AKP ភ្នំពេញ ថ្ងៃទី០២ ខែកក្កដា ឆ្នាំ២០២៥--

ក្រុមជម្រើសជាតិនារីហ្វីលីពីនត្រូវបានគេមើលឃើញថា ជាក្រុមមានគុណភាពបច្ចេកទេសខ្លាំងលេចធ្លោជាងគេ ក្នុងចំណោម៤ក្រុមក្នុងពូល G គឺក្រុមម្ចាស់ផ្ទះ កម្ពុជា អារ៉ាប់ប៊ីសាអូឌីត និងក្រុមហុងកុង នៃវគ្គជម្រុះ ពានរង្វាន់បាល់ទាត់នារីទ្វីបអាស៊ី (AFC Women's Asian Cup Australia 2026 Qualifiers) ខណៈក្រុមហ្វីលីពីន ត្រូវប្រកួតជាមួយក្រុមកម្ពុជា ម៉ោង៧យប់ថ្ងៃទី០២ ខែកក្កដានេះ។

បច្ចុប្បន្ន ក្រុមនារីហ្វីលីពីន ស្ថិតនៅក្នុងចំណាត់ថ្នាក់ពិភពលោក (Women’s World Ranking) លេខ៤១ ក្រុមនារីកម្ពុជា មានចំណាត់ថ្នាក់ពិភពលោក ១១៨ ក្រុមហុងកុង ឈរលេខ ៨០ ខណៈអារ៉ាប់ប៊ីសាអូឌីត ឈរនៅចំណាត់ថ្នាក់លេខ ១៦៥។ នៅក្នុងការប្រកួតវគ្គជម្រុះ ពូល G AFC Women's Asian Cup ដំណើរការប្រកួតពីថ្ងៃទី២៩ ខែមិថុនា ដល់ថ្ងៃទី០៥ ខែកក្កដា ឆ្នាំ២០២៥ ដែលកម្ពុជាធ្វើម្ចាស់ផ្ទះ នៅពហុកីឡដ្ឋានជាតិអូឡាំពិក រាជធានីភ្នំពេញ។ ឆ្លងកាត់១ប្រកួតដូចៗគ្នា គឺក្រុមហ្វីលីពីន រកបាន៣ពិន្ទុ បន្ទាប់ពីបានយកឈ្នះក្រុមអារ៉ាប់ប៊ីសាអូឌីត ៣-០ ខណៈម្ចាស់ផ្ទះកម្ពុជា និងហុងកុង ចែកគ្នាម្នាក់១ពិន្ទុ ក្រោយរក្សាបានលទ្ធផលស្មើគ្នា ១-១ កាលពីថ្ងៃទី២៩ ខែមិថុនា ឆ្នាំ២០២៥។

សម្រាប់៤ប្រកួតចុងក្រោយ ក្នុងពូល G នេះ ថ្ងៃទី០២ ខែកក្កដានេះ គឺក្រុមអារ៉ាប់ប៊ីសាវអូឌីត ប៉ះ ហុងកុង វេលាម៉ោង៤ល្ងាច ខណៈម្ចាស់ផ្ទះ កម្ពុជា ត្រូវប្រជែងជាមួយក្រុមខ្លាំង ហ្វីលីពីន នៅវេលាម៉ោង ៧:០០ យប់នេះ។ រីឯ ២ប្រកួតទៀត នាថ្ងៃទី០៥ ខែកក្កដា ឆ្នាំ២០២៥ គឺហ្វីលីពីន ប៉ះ ហុងកុង វេលាម៉ោង ៤ល្ងាច ខណៈក្រុមម្ចាស់ផ្ទះ កម្ពុជា ប្រកួតប្រជែងជាមួយក្រុម អារ៉ាប់ប៊ីសាអូឌីត នាវេលាម៉ោង ៧:០០ យប់។ 

គួរបញ្ជាក់ថា ការប្រកួតកីឡាបាល់ទាត់នារី ពានរង្វាន់ទ្វីបអាស៊ី នៅប្រទេសអូស្ត្រាលី ឆ្នាំ២០២៦ (ជុំផ្តាច់ព្រ័ត្រ) AFC Women's Asian Cup Australia 2026 Qualifiers គឺមាន៣៤ក្រុមចូលរួមត្រូវបានបែងចែកជា៨ពូល ក្នុងនោះមានតែពូល A និងB ប៉ុណ្ណោះ ដែលមាន៥ក្រុមដូចៗគ្នា ខណៈ៦ពូលផ្សេងទៀតមាន៤ក្រុមស្មើៗគ្នា។ បន្ទាប់ពីមានការប្រកួតប្រជែងបានបញ្ចប់នៃពូលទាំង៨ គឺក្រុមចំណាត់ថ្នាក់លេខ១នៃពូលទាំង៨ ស្មើនឹង៨ក្រុម (១ពូលយកតែ១ក្រុម ចំណាត់ថ្នាក់លេខ១) នឹងបានឡើងទៅប្រកួតនៅជុំផ្តាច់ព្រ័ត្រ នៅប្រទេសអូស្រ្តាលី នាឆ្នាំ២០២៦ ជាមួយ៤ក្រុមដែរឈររង់ចាំនៅជុំផ្តាច់ព្រ័ត្រ (សរុប ១២ក្រុម) គឺម្ចាស់ផ្ទះ អូស្រ្តាលី (ជុំផ្តាច់ព្រ័ត្រ ឆ្នាំ២០២៦) ចិន កូរ៉េខាងត្បូង និងជប៉ុន ដែលក្រុមចិន ជាក្រុមជើងឯក កូរ៉េខាងត្បូង ជើងឯករង និងជប៉ុន ចំណាត់ថ្នាក់លេខ៣ ក្នុងព្រឹត្តិការណ៍ដូចគ្នា កាលពីឆ្នាំ២០២២ កន្លងទៅ៕

ដោយ ហេង ណាលីន (រូបភាព៖ FFC និង CPL)