AKP ភ្នំពេញ ថ្ងៃទី២៤ ខែមេសា ឆ្នាំ២០២៥--សហព័ន្ធកីឡាបាល់ទាត់កម្ពុជា (FFC) បានប្រកាសនៅព្រឹកថ្ងៃទី២៤ ខែមេសានេះថា ក្រុមជម្រើសជាតិកម្ពុជានឹងត្រូវប្រកួតជាមួយក្រុមជម្រើសជាតិតាហ្ស៊ីគីស្ថាន (Tajikistan) ក្នុងជំនួបមិត្តភាពអន្តរជាតិ វឌ្ឍនៈ (Vattanac International Friendly) ដែលនឹងប្រព្រឹត្តទៅនៅថ្ងៃព្រហស្បតិ៍ ទី០៥ ខែមិថុនា ឆ្នាំ២០២៥ នៅពហុកីឡដ្ឋានជាតិអូឡាំពិក។

បន្ទាប់ពីក្រុមបាល់ទាត់កម្ពុជាប្រកួតមិត្តភាពអន្តរជាតិចំនួន២ប្រកួត នៅដើមឆ្នាំ២០២៥ជាមួយក្រុមជម្រើសជាតិវៀតណាម និងក្រុមជម្រើសជាតិអារូបា នាពេលកន្លងមក (ក្នុងលទ្ធផល ១-២ ដូចគ្នា) ដោយចាញ់ទាំងពីរប្រកួតនោះ គឺក្រុមកម្ពុជានឹងត្រូវដកស្រង់បច្ចេកទេសជាថ្មីជាមួយក្រុមជម្រើសជាតិតាហ្ស៊ីគីស្ថាន ដែលស្ថិតក្នុងទ្វីបអាស៊ីកណ្តាល។ បច្ចុប្បន្ន ក្រុមជម្រើសជាតិកម្ពុជា ស្ថិតនៅចំណាត់ថ្នាក់ពិភពលោកលេខ ១៨១ ខណៈចំណាត់ថ្នាក់ពិភពលោករបស់ក្រុមជម្រើសជាតិ តាហ្ស៊ីគីស្ថាន ស្ថិតនៅលេខរៀង ១០៤។

បច្ចុប្បន្ន ក្រុមជម្រើសជាតិកម្ពុជាមានកីឡាករចូលសញ្ជាតិខ្មែរចំនួន៥រូប ដែលកំពុងប្រកបអាជីព ក្នុងក្របខណ្ឌលីគកំពូលកម្ពុជា នៅតាមបណ្តាក្លឹបមួយចំនួន។ ពេលនេះ លោក Koji Gyotoku គ្រូបង្គោលជម្រើសជាតិកម្ពុជាមិនទាន់កោះហៅកីឡាករប្រមូលផ្តុំហ្វឹកហាត់ត្រៀមនៅឡើយទេ ខណៈកីឡាករបរទេសចូលសញ្ជាតិខ្មែរ៥នាក់ មានដូចជាកីឡាករ យូដាយ អូហ្គាវ៉ា (ជប៉ុន), កាន់ ម៉ូ (អាហ្វ្រិកខាងត្បូង), នីអេតូ រ៉ុនដុន (កូឡុំប៊ី), តាកាគោ អូសិ (ជប៉ុន) និងគូលីបាលី (កូតឌីវ័រ) ដែលធ្លាប់ចូលរួមជួយពង្រឹងក្រុមកម្ពុជាជាមួយនឹងកីឡាករខ្មែរ ក្នុងការប្រកួតអន្តរជាតិ កន្លងមក៕

ដោយ ហេង ណាលីន (រូបភាព៖ FFC)