម្រាបជូនបងប្អូន អ៊ំពូមីង តាយាយ សូមមេត្តាជ្រាបថា មានជនឆ្លៀតឱកាសបានបន្តក្លែងបន្លំ និងបង្កេីតព័ត៌មានក្លែងក្លាយ នាំឱ្យមានការយល់ច្រឡំ ដូចជាព័ត៌មានពាក់ព័ន្ធនឹងការបើកច្រកព្រំដែន។ 

តាមរយៈបណ្ដាញទំនាក់ទំនងសង្គម នៅរសៀលថ្ងៃទី១៩ ខែកក្កដា ឆ្នាំ២០២៥នេះ សម្ដេចធិបតី បានគូសបញ្ជាក់ថា គោលការណ៍ចំពោះការបេីកព្រំដែនឡេីងវិញ របស់កម្ពុជា គឺនៅរក្សាដដែលត្រូវអនុវត្ត៖ ១/ ថៃប្រកាសបើកមុនជាឯកតោភាគី ហើយធានាថានឹងមិនមានការបិទជាឯកតោភាគីនេះទៀតទេ, ២/ ការបើកច្រកព្រំដែន គឺត្រូវបើកព្រមគ្នា ហើយគ្រប់ច្រកទាំងអស់ និង៣/ ត្រូវបើកឱ្យដូចមុនថ្ងៃ៧ មិថុនា ពោលគឺបើកចាប់ពីម៉ោង ៦ព្រឹក ដល់ម៉ោង ១០យប់ និងបើកសម្រាប់មនុស្សនិងទំនិញទាំងអស់ដូចដើម។ 

កម្ពុជានឹងបើកដំណើរការឡើងវិញនៅច្រកព្រំដែនខាងកម្ពុជាដូចគ្នា យ៉ាងយូរត្រឹម ៥ម៉ោងក្រោយពីការបើករបស់ភាគីថៃ៕

ដោយ៖ គង់ សិរីរ័ត្ន