AKP ភ្នំពេញ ថ្ងៃទី១៦ ខែឧសភា ឆ្នាំ២០២៥--

សារមន្ទីរឧក្រិដ្ឋកម្មប្រល័យពូជសាសន៍ទួលស្លែង ឬសារមន្ទីរទួលស្លែង ឬគុកទួលស្លែង (ស២១) គឺជាទីតាំងមួយសម្រាប់ការចងចាំចំពោះអំពើប្រល័យពូជសាសន៍នៅកម្ពុជា។ គុកទួលស្លែងនេះ ត្រូវបានរៀបចំឡើងដោយពួកខ្មែរក្រហមពេលឡើងកាន់អំណាចនៅថ្ងៃ១៧ មេសា ឆ្នាំ១៩៧៥ ដោយប្រែក្លាយពីសាលាបឋមសិក្សាទួលស្លែង និងវិទ្យាល័យទួលស្វាយព្រៃ មកជាកន្លែងឃុំឃាំង សួរចម្លើយ និងធ្វើទារុណកម្មយ៉ាងសាហាវព្រៃផ្សៃបំផុត និងសម្លាប់ក្រោយពេលបានបំពេញសំណុំឯកសារសេចក្ដីសារភាពចប់សព្វគ្រប់។

គុកទួលស្លែង ត្រូវបានគ្រប់គ្រងដោយ កាំង ហ្កេកអ៊ាវ ហៅ ឌុច ដែលជាមេដឹកនាំជាន់ខ្ពស់មួយរូបក្នុងរបបខ្មែរក្រហម ចាប់ពីឆ្នាំ១៩៧៥ ដល់ឆ្នាំ១៩៧៩ ដោយមានអ្នកទោសយ៉ាងហោចណាស់ជាង ១០ ០០០នាក់ ត្រូវបានចាប់ខ្លួន និងឃុំឃាំងនៅទីនេះ ហើយក្នុងចំណោមអ្នកទោសទាំងអស់ គឺមានតែ១២នាក់ប៉ុណ្ណោះ ដែលបានរួចផុតជីវិតពីការសម្លាប់។

រូបថត៖ AKP