AKP បន្ទាយមានជ័យ ថ្ងៃទី០៣ ខែកក្កដា ឆ្នាំ២០២៥ -- ឯកឧត្តម អ៊ុ រាត្រី អភិបាលខេត្តបន្ទាយមានជ័យ នៅថ្ងៃទី០៣ ខែកក្កដា ឆ្នាំ២០២៥ បានចេញមុខអំពាវនាវយ៉ាងទទូចបន្ថែមទៀតដល់បងប្អូនពលករខ្មែរដែលកំពុងបម្រើការងារនៅប្រទេសថៃ និងមានបំណងវិលត្រឡប់មកកាន់មាតុភូមិវិញ ត្រូវតែធ្វើដំណើរឆ្លងដែនតាមច្រកផ្លូវការតែប៉ុណ្ណោះ ដើម្បីធានាសុវត្ថិភាពផ្ទាល់ខ្លួន និងទទួលបានការរៀបចំស្វាគមន៍សមរម្យពីសំណាក់អាជ្ញាធរខេត្ត។ ការអំពាវនាវនេះធ្វើឡើងក្នុងបរិបទដែលប្រទេសថៃបានបិទច្រកព្រំដែនទាំងអស់ដោយឯកតោភាគីនោះ។

ឯកឧត្តមអភិបាលខេត្តបានបញ្ជាក់ថា សម្រាប់ភូមិសាស្ត្រខេត្តបន្ទាយមានជ័យ មានច្រកផ្លូវការចំនួន៣ ដែលបានត្រៀមខ្លួនរួចជាស្រេចសម្រាប់ទទួលពលករខ្មែរវិលត្រឡប់មកវិញ រួមមានច្រកអន្តរជាតិប៉ោយប៉ែត ច្រកតំបន់ម៉ាឡៃ និងច្រកតំបន់បឹងត្រកួន។

ឯកឧត្តមបានបន្តថា រដ្ឋបាលខេត្តបានរៀបចំក្រុមការងារចម្រុះប្រចាំការ២៤ម៉ោងលើ២៤ម៉ោង នៅតាមច្រកផ្លូវការទាំងនេះ ដើម្បីត្រៀមទទួលបងប្អូនពលករ។ ក្រុមការងារនឹងផ្តល់ជូននូវអាហារ ទឹកពិសា និងរៀបចំមធ្យោបាយដឹកជញ្ជូនដោយរថយន្តរដ្ឋបាលខេត្ត ទៅកាន់ភូមិស្រុកកំណើតរបស់បងប្អូនដោយឥតគិតថ្លៃ ដែលសកម្មភាពនេះកំពុងដំណើរការទាំងយប់ទាំងថ្ងៃ។

ជាមួយគ្នានេះដែរ ឯកឧត្តមអភិបាលខេត្តក៏បានក្រើនរំលឹកដល់បងប្អូនពលករទាំងអស់សូមកុំចាញ់បោកមេខ្យល់ដែលតែងតែបោកប្រាស់នាំទៅតាមច្រករបៀងខុសច្បាប់ ដែលមិនត្រឹមតែបាត់បង់ថវិកាផ្ទាល់ខ្លួនប៉ុណ្ណោះទេ ថែមទាំងប្រឈមនឹងគ្រោះថ្នាក់ និងគ្មានសុវត្ថិភាពទៀតផង។ ការវិលត្រឡប់មកតាមច្រកផ្លូវការ គឺជាមធ្យោបាយល្អបំផុតដើម្បីធានាបានទាំងសុវត្ថិភាព ទាំងការសម្របសម្រួលពីសំណាក់រដ្ឋបាលខេត្ត និងកាត់បន្ថយហានិភ័យផ្សេងៗដែលបងប្អូនអាចជួបប្រទះ៕

ដោយ ឈុន សារ៉ាត