AKP ភ្នំពេញ ថ្ងៃទី២៩ ខែមិថុនា ឆ្នាំ២០២៥--ឧបនាយករដ្ឋមន្ត្រី រដ្ឋមន្ត្រីក្រសួងមុខងារសាធារណៈ ឯកឧត្តម ហ៊ុន ម៉ានី បានថ្លែងថា៖ «កីឡាជាស្ពានដ៏សំខាន់ ក្នុងការរក្សាទំនាក់ទំនងល្អរវាងប្រជាជន និងប្រជាជន ក្នុងតំបន់អាស៊ីអាគ្នេយ៍ឱ្យកាន់តែមានភាពស្និទ្ធស្នាល តាមរយៈការលេងកីឡា និងការផ្លាស់ប្តូរវប្បធម៌ប្រពៃណីរវាងគ្នាទៅវិញទៅមក»។

ការថ្លែងរបស់ឯកឧត្តមឧបនាយករដ្ឋមន្ត្រីបានធ្វើឡើងក្នុងឱកាសបើកជាផ្លូវការ ការប្រកួតកីឡាតេក្វាន់ដូ ITF ជើងឯកអាស៊ីអាគ្នេយ៍ លើកទី២ ពីថ្ងៃទី២៨-៣០ ខែមិថុនា ឆ្នាំ២០២៥ នៅវិមានពហុកីឡដ្ឋានជាតិអូឡាំពិក រាជធានីភ្នំពេញ។ ពិធីបើកផ្លូវការនៃព្រឹត្តិការណ៍នេះមានការអញ្ជើញចូលរួមពីឯកឧត្តមទេសរដ្ឋមន្ត្រី កែវ រ៉េមី ប្រធានសហព័ន្ធកីឡាតេក្វាន់ដូអាស៊ីអាគ្នេយ៍ និងជាប្រធានសហព័ន្ធកីឡាតេក្វាន់ដូ ITF កម្ពុជា លោក Ri Yong Son ប្រធានសហព័ន្ធកីឡាតេក្វាន់ដូ ITF អន្តរជាតិ ព្រមទាំងគណៈប្រតិបត្តិសហព័ន្ធកីឡាតេក្វាន់ដូ ITFកម្ពុជា អង្គទូតនានា កីឡាករ កីឡាការិនីមកពីបណ្តាប្រទេសក្នុងតំបន់អាស៊ីអាគ្នេយ៍ ចំនួន៧ប្រទេស។

ឯកឧត្តមឧបនាយករដ្ឋមន្ត្រី ហ៊ុន ម៉ានី មានប្រសាសន៍ថា ព្រឹត្តិការណ៍ប្រកួតកីឡាមិនត្រឹមតែជាការប្រកួតប្រជែង ដើម្បីដណ្តើមជ័យលាភីប៉ុណ្ណោះទេ ប៉ុន្តែក៏ជាវេទិកាដ៏សំខាន់ សម្រាប់ការបណ្តុះសីលធម៌ វិន័យ និងស្មារតី ទទួលខុសត្រូវខ្ពស់។ តាមរយៈការប្រកួតប្រជែងដោយយុត្តិធម៌ យើងរៀនសូត្រពីការគោរពគ្នា ការទទួលស្គាល់សមត្ថភាពអ្នកដទៃ និងការចេះអត់ធ្មត់ក្នុងការតស៊ូ។ ទាំងនេះ គឺជាគុណតម្លៃដ៏ថ្លៃថ្លា ដែលកីឡាបានផ្តល់ជូនយើងម្នាក់ៗ។

សង្កត់ធ្ងន់បន្ថែមពីនេះ ឯកឧត្តមឧបនាយករដ្ឋមន្ត្រីក៏បានឱ្យដឹងថា ៖«សហគមន៍កីឡាបានរួមចំណែកដល់ការពង្រឹងសហគមន៍ ផ្សារភ្ជាប់ភាពខុសគ្នា និងបណ្តុះវប្បធម៌នៃការចូលរួមជាមួយគ្នា ដោយមិនគិតពីភាសា ជាតិសាសន៍ ពណ៌សម្បុរ ឬសាវតា ប៉ុន្តែផ្តោតជាភាសារួមគ្នានៃការខិតខំប្រឹងប្រែងការងារជាក្រុម និងការគោរពគ្នាទៅវិញទៅមក។ ក្នុងន័យនេះ កីឡាជាស្ពានដ៏សំខាន់ ក្នុងការរក្សាទំនាក់ទំនង ល្អរវាងប្រជាជន និងប្រជាជន ក្នុងតំបន់អាស៊ីអាគ្នេយ៍ ឱ្យកាន់តែមានភាពស្និទ្ធស្នាល តាម រយៈការលេងកីឡា និងការផ្លាស់ប្តូរវប្បធម៌ប្រពៃណីរវាងគ្នាទៅវិញទៅមក»។

«លើសពីនេះ កីឡាបានរួមចំណែកដល់ការរក្សាបានកម្លាំងកាយរឹងមាំ និងលើកកម្ពស់សុខុមាលភាព ដែលជាកត្តាដ៏សំខាន់នៃផលិតភាពពលកម្ម និងភាពរឹងមាំនៃសេដ្ឋកិច្ចជាតិ។ ប្រជាពលរដ្ឋដែលមានសុខភាពល្អ គឺជាប្រជាពលរដ្ឋដែលមានគំនិតច្បាស់លាស់ មានភាពងាយស្រួលក្នុងការចាប់យកចំណេះដឹង និងបច្ចេកវិទ្យាថ្មីៗ មានការតាំងចិត្ត និងក្តីសង្ឃឹមខ្ពស់ ក្នុងការបង្កើនធនធានមនុស្សប្រកបដោយគុណភាព ដើម្បីបម្រើការអភិវឌ្ឍប្រទេសជាតិ»។ ឯកឧត្តមបានលើកឡើងបន្ថែម។ 

គួរបញ្ជាក់ថា ក្នុងនាមជាម្ចាស់ការប្រកួតកីឡាតេក្វាន់ដូ ITF ជើងឯកអាស៊ីអាគ្នេយ៍លើកទី២ ឆ្នាំ២០២៥ កម្ពុជាកំពុងក្តោបក្តាប់ម្ចាស់ដំណែងចំណាត់ថ្នាក់លេខ១ក្នុងតារាងមេដាយ ដោយអត្តពលិកកម្ពុជា ឈ្នះមេដាយសរុប ៤២គ្រឿង (មាស ១៩ ប្រាក់ ១៨ និងសំរឹទ្ធ៥) ស្មើនឹង ៤៩%, ម៉ាឡេស៊ី ឈរចំណាត់ថ្នាក់លេខ២ មេដាយសរុប ២២គ្រឿង (មាស ៥ ប្រាក់៥ និងសំរឹទ្ធ១២) ស្មើនឹង ២៦%, សិង្ហបុរី លេខ៣ មេដាយសរុប ៣ (ប្រាក់១ និងសំរឹទ្ធ២) ស្មើ៣%, វៀតណាម លេខ៤ មេដាយសំរឹទ្ធ១៥គ្រឿង, ហ្វីលីពីន មេដាយសំរឹទ្ធ៤គ្រឿង ខណៈឥណ្ឌូណេស៊ី មិនទាន់ទទួលបានមេដាយនៅឡើយ។ នេះជាតារាងមេដាយបណ្តោះអាសន្ន គិតត្រឹមម៉ោង ៩:៣០ ព្រឹកថ្ងៃទី២៩ ខែមិថុនានេះ ខណៈវិញ្ញាសាជាច្រើនទៀតកំពុងដំណើរការប្រកួតយ៉ាងសកម្មនៅក្នុងថ្ងៃនេះ និងថ្ងៃស្អែកជាថ្ងៃបិទបញ្ចប់ការប្រកួតផ្លូវការ៕

ដោយ ហេង ណាលីន