AKP ព្រះសីហនុ ថ្ងៃទី០៧ ខែកក្កដា ឆ្នាំ២០២៥--

លោកជំទាវ គីម សុភ័ក្ត្រ ប្រធានកិតិ្តយសសមាគមនារីកម្ពុជា ដើម្បីសន្តិភាព និងការអភិវឌ្ឍសាខាខេត្តព្រះសីហនុ បានអញ្ជើញសំណេះសំណាល និងនាំយកសម្ភារសិក្សា និងថវិកាជូនសិស្សានុសិស្សសាលាបឋមសិក្សា ជា ស៊ីម សរុបចំនួន ៧៣៩នាក់ នាព្រឹកថ្ងៃទី០៧ ខែកក្កដា ឆ្នាំ២០២៥ ហើយការចែកនាពេលនេះ គឺជាលើកទី២ ដោយមានការចូលរួមពីលោកជំទាវ លោកស្រីអភិបាលរងខេត្ត អភិបាលរងក្រុង លោកស្រី ជាសមាជិកា នៃគណៈកម្មការសាខាសមាគមនារីកម្ពុជា ដើម្បីសន្តិភាព និងការអភិវឌ្ឍសាខាខេត្តព្រះសីហនុ លោកគ្រូ អ្នកគ្រូ និងសិស្សានុសិស្ស។

លោកជំទាវ គីម សុភ័ក្ត្រ បានមានប្រសាសន៍ពាំនាំប្រសាសន៍ផ្តាំផ្ញើសួរសុខទុក្ខពីសំណាក់សម្តេចកិត្តិព្រឹត្តបណ្ឌិត ប៊ុន រ៉ានី ហ៊ុន សែន ក៏ដូចជាឯកឧត្តម អភិបាលខេត្តព្រះសីហនុ ដែលជានិច្ចកាលលោកតែងយកចិត្តទុកដាក់គិតគូរចំពោះសុខទុក្ខក្មួយៗសិស្សានុសិស្សនៅក្នុងខេត្តព្រះសីហនុ ជាពិសេសសិស្សានុសិស្សកំពុងតែសិក្សាក្រេប យកនូវចំណេះវិជ្ជា និងបំណិនជីវិត ម្យ៉ាងទៀតលោកគ្រូ អ្នកគ្រូ ដែលបានលះបង់យកអស់កម្លាំងកាយចិត្ត ប្រាជ្ញា ស្មារតីក្នុងការបង្ហាត់បង្រៀនដល់ក្មួយៗសិស្សានុសិស្សទាំងអស់គ្នាក្នុងនាមជាឪពុកម្តាយទី២។

លោកជំទាវ គីម សុភ័ក្ត្រ ក៏បានលើកទឹកចិត្តក្មួយៗសិស្សានុសិស្សទាំងអស់ត្រូវខិតខំសិក្សារៀនសូត្រស្របតាមគោលនយោបាយកំណែទម្រង់របស់ក្រសួងអប់រំយុវជន និងកីឡា។ ហើយការជួបជុំគ្នានាពេលនេះ តបតាមការសន្យាកាលពីថ្ងៃទី០១ ខែមិថុនាកន្លងមក ដែលសមាគមនារីកម្ពុជា ដើម្បីសន្តិភាព និងការអភិវឌ្ឍសាខាខេត្តព្រះសីហនុ បានធ្វើការជួបសំណេះសំណាល និងបាននាំយកអំណោយជាសម្ភារសិក្សា និងថវិកា ចែកជូនក្មួយៗសិស្សានុសិស្សនៃសាលាបឋម សិក្សាសម្តេច ជា ស៊ីម ចំនួន ៧០០នាក់រួមមកហើយ។ 

 
លោកជំទាវបានបន្តថា ក្រោមការដឹកនាំរបស់រាជរដ្ឋាភិបាលនីតិកាលទី៧ ឈរលើស្មារតីបន្តវេនក្រោមការដឹកនាំរបស់សម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រី នៃព្រះរាជាណាចក្រកម្ពុជា បន្តជ្រោងទង់រក្សាសុខសន្តិភាព ស្ថិរភាព និងការអភិវឌ្ឍសង្គមសេដ្ឋកិច្ចជាមួយនឹងការដាក់ចេញនូវយុទ្ធសាស្ត្របញ្ចកោណដំណាក់កាលទី១ នីតិកាលទី៧ នៃរដ្ឋសភា បានបន្តកែទម្រង់សាលារៀនជំនាន់ថ្មី សាលារៀនគំរូ អភិបាលកិច្ច និងពង្រឹងគុណភាពនៃការបណ្តុះបណ្តាលគ្រូបង្រៀន វិធីសាស្ត្របង្រៀន ព្រមទាំងការបន្តលើកកម្ពស់ជីវភាព និងគុណតម្លៃបុគ្គលិកសិក្សាគ្រប់កម្រិត ការអប់រំឌីជីថល ការកសាងហេដ្ឋារចនាសម្ព័ន្ធឌីជីថល វិទ្យាសាស្ត្រ និងបច្ចេកវិទ្យា។ វិធានគន្លឹះក្នុងវិស័យអប់រំ ដែលដាក់ចេញដោយសម្តេចមហាបវរធិបតី ក្នុងគោលដៅពង្រឹងគុណភាពអប់រំចាប់ពីមត្តេយ្យសិក្សាដល់មធ្យមសិក្សា ព្រោះកម្លាំងយុវជន និងកុមារជាកម្លាំងចលករមិនអាចខ្វះបាន និងជាកម្លាំងបន្តវេន ដែលជាមូលដ្ឋានគ្រឹះ នៃភាពរីកចម្រើនសេដ្ឋកិច្ច និងសង្គមជាតិ។ ការយកចិត្តទុកដាក់យ៉ាងខ្លាំងក្លាលើយុវជន និងកុមារស្របតាមគោលនយោបាយជាតិ ស្តីពីការសិក្សាពេញមួយជីវិតដែលមានចក្ខុវិស័យអភិវឌ្ឍប្រជាជនគ្រប់រូបឱ្យមានវិជ្ជា សម្បទា បំណិនសម្បទា ចរិយាសម្បទា និងកាយសម្បទា ដើម្បីរួមចំណែកបង្កើនសេដ្ឋកិច្ច និងលើកកម្ពស់សុខដុមជីវិតបុគ្គល គ្រួសារ និងសង្គមតាមរយៈការផ្តល់ឱកាសសិក្សាពេញមួយជីវិតគ្រប់ពេលវេលា គ្រប់ទីកន្លែង និងគ្រប់មធ្យោបាយ។ ទន្ទឹមគ្នានេះ ការអប់រំបំណិនជីវិត ជាការរួមចំណែកយ៉ាងសំខាន់សម្រាប់សិស្សានុសិស្ស ដែលជាវ័យមួយត្រូវការការអភិវឌ្ឍខ្លាំងខាងផ្នែកបញ្ញារាងកាយ ផ្លូវចិត្ត និងសមត្ថភាព ។

ក្នុងឱកាសនោះ លោកជំទាវ គឹម សុភ័ក្រ បាននាំយកអំណោយជាសម្ភារ និងថវិកា ចែកជូនក្មួយៗសរុបចំនួន ៧៣៩នាក់ ក្នុងម្នាក់ទទួលបានកាបូបស្ពាយ១ បន្ទាត់១ ខ្មៅដៃ១ ប្រដាប់ចិតខ្មៅដៃ១ សៀវភៅ ១ក្បាល បិច១ ច្រាសដុះធ្មេញ១ ទឹកសុទ្ធ១ដប និងថវិកា ៥ ០០០រៀល ដោយឡែកលោកគ្រូ អ្នកគ្រូចំនួន៣៤នាក់ ម្នាក់ទទួលបានថវិកា ៣ម៉ឺនរៀល៕

ដោយ ងូ សុមុនី