AKP កំពង់ធំ ថ្ងៃទី១៥ ខែកុម្ភៈ ឆ្នាំ២០២៥--

នៅបញ្ជាការដ្ឋានកងរាជអាវុធហត្ថខេត្តកំពង់ធំកាលពីថ្ងៃទី១៤ ខែកុម្ភៈ ឆ្នាំ២០២៥ លោកឧត្តមសេនីយ៍ត្រី មាស យ៉ត មេបញ្ជាការកងរាជអាវុធហត្ថខេត្តកំពង់ធំ បានអញ្ជើញដឹកនាំកិច្ចប្រជុំបូកសរុបសភាពការណ៍ ការអនុវត្តតួនាទីភារកិច្ចកងរាជអាវុធហត្ថ ប្រចាំខែកុម្ភៈ និងទិសដៅបន្តខែមីនា ឆ្នាំ២០២៥ ដោយមានការអញ្ជើញចូលរួមពីលោក លោកស្រី មេបញ្ជាការរងខេត្ត នាយសេនាធិការរងប្រធាន-អនុប្រធានមន្ទីរ នាយការិយាល័យប្រធានអង្គភាព មេបញ្ជាការមូលដ្ឋានកងរាជអាវុធហត្ថក្រុង/ស្រុកទាំង៩និងលោកមេបញ្ជាការកងអនុសេនាធំចល័តផងដែរ។ 

លោកឧត្តមសេនីយ៍ត្រី មាស យ៉ត បានផ្សព្វផ្សាយផែនការការពារសន្តិសុខ សុវត្ថិភាព តម្រាយផ្លូវ សម្រួលចរាចរណ៍ក្នុងពិធីចែកអំណោយជូនដល់លោកគ្រូ អ្នកគ្រូសិស្សានុសិស្សនៅស្រុកតាំងគោកខេត្តកំពង់ធំដើម្បីការពារសុវត្ថិភាពនៅក្នុងមូលដ្ឋានព្រមទាំងបានណែនាំ និងដាក់បទបញ្ជាដល់នាយទាហាន នាយទាហានរងគ្រប់ជំនាញបណ្ដាក្រុង/ស្រុកត្រូវយកចិត្តទុកដាក់ខ្ពស់អនុវត្តតួនាទីភារកិច្ចចូលរួមក្នុងការបង្ក្រាបបទល្មើសនានា ជាពិសេសបញ្ហាគ្រឿងញៀន ក្មេងទំនើង បទល្មើសធនធានធម្មជាតិ។ 

ចូលរួមសម្រួលចរាចរណ៍ពេលសិស្សឆ្លងផ្លូវ និងចូលរួមសហការការពារធានាសន្តិសុខសុវត្ថិភាពជូនថ្នាក់ដឹកនាំជាន់ខ្ពស់ដែលអញ្ជើញមកក្នុងពិធីនាពេលខាងមុខធានាឱ្យបាននូវសុខសុវត្ថិភាព៕ 

ដោយ ស៊ុម វណ្ណា (ប្រភព៖ កងរាជអាវុធហត្ថខេត្តកំពង់ធំ)