AKP ភ្នំពេញ ថ្ងៃទី១៦ ខែកក្កដា ឆ្នាំ២០២៥ -- ក្រុមបាល់ទាត់ជម្រើសជាតិកម្ពុជាអាយុក្រោម២៣ឆ្នាំ (U23) ត្រៀមប្រកួតបើកឆាកជាមួយក្រុម U23 ឡាវ នៅវេលាម៉ោង ៥ល្ងាច ថ្ងៃទី១៦ ខែកក្កដានេះ ក្នុងវគ្គជម្រុះពូល B នៃពានរង្វាន់ជើងឯកអាស៊ានក្រោមអាយុ២៣ឆ្នាំ (ASEAN U23 Mandiri Championship 2025) នៅប្រទេសឥណ្ឌូណេស៊ី។

ក្រុមកម្ពុជាស្ថិតនៅក្នុងពូល B ជាមួយក្រុមឡាវ និងក្រុមវៀតណាម ហើយក្រុមកម្ពុជាត្រូវប្រកួតបើកឆាកជាមួយក្រុមឡាវ ហើយប្រកួតទី២ ត្រូវប្រជែងជាមួយក្រុមវៀតណាម នាវេលាម៉ោង៨យប់ ថ្ងៃទី២២ ខែកក្កដា ឆ្នាំ២០២៥។ ការប្រកួត ASEAN U23 Mandiri Championship 2025 ដំណើរការពីថ្ងៃទី១៥-២៩ ខែកក្កដា ឆ្នាំ២០២៥ នៅប្រទេសឥណ្ឌូណេស៊ី ដោយមាន១០ក្រុមចូលរួមប្រជែងជើងឯក និងចែកជា៣ពូល។ ក្រោយបញ្ចប់វគ្គសន្សំពិន្ទុក្នុងពូល គឺក្រុមចំណាត់ថ្នាក់លេខ១នៃពូលទាំង៣ស្មើនឹង៣ក្រុម និងក្រុមលេខ២ល្អផ្តាច់គេ១ក្រុមនឹងបានឡើងទៅប្រកួតនៅវគ្គពាក់កណ្តាលផ្តាច់ព្រ័ត្រ។

ក្រុម U23 កម្ពុជា ដឹកនាំដោយគ្រូបង្គោលជនជាតិជប៉ុន លោក Koji Gyotoku និងគ្រូជំនួយជាច្រើនរូបមកពីក្លឹបកំពូលកម្ពុជា។ ចំពោះសមាសភាពកីឡាករកម្ពុជាក្រោមអាយុ២៣ឆ្នាំចំនួន២៣នាក់ ក្នុងបញ្ជីប្រមូលផ្តុំហ្វឹកហាត់ត្រូវបានកោះហៅមកពីក្លឹបមួយចំនួន ក្នុងក្របខណ្ឌលីគកំពូលកម្ពុជាដូចជា ក្លឹបវិសាខា ក្លឹបឡាយហ្វខេត្តព្រះសីហនុ ក្លឹបអង្គរថាយហ្គឺរ ក្លឹបទ័ព ក្លឹបណាហ្គាវើលដ៍ ព្រះខ័នរាជស្វាយរៀង អាយអេសអាយដង្កោសែនជ័យ និងមានយុវជនម្នាក់មកពីមជ្ឈមណ្ឌល និងសាលាកីឡាបាល់ទាត់បាទី។ ក្នុងចំណោមសមាសភាព២៣នាក់នេះ គឺមានកីឡាករកូនកាត់ខ្មែរ-នូវែលសេឡង់ម្នាក់ គឺយុវជន លីម លោកាថុង មកពីក្លឹប Auckland United ក្របខណ្ឌលីគកំពូលនៃប្រទេសនូវែលសេឡង់៕

ដោយ ហេង ណាលីន (រូបភាព៖ FFC)