AKP ភ្នំពេញ ថ្ងៃទី០១ ខែកក្កដា ឆ្នាំ២០២៥--

ឯកឧត្ដម ទេព អស្នារិទ្ធ អនុរដ្ឋលេខាធិការ និងជាអ្នកនាំពាក្យក្រសួងព័ត៌មានបានថ្លែងបញ្ជាក់ថា គណៈកម្មការប្រឆាំងព័ត៌មានក្លែងក្លាយនៃក្រសួងព័ត៌មាន ក្នុងឆមាសទី១ ឆ្នាំ២០២៥ នេះ បានកត់ត្រា ព័ត៌មានក្លែងក្លាយ ចំនួនប្រមាណ ១ ៨០០ ករណី ខណៈត្រីមាសទី២ បានឃើញចំនួនព័ត៌មានក្លែង ក្លាយ​មានការកើនឡើងជាពិសេសលើប្រធានស្តីពីព្រំដែន ក្នុងស្ថានភាពនៃជម្លោះព្រំដែនកម្ពុជា-ថៃ បាន​កើតឡើងចាប់តាំងពីចុងខែឧសភា រហូតមក។ ឯកឧត្ដមបានលើកឡើងថា ចំនួនព័ត៌មានក្លែងក្លាយពាក់​ព័ន្ធតែ​នឹងប្រធានបទព្រំដែនកម្ពុជា-ថៃនេះ ដែលគណៈកម្មការបានកត់ត្រាទុក មានចំនួនដល់ ​ជាង​១៨០ករណី ក្នុងត្រីមាសទី២ ឆ្នាំ២០២៥នេះ។ ឯកឧត្ដមអ្នកនាំពាក្យរូបនេះបានមានប្រសាសន៍ថា៖ «នេះជាចំនួនព័ត៌មានក្លែងក្លាយស្តីពីប្រធានព្រំដែន ដែលមានចំនួនខ្ពស់ដែលពុំធា្លប់ត្រូវបាន​កត់ត្រា​ទុកពីមុនមកទេ ក្នុងចំណោមព័ត៌មានក្លែងក្លាយទាំងនេះ ក៏មានប្រភេទព័ត៌មានក្លែងក្លាយ ដែលត្រូវ​បាន​គេបង្កើតឡើងដោយប្រើប្រាស់បច្ចេកវិទ្យា Ai រួមមានទាំង​ការក្លែងសំឡេងរបស់ថ្នាក់ដឹកនាំកម្ពុជា ស្ថាប័ន​រដ្ឋ ឯកជន ពលរដ្ឋ និងការក្លែងរូបភាពផ្សេងៗ​មួយចំនួន​ទៀត សរុបប្រមាណជាង១០ករណី ដែលត្រូវ​បានគេយកទៅប្រើប្រាស់ក្នុងគោលបំណង​ក្លែងបន្លំបោក​ប្រាស់ ឬកេងចំណេញផ្នែកសេដ្ឋកិច្ច នយោបាយ ព្រមទាំងមួយចំនួនទៀតបានធ្វើឱ្យប៉ះពាល់ដល់សិទ្ធិ កិត្តិយសរបស់ថ្នាក់ដឹកនាំ ឯកជនភាព និងសេចក្តី​ថ្លៃថ្នូរ​ពលរដ្ឋដទៃផ្សេងទៀតផងដែរ»។

ឯកឧត្ដមអ្នកនាំពាក្យបានគូសបញ្ជាក់ឱ្យដឹងដែរថា ក្នុងវិបត្តិ​ព្រំដែនកម្ពុជាថៃ មានការចែកចាយ និងផ្សាយ​ព័ត៌​​មានក្លែងក្លាយស្ទើររាល់ថ្ងៃ ជាពិសេសលើបណ្តាញ​សង្គម និងមានប្រភពពីក្រៅប្រទេស ដោយសារ​សារ​ព័ត៌មាន និងអ្នកបង្កើតបង្កើតមាតិកា បណ្តាញសង្គម​មួយចំនួនដែលផ្សាយពីក្រៅប្រទេស រួមទាំងពី​ក្នុង​​ប្រទេស​ថៃផង ពុំបានគោរពនិយាម វិជ្ជាជីវៈសារ​ព័ត៌មាន គ្មានគុណធម៌ក្នុងការអនុវត្តអាជីព​សារព័ត៌​មាន បានប្រព្រឹត្តទង្វើបំពានក្រមសីលធម៌ ដែលធ្វើ​ឱ្យបាត់តម្លៃ លែងសាកសមនឹងឈ្មោះ និងកេរ្តិ៍ឈ្មោះ​ខ្លួន​​ដែលគេធា្លប់ឱ្យតម្លៃពីមុនមកឡើយ។ ឯកឧត្ដមបានអះអាងថា ទាំងនោះគឺដោយសារតែសារព័ត៌មាន និង​អ្នកបង្កើតបង្កើតមាតិកាជ្រុលនិយមទាំងនោះបានក្បត់នឹងមនសិកាវិជ្ជាជីវៈខ្លួន ហើយពុំបានផ្តល់​សុចរិត​​ភាព តម្លាភាព ភាពឥតលម្អៀង និងតុល្យភាពព័ត៌មាន ដល់ការផលិត និងការផ្សាយរបស់ខ្លួន​ឡើយ។ ប៉ុន្តែផ្ទុយទៅវិញបានប្រើសារព័ត៌មានជាឧបករណ៍សម្រាប់ បម្រើឱ្យនយោបាយក្រុមជ្រុលនិយម​មួយ​ចំនួន ដែលមិនស្រឡាញ់សន្តិភាព ឬព្យាយាមគេចវេសពីផ្លូវច្បាប់/ច្បាប់ អន្តជាតិក្នុងការដោះស្រាយ​វិបត្តិព្រំដែន​រវាង​ប្រទេសនិងប្រទេស ដែលនេះគឺបានធ្វើឱ្យខូចតម្លៃសារ ព័ត៌មានអាជីពទាំងក្នុងប្រទេស​ខ្លួន ក្នុងតំបន់ និងលើសកលោក។

ឯកឧត្ដមអនុរដ្ឋលេខាធិការ និងជាអ្នកនាំពាក្យក្រសួងព័ត៌មានបានបញ្ជាក់បន្ថែមថា កម្ពុជាបានទទួលរង​គ្រោះ និងប្រឈមនឹងផលវិបាកចេញពីទង្វើអសីលធម៌ គ្មានវិជ្ជាជីវៈទាំងនេះ ពោលគឺប៉ះពាល់ដល់ការកិច្ច​ខិតខំរបស់រាជរដ្ឋាភិបាលកម្ពុជា ក្នុងការអនុវត្តយន្តការដោះស្រាយវិបត្តិ ដែលកំពុងស្មុគស្មាញស្រាប់ ឱ្យ​កាន់តែមានភាពតានតឹងឡើង ប៉ះពាល់ដល់ការគ្រប់គ្រង ដំណើរការប្រក្រតីភាព និងជាពិសេសដល់​ជីវភាពនិងការរស់នៅប្រចាំថ្ងៃទាំងរបស់ពលរដ្ឋកម្ពុជា ក៏ដូចជាពលរដ្ឋនិងវិស័យជាច្រើន​ក្នុងប្រទេស(ថៃ)​ខ្លួន។ ជាងនេះទៅទៀត ការចែកចាយ និងផ្សាយព័ត៌មានដែលគ្មានប្រភពច្បាស់លាស់ ឬស្រង់ពីប្រភព​បំផ្លើស បំភ្លៃ គ្មានក្រមសីលធម៌ វាបានជះឥទ្ធិពលអាក្រក់ដល់ និងអាចបង្កមហន្តរាយដល់សន្តិសុខជាតិ បង្កហានិភ័យនិងគ្រោះថ្នាក់ដល់មន្ត្រីដែលអនុវត្តច្បាប់ ឬត្រូវបំពេញបេសកកម្មរបស់ខ្លួនក្នុង​ការការពារ​ដែនសីមា ក៏ដូចជាបង្កអរិភាព ការរើសអើងនានា ប៉ះពាល់ដល់ទំនាក់ទំនងរវាងប្រទេស និងប្រទេស​ខណៈ​វិបត្តិកំពុងបន្តកើតមាន។

បើតាមឯកឧត្ដមអ្នកនាំពាក្យក្រសួងព័ត៌មាន អ្នកសារព័ត៌មានគ្រប់រូបទាំងក្នុងនិងក្រៅប្រទេស ក្នុងអំឡុង​ពេលនៃវិបត្តិបែបនេះ ត្រូវដើរតួនាទីសំខាន់ខ្លាំងឡើងក្នុងការធានាថាការផ្សព្វផ្សាយព័ត៌មានរបស់ខ្លួន មិន​បង្កឱ្យមានការភាន់ច្រឡំដល់សាធារណៈជនកម្ពុជា និងថៃ ដោយត្រូវធានាតុល្យភាពព័ត៌មាន ផ្តល់ព័ត៌​មាន​គ្រប់ជ្រុងជ្រោយ ដាច់ខាតមិនត្រូវប្រើអារម្មណ៍ផ្ទាល់ខ្លួន ឬស្រង់សំដីក្រឡិចក្រឡុច ឬដកស្រង់ពាក្យ​ចចាមអារាម ដើម្បីធ្វើការរាយការណ៍ព័ត៌មានរបស់ខ្លួនឡើយ ព្រោះវាជាទង្វើប្រាសចាកក្រមសីល​ធម៌​វិជ្ជាជីវៈ។ «អ្នកសារព័ត៌មានត្រូវចូលរួមធ្វើឱ្យស្ថានភាពវិបត្តិឈានទៅរកភាពប្រក្រតីវិញ ដោយត្រូវរាយ​ការណ៍ដោយឈរលើភាពសុចរិត ស្មោះត្រង់ ភាពត្រឹមត្រូវ មិនលម្អៀង ត្រូវផ្សាយដោយស្រង់ព័ត៌មានពី​ប្រភព​ផ្លូវការរបស់ក្រសួង សា្ថប័ន និងសមត្ថកិច្ចពាក់ព័ន្ធ និងជៀសវាងការផ្សព្វផ្សាយពាក្យចចាមអារាម ឬការនិយាយ/ចែកចាយតៗគ្នា ឬការស្មានៗ ដោយគ្មានប្រភពច្បាស់លាស់ ជាពិសេសនៅពេលរាយ​ការណ៍​ព័ត៌មានពាក់ព័ន្ធនឹងការងារសន្តិសុខជាតិ កងទ័ព ឬការសម្ងាត់ផ្នែកយោធា។ ការរាយការណ៍​ទាំងអាជីព និងមិនមែនអាជីព ត្រូវធ្វើឡើងដោយមានទំនួលខុសត្រូវខ្ពស់ ដើម្បីចូលរួមក្នុងការធានា​សណ្តាប់​ធ្នាប់ ស្ថិរភាពនិងសន្តិសុខសង្គម ដោយចៀសវាងការបំផ្លើស បំភ្លៃ ឬការកាឡៃព័ត៌មាន​ប្រាស​ចាកពីការពិត។» នេះគឺជាការលើកឡើងបន្ថែមរបស់ឯកឧត្ដម ទេព អស្នារិទ្ធ អនុរដ្ឋលេខាធិការ និងជា​អ្នកនាំពាក្យក្រសួងព័ត៌មាន។

ជាមួយគ្នានេះដែរ ឯកឧត្ដម ទេព អស្នារិទ្ធ ក៏សូមអំពាវនាវដល់អ្នកសារព័ត៌មាន អ្នកព័ត៌មានអាជីព មិនមែនអាជីព អ្នកចែកចាយព័ត៌មានលើបណ្តាញសង្គម ឱ្យបង្កើនការទទួលខុសត្រូវក្នុងការផ្សព្វផ្សាយ ចែកចាយព័ត៌មាន ដោយជានិច្ចជាកាលត្រូវប្រកាន់ខ្ជាប់នូវក្រមសីលធម៌វិជ្ជាជីវៈ និងត្រូវមានមនសិកា​ទទួលខុសត្រូវ ស្រឡាញ់ប្រទេសជាតិ ប្រជាជន និងត្រូវចូលរួមតម្កល់ប្រយោជន៍​ជាតិជាធំក្នុងស្ថាន​ភាព​វិបត្តិដូចនេះ ដោយត្រូវគិតគូរដល់ផលប៉ះពាល់ដែលអាចកើតមានឡើង និងផលវិបាកក្នុងរយៈពេលវែង​ចេញពីការរាយការណ៍ទាំងនោះ ប្រសិនវាជាព័ត៌មានក្លែងក្លាយ ឬការបំភ្លៃការពិត៕

ដោយ៖ រិទ្ធី