AKP កំពង់ឆ្នាំង ថ្ងៃទី១៤ ខែកក្កដា ឆ្នាំ២០២៥–សម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រីនៃព្រះរាជាណាចក្រកម្ពុជា នាព្រឹកថ្ងៃចន្ទទី១៤ ខែកក្កដា ឆ្នាំ២០២៥នេះ អញ្ជើញជាអធិបតី ក្នុងពិធីសម្ពោធដាក់ឱ្យប្រើប្រាស់សមិទ្ធផលនៃមជ្ឈមណ្ឌលហ្វឹកហ្វឺនកងរាជអាវុធហត្ថភ្នំជុំសែនរីករាយ និងអបអរសាទរ ខួបលើកទី៣២ ទិវាកងរាជអាវុធហត្ថ ១៤ កក្កដា ១៩៩៣ -១៤ កក្ដដា ២០២៥ ស្ថិតនៅក្នុងភូមិសាស្ត្រភូមិច្រកកូវ ឃុំពាម ស្រុកសាមគ្គីមានជ័យ ខេត្តកំពង់ឆ្នាំង។។

ការប្រារព្ធពិធីសម្ពោធដាក់ឱ្យប្រើប្រាស់សមិទ្ធផល មជ្ឈមណ្ឌលហ្វឹកហ្វឺនកងរាជ​អាវុធ​ហត្ថ (​ភ្នំ​ជុំ​សែន​​រីក​រាយ) នាពេលនេះ គឺបានធ្វើឡើងស្រប​គ្នា​ការអបអរសាទរ​ខួប​អនុស្សាវរីយ៍លើក​ទី៣២ ទិវាកងរាជ​អាវុធ​ហត្ថ ១៤ កក្កដា ១៩៩៣ - ១៤ កក្កដា ២០២៥។

វត្ថុបំណងនៃការរៀបចំពិធីថ្ងៃនេះ ដើម្បីរំលឹកឡើងវិញនូវប្រវត្តិស្នាដៃ សមិទ្ធផល គោរពដឹងគុណ​ការដឹកនាំ គ្រប់គ្រង បញ្ជា, គោរព​វិញ្ញាណក្ខន្ធ យុទ្ធជន យុទ្ធនារី យោធិននៃកងរាជអាវុធហត្ថ ដែលបាន​ធ្វើ​ពលិកម្ម, សួរសុខទុក្ខ និងជូនពរ​ដល់​យោធិន​នៃកងរាជអាវុធហត្ថ ដែលសម្រាកព្យាបាលជំងឺ របួសតាម​មន្ទីរពេទ្យ លំនៅ​ឋាន និងថ្លែង​អំណរ​គុណ​ចំពោះ​អតីត​យោធិននៃកងរាជអាវុធហត្ថ និវត្តន៍ជន ជនពិការ។ ពង្រឹង​ធ្លុងមហាសាមគ្គីឯកភាពផ្ទៃក្នុង មហាគ្រួសារកងរាជអាវុធហត្ថ ឆ្ពោះទៅចូលរួមអនុវត្តកម្មវិធី​នយោ​បាយ យុទ្ធសាស្ត្របញ្ចកោណ ដំណាក់កាលទី១ និងកំណែទម្រង់កងយោធពលខេមរភូមិន្ទ។

ប្រវត្តិនៃការបង្កើត កសាង អភិវឌ្ឍកងរាជអាវុធហត្ថតាមលំដាប់លំដោយដូចខាងក្រោម៖ នៅថ្ងៃទី២៧ ខែកញ្ញា ឆ្នាំ​១៩៥៧ កងរាជអាវុធហត្ថ ត្រូវបានបង្កើតឡើង​តាម​ព្រះរាជក្រឹត្យ​លេខ​៤៤៦ NS. និង៤៤៧ NS. ដែលមានឈ្មោះថា “កងរាជអាវុធហត្ថខ្មែរ” បាន​ធ្វើ​សកម្មភាព​រហូត​ដល់​មុន​ថ្ងៃទី៥ ខែតុលា ឆ្នាំ១៩៧១ កងរាជអាវុធហត្ថខ្មែរ បានប្តូរឈ្មោះជា “កងអាវុធហត្ថជាតិ”។ ហើយពីថ្ងៃទី១៧ ខែមេសា ឆ្នាំ១៩៧៥ រហូត​ដល់​ថ្ងៃទី១៤ ខែកក្កដា ឆ្នាំ១៩៩៣ នៅប្រទេសកម្ពុជាពុំមានកងរាជអាវុធហត្ថទេ។ តាមក្រឹត្យចុះថ្ងៃទី១៤ ខែកក្កដា ឆ្នាំ១៩៩៣ ស្តីពីការបង្កើតអគ្គសេនាធិការដ្ឋាន នៃកងទ័ពជាតិកម្ពុជា និង​រចនា​សម្ព័ន្ធ​​ចាត់​តាំង ​នៃអគ្គ​សេនា​ធិការ​ដ្ឋាន ក្នុងចំណោមស្ថាប័ន អង្គភាព​ទ័ព​ជំនាញ មានស្ថាប័នជំនាញមួយ គឺ“កងអាវុធហត្ថ” ដែលមានតួនាទី ជាតម្រួត​យោធា គ្រប់គ្រងលើផ្នែកវិន័យ សណ្តាប់ធ្នាប់កងទ័ព ទាំងទីតាំង​ក្នុងបន្ទាយ និងតាមទីសាធារណៈ។

ដោយផ្អែកទៅតាមសភាពការណ៍សំណូមពរសន្តិសុខ សណ្ដាប់​ធ្នាប់​ ពង្រឹងការអនុវត្តច្បាប់ កសាង​ព្រះរាជាណាចក្រកម្ពុជា ជាប្រទេសនីតិរដ្ឋ, នៅថ្ងៃទី១៥ ខែមិថុនា ឆ្នាំ១៩៩៤ រាជរដ្ឋាភិបាលបានចេញ​អនុក្រឹត្យ​លេខ២៥ អនក្រ. និងបន្ទាប់មកបានធ្វើវិសោធនកម្មដោយអនុក្រឹត្យលេខ៧៧ អនក្រ. ចុះថ្ងៃទី២១ ខែធ្នូ ឆ្នាំ១៩៩៤ ចែង​អំពី​ភារកិច្ច​និង​រចនាសម្ព័ន្ធទូទៅនៃ​កងរាជអាវុធ​ហត្ថ។ កងរាជអាវុធហត្ថ ដែលគ្រប់គ្រងដោយ​អគ្គសេនា​ធិការ នៃកងយោធពលខេមរ​ភូមិន្ទ ត្រូវឋិតនៅក្រោមបញ្ជា​ផ្ទាល់​របស់​នាយករដ្ឋមន្ត្រី។ កងរាជអាវុធហត្ថ ​ជា​ផ្នែក​មួយ​របស់​កងយោធពលខេមរភូមិន្ទ ដែលមានស្វ័យភាពក្នុងកិច្ចអនុវត្តច្បាប់ មានសកម្មភាពផ្នែកប៉ូលិស​រដ្ឋបាល ដែលមានឧបនិស្ស័យជាអន្តរក្រសួង។ សមត្ថកិច្ចកងរាជអាវុធហត្ថ ត្រូវអនុវត្តពេញផ្ទៃប្រទេសទាំង​មូល ទៅ​លើ​ពលរដ្ឋស៊ីវិល ព្រមទាំងទៅលើយោធាក្នុងជួរកងទ័ព។ កងរាជអាវុធហត្ថ មានភារកិច្ចរ៉ាប់រង​សកម្មភាពរក្សា ការពារសន្តិសុខ សណ្តាប់ធ្នាប់ ទប់ស្កាត់បង្ក្រាបបទល្មើសព្រហ្មទណ្ឌ បទល្មើសយោធា ពង្រឹងការអនុវត្តច្បាប់ និងជួយសង្គ្រោះប្រជាពលរដ្ឋនៅពេលជួបគ្រោះមហន្តរាយផ្សេងៗ។

ចាប់តាំងពីបង្កើត, កងរាជអាវុធហត្ថ បានយកចិត្តទុកដាក់ការងារអប់រំហ្វឹកហ្វឺន បណ្ដុះបណ្ដាល​ធនធាន​មនុស្ស ពង្រឹងរចនាសម្ព័ន្ធចាត់តាំង កសាងអង្គភាព និងអនុវត្តតួនាទី ភារកិច្ចស្នូល ព្រមទាំង​អនុវត្ត​បទបញ្ជារបស់រាជរដ្ឋាភិបាល ដោយប្រកាន់ខ្ជាប់ខ្ជួនការគោរពច្បាប់ គោរពវិន័យ ក្រមសីលធម៌ វិជ្ជាជីវៈ ចូល​រួម​យ៉ាងសកម្ម ក្នុងការប្រយុទ្ធប្រឆាំងទប់ស្កាត់បង្ក្រាបបទល្មើស, ថែរក្សា ការពារសន្តិសុខ សណ្ដាប់ធ្នាប់, រួម​ចំណែក​កសាងព្រះរាជាណាចក្រកម្ពុជា ជាប្រទេសនីតិរដ្ឋ, និងបានជួយ​ប្រជាជននៅពេលដែលជួបគ្រោះ​មហន្ត​រាយផ្សេងៗដែលកើតឡើងជាយថាហេតុ មានចំនួនរហូតដល់រាប់សិបម៉ឺនលើក។ រីឯការងារ​បង្ក្រាប​បទ​លើ្មស​កន្លងទៅ កងរាជអាវុធហត្ថ បានបំបែកសំណុំរឿងឧក្រិដ្ឋកម្មធំៗជាច្រើនករណីមានដូចជា៖ ករណីចាប់​ជំរិត​ទារប្រាក់, ករណីផលិតនិងចែកចាយគ្រឿងញៀន, ការបង្កើតក្រុមប្រដាប់អាវុធខុសច្បាប់ អាណាធិប​តេយ្យ, ករណីប្លន់ប្រដាប់អាវុធ, ជួញដូរអាវុធខុសច្បាប់, ជួញដូរមនុស្ស, ឃាតកម្ម, បទល្មើសធនធាន​ធម្ម​ជាតិ, បទល្មើសបច្ចេកវិទ្យា, ល្បែងស៊ីសង, អំពើរត់គេចពន្ធ និងសហការពង្រឹងការអនុវត្តច្បាប់ ។ល។

ដោយ៖ គង់ សិរីរ័ត្ន