AKP ព្រះសីហនុ ថ្ងៃទី១៥ ខែកុម្ភៈ ឆ្នាំ២០២៥--

គណបក្សប្រជាជនកម្ពុជាខេត្តព្រះសីហនុបានបើកកិច្ចប្រជុំជីវភាពប្រចាំខែមករា និងផ្សព្វផ្សាយលទ្ធផលសន្និបាតគណៈកម្មាធិការកណ្ដាលលើកទី៤៥ អាណត្តិទី៥ របស់គណបក្សប្រជាជនកម្ពុជា ដោយមានការចូលរួមពីសមជិក សមាជិការមកពីក្រុង ស្រុកទាំង៥ នាព្រឹកថ្ងៃសៅរ៍ ទី១៥ ខែកុម្ភៈ ឆ្នាំ២០២៥។

ឯកឧត្តម ម៉ាង ស៊ីណេត ប្រធានគណៈកម្មាធិការកណ្តាល និងជាប្រធានគណបក្សប្រជាជនកម្ពុជាខេត្តព្រះសីហនុ បានបើកកិច្ចប្រជុំផ្សព្វផ្សាយពីស្ថានភាពទូទៅ ក្រោមការដឹកនាំរបស់គណបក្សប្រជាជនកម្ពុជា ក៏ដូចជាក្រោមឆ័ត្ររាជរដ្ឋាភិបាលកម្ពុជា និងស្របតាមគោលនយោបាយរបស់គណបក្សដែលជាយុទ្ធសាស្ត្ររបស់គណបក្សកម្ពុជា ស្របតាមចក្ខុវិស័យវែងឆ្ងាយយូរអង្វែងជំរុញកំណើនសេដ្ឋកិច្ចកម្ពុជា។ ក្រោមការដឹកនាំរបស់សម្តេចព្រះនរោត្តម សីហនុ ព្រះបរមរតនកោដ្ឋ ព្រះបីតាឯករាជ្យជាតិខ្មែរ បានទាមទារឯករាជ្យពីអណានិគមនិយមបារាំង ធ្វើឱ្យប្រទេសកម្ពុជាទទួលបានឯករាជ្យពេញលេញ។ ក៏ប៉ុន្តែឆ្នាំ១៩៧០ កម្ពុជាធ្លាក់ក្នុងសង្គ្រាមផ្ទៃក្នុងរហូតដល់ថ្ងៃ២ ធ្នូ ១៩៧៨ បង្កើតរណសិរ្សសាមគ្គីសង្គ្រោះជាតិ បន្តរំដោះប្រទេសជាតិចេញពីរបបប្រល័យពូជសាសន៍នៅថ្ងៃ៧ មករា ១៩៧៩ ក៏ប៉ុន្តែកម្ពុជានៅតែមិនទាន់បានបញ្ចប់សង្គ្រាមទាំងស្រុងនោះទេ ធ្វើឱ្យកម្ពុជាបាត់បង់ធនធានមនុស្ស និងបញ្ញវន្តអស់ជាច្រើន។

ឯកឧត្តមប្រធានបានបញ្ជាក់ថា ក្រោយថ្ងៃ៧មករា ប្រជាជនកម្ពុជាមានសិទ្ធិសេរីភាព ក៏ប៉ុន្តែសង្គ្រាមផ្ទៃក្នុងនៅតែកើតមាន ក្នុងពេលនោះរាជរដ្ឋាភិបាលដៃម្ខាងខិតខំទប់ស្កាត់ការវិលត្រឡប់នៃរបបប្រល័យពូជសាសន៍ ដៃម្ខាងខិតខំកសាងប្រទេសដូចជា ការសាងសង់សាលារៀន មន្ទីរពេទ្យ និងហេដ្ឋារចនាសម្ព័ន្ធនានានៅទូទាំងប្រទេសឡើងវិញ។ សម្តេចតេជោ ហ៊ុន សែន អតីតនាយករដ្ឋមន្ត្រី បានដាក់ចេញនូវគោលនយោបាយឈ្នះឈ្នះនៅថ្ងៃទី២៩ ខែធ្នូ ឆ្នាំ១៩៩៨ ធ្វើឱ្យកម្ពុជាទទួលសន្តិភាពពេញលេញលើផ្ទៃប្រទេស។ កត្តាសុខសន្តិភាពធានាដល់ដំណើរការអភិវឌ្ឍសេដ្ឋកិច្ច សង្គម ការរស់នៅដ៏សុខដុមរបស់ប្រជាជននៅក្រោមម្លប់សន្តិភាពរបស់រាជរដ្ឋាភិបាលនីតិកាលទី៧ នៃរដ្ឋសភា លទ្ធិប្រជាធិបតេយ្យ និងនីតិរដ្ឋនៅកម្ពុជាត្រូវបានការពារយ៉ាងរឹងមាំ និងបានកំពុងបន្តអភិវឌ្ឍឥតឈប់ឈរដែលបានធានាដល់ការពង្រឹងសន្តិភាព សណ្ដាប់ធ្នាប់សាធារណៈ ការអភិវឌ្ឍសេដ្ឋកិច្ច សង្គម និងការគោរពសិទ្ធសេរីភាពគ្រប់យ៉ាងរបស់ប្រជាពលរដ្ឋ។ ពិសេសដំណើរការ នៃការកែទម្រង់ និងការពង្រឹងអភិបាលកិច្ចដែលត្រូវបានយកចិត្តទុកដាក់ ជំរុញអនុវត្តស្របតាមអភិក្រម " ឆ្លុះកញ្ចក់ ងូតទឹក ដុះក្អែលព្យាបាល និងវះកាត់ "ធ្វើឱ្យមានសន្ទុះរីកចម្រើនថ្មីៗថែមទៀតក្នុងគ្រប់ការដ្ឋាននៃការកែទម្រង់ ស្របតាមការអនុវត្តវិធានការគន្លឹះទាំង៥ ធ្វើឱ្យមានវឌ្ឍនភាពគួរឱ្យកត់សម្គាល់ក្នុងការកសាងរដ្ឋបាលសាធារណៈប្រកបដោយសមត្ថភាព និងភាពស្អាតស្អំ។ 

ដើម្បីធានាការអនុវត្តដោយជោគជ័យ រាជរដ្ឋាភិបាលបានដាក់ចេញនូវកម្មវិធីនយោបាយ និងយុទ្ធសាស្ត្របញ្ចកោណដំណាក់កាលទី១ នៃរដ្ឋសភា ដើម្បីកំណើនការងារ សមធម៌ ប្រសិទ្ធភាព និងជីរភាពដែលមានការកែទម្រង់ និងការពង្រឹងអភិបាលកិច្ចជាស្នូល និងមានអាទិភាពគន្លឹះ៥ គឺ "មនុស្ស ផ្លូវ ទឹក ភ្លើង និងបច្ចេកវិទ្យា" សំដៅជំរុញសន្ទុះកំណើនសេដ្ឋកិច្ចធ្វើឱ្យប្រទេសកម្ពុជាប្រែក្លាយជាប្រទេសមានចំណូលមធ្យមកម្រិតខ្ពស់នៅឆ្នាំ២០៣០ ជាប្រទេសមានចំណូលខ្ពស់ឆ្នាំ២០៥០។ ៤៦ឆ្នាំកន្លងមកនេះ គណបក្សប្រជាជនកម្ពុជាមានលទ្ធភាពពេញលេញក្នុងការដឹកនាំបម្រើជាតិ និងប្រជាជនប្រកបដោយជោគជ័យ ឈានឆ្ពោះទៅអនាគតរុងរឿងលើមាគ៌ាសន្តិភាព ប្រជាធិបតេយ្យ នីតិរដ្ឋ និងការអភិវឌ្ឍ៕

ដោយ ងូ សុមុនី