AKP ភ្នំពេញ ថ្ងៃទី១៧ ខែកុម្ភៈ ឆ្នាំ២០២៥ -- ឯកឧត្តម នូ ស៊ីថា តំណាងដ៏ខ្ពង់ខ្ពស់សម្ដេចមហាបវរធិបតី ហ៊ុន ម៉ាណែត នាយករដ្ឋមន្ដ្រី នៃព្រះរាជាណាចក្រកម្ពុជា និងឯកឧត្តម ឧត្តមសេនីយ៍ឯក អ៊ុង មុន្នី សមាជិកគណៈអចិន្ត្រៃយ៍សមាគមអតីតយុទ្ធជនកម្ពុជា និងជាអនុរដ្ឋលេខាធិការក្រសួងការពារជាតិ  និងលោកឧកញ៉ា ជា គារ កាលពីថ្ងៃទី១៦ ខែកុម្ភៈ ឆ្នាំ២០២៥ បានអញ្ជើញដឹកនាំក្រុមការងារសាងសង់ចុះត្រួតពិនិត្យទីតាំងសម្រាប់សាងសង់ទីស្នាក់ការសមាគមអតីតយុទ្ធជនខេត្តប៉ៃលិន ស្ថិតក្នុងសង្កាត់ទួលល្វា ក្រុងប៉ៃលិន ដែលជាអំណោយដ៏ថ្លៃថ្លារបស់សម្ដេចមហាបវរធិបតី ហ៊ុន ម៉ាណែត ផ្ដល់ជូនសមាគមអតីតយុទ្ធជនកម្ពុជា តាមរយៈ លោកឧកញ៉ា ជា គារ លើផ្ទៃដីទំហំ៣០ម៉ែត្រគុណនឹង៧០ម៉ែត្រ។

ក្នុងឱកាសចុះត្រួតពិនិត្យនេះ ឯកឧត្តម នូ ស៊ីថា បានមានប្រសាសន៍ថា សម្តេចអគ្គមហាសេនាបតីតេជោ ហ៊ុន សែន ប្រធានព្រឹទ្ធសភានៃព្រះរាជាណាចក្រកម្ពុជា និងជាប្រធានសមាគមអតីតយុទ្ធជនកម្ពុជា និងសម្តេចកិត្តិព្រឹទ្ធបណ្ឌិត ប៊ុន រ៉ានី ហ៊ុន សែន ព្រមទាំងសម្ដេចមហាបវរធិបតី ហ៊ុន ម៉ាណែត នាយករដ្ឋមន្ដ្រីនៃព្រះរាជាណាចក្រកម្ពុជា និងលោកជំទាវ តែងតែបានយកចិត្តទុកដាក់ខ្ពស់ចំពោះបងប្អូនដែលជាអតីតយុទ្ធជន ប្រកបដោយមនោសញ្ចេតនាស្រឡាញ់រាប់អាន ជាពិសេសតែងបានគោរពចំពោះវិញ្ញាណក្ខន្ធរបស់យុទ្ធជន យុទ្ធនារី និងប្រជាជនកម្ពុជា ដែលបានពលីជីវិតដើម្បីបុព្វហេតុជាតិមាតុភូមិ និងប្រជាជន  ដោយសម្តេចតេជោបានចាត់ទុកការលះបង់ និងគុណបំណាច់ដ៏មានតម្លៃធំធេងទាំងនេះគឺតែងស្ថិតនៅក្នុងការចងចាំរបស់ប្រជាជន និងយុវជនកម្ពុជាគ្រប់ៗជំនាន់ ដោយមិនអាចបំភ្លេចបានទ្បើយ។

ទន្ទឹមនឹងនេះ ឯកឧត្តមបានជំរុញឱ្យក្រុមការងារសាងសង់ទីស្នាក់ការសមាគមអតីតយុទ្ធជនខេត្តប៉ៃលិនយកចិតទុកដាក់ខ្ពស់ក្នុងការសាងសង់ឱ្យត្រូវតាមបទដ្ឋានបច្ចេកទេសទាំងគុណភាព និងសោភ័ណភាព និងអាចរួចរាល់ទៅតាមផែនការដែលបានគ្រោងទុក ដើម្បីឱ្យសមាគមមានកន្លែងសមរម្យសម្រាប់ការបំពេញកិច្ចការប្រចាំថ្ងៃរបស់ខ្លួនបម្រើឱ្យផលប្រយោជន៍ដល់បងប្អូនអតីតយុទ្ធជននៅក្នុងខេត្តប៉ៃលិននេះទាំងមូលឱ្យស័ក្តិសមនឹងគុណបំណាច់របស់ពួកគាត់ដែលមានចំពោះជាតិ និងប្រជាជន ដោយនៅក្នុងគ្រប់ដំណាក់កាលនៃប្រវត្តិសាស្ត្រកន្លងមកនេះ អតីតយុទ្ធជនបានធ្វើពលិកម្មយ៉ាងអង់អាចក្លាហាន និងប្រកបដោយទឹកចិត្តស្នេហាជាតិ បានបូជាសាច់ស្រស់ ឈាមស្រស់ ដើម្បីប្តូរយកសន្តិភាព និងភាពសុខសាន្តជូនជាតិមាតុភូមិ និងប្រជាជនកម្ពុជា ក្នុងនោះសម្តេចតេជោ ហ៊ុន សែន និងថ្នាក់ដឹកនាំគណបក្សប្រជាជនកម្ពុជា គឺជាអ្នកបញ្ចប់សង្គ្រាម និងប្រឆាំងសង្គ្រាម ដោយបានងើបតស៊ូរំដោះប្រទេសចេញពីរបបប្រល័យពូជសាសន៍ និងបានដាក់ចេញនូវនយោបាយឈ្នះ-ឈ្នះ រហូតប្រទេសជាតិមានសុខសន្តិភាពពេញលេញ និងភាពសុខសាន្តសម្បូរសប្បាយរុងរឿងដូចពេលបច្ចុប្បន្ន ហើយថា  រាជរដ្ឋាភិបាលដឹកនាំដោយគណបក្សប្រជាជនកម្ពុជាតែងបានយកចិត្តទុកដាក់លើសុខុមាលភាព និងការលើកកម្ពស់តួនាទីរបស់អតីតយុទ្ធជន គឺសំដៅដល់ការលើកកម្ពស់តួនាទីរបស់អតីតយុទ្ធជនក្នុងការបន្តកសាង និងអភិវឌ្ឍន៍ជាតិ៕

ដោយ៖ ចាន់ សុភឿន