AKP ភ្នំពេញ ថ្ងៃទី១២ ខែកុម្ភៈ ឆ្នាំ២០២៥–ឯកឧត្តមបណ្ឌិត អ៊ាង សុផល្លែត រដ្ឋមន្រ្តីក្រសួងបរិស្ថាន បានផ្តួចផ្តើមឱ្យមានការរៀបចំពិធីបុណ្យកោងកាង ដែលគ្រោងនឹងប្រព្រឹត្តទៅនៅចុងខែកុម្ភៈ ឆ្នាំ២០២៥ នៅខេត្តកោះកុង ដែលជាផ្នែកមួយនៃយុទ្ធនាការ «ពន្លកបៃតង» ក្រោមការចង្អុលបង្ហាញពីសំណាក់សម្តេចមហាបវរធិបតី ហ៊ុន ម៉ាណែត នាយករដ្ឋមន្រ្តីនៃព្រះរាជាណាចក្រកម្ពុជា ក្នុងគោលបំណង ថែរក្សាប្រព័ន្ធអេកូឡូស៊ីឆ្នេរ និងជីវៈចម្រុះ តាមរយៈការដាំស្តារព្រៃកោងកាង និងការពង្រីកវិសាលភាពបៃតងឈានឆ្ពោះទៅជាប្រទេសអព្យាក្រឹតកាបូននៅឆ្នាំ២០៥០។ ឯកឧត្តមបណ្ឌិត អ៊ាង សុផល្លែត ថ្លែងឡើងយ៉ាងដូច្នេះ នៅក្នុងជំនួបសម្តែងការគួរសម និងពិភាក្សាការងារ ដើម្បីទទួលបានអនុសាសន៍ណែនាំពីឯកឧត្តមរដ្ឋមន្រ្តី ដែលដឹកនាំក្រុមការងារដោយ លោក ម៉េង ហេង ប្រធានអង្គការមេត្តាធម្មជាតិ នៅរសៀលថ្ងៃទី ១១ ខែកុម្ភៈ ឆ្នាំ២០២៥ នាទីស្តីការក្រសួងបរិស្ថាន។

ស្របនឹងអនុសាសន៍ណែនាំរបស់ឯកឧត្តមរដ្ឋមន្រ្តី លោក ម៉េង ហេង ប្រធានអង្គការមេត្តាធម្មជាតិ និងក្រុមការងារ បានប្តេជ្ញាចិត្តខ្ពស់ក្នុងការរួមចំណែកជាមួយយុទ្ធនាការ «ពន្លកបៃតង» របស់ក្រសួងបរិស្ថាន នឹងបន្តការដាំដុះកូនកោងកាងជាមួយប្រជាសហគមន៍ក្នុងដែនសមុទ្រឱ្យបានកាន់តែច្រើន ស្របតាមយុទ្ធសាស្រ្តចក្រាវិស័យបរិស្ថានដែលបានដាក់ចេញ គឺការបណ្តុះកូនឈើ ចែកកូនឈើ និងដាំកូនឈើច្រើនជាង ១លានដើមក្នុង១ឆ្នាំ ដែលកូនកោងកាងទាំងនេះ គឺជាចំណែកក្នុងការផ្តល់ជម្រកដល់សត្វមានជីវិតនៅក្នុងទឹកដូចជា ត្រី ក្តាម និងបង្គារជាដើម។ ជាមួយគ្នានេះ ធនធានត្រី ក្តាម បង្គារ នឹងក្លាយជាចំណែកនៃប្រាក់ចំណូលរបស់ប្រជាសហគមន៍ក្នុងដែនសមុទ្រផង និងឱ្យពួកគាត់មានត្រី សាច់សម្រាប់បរិភោគផង លើសពីនេះ ក៏អាចធ្វើជាម្ហូបអារហារលក់ជូនភ្ញៀវទេសចរណ៍ជាតិ និងអន្តរជាតិផង ខណៈពួកគេទៅលេងកម្សាន្តនៅតាមតំបន់ទាំងនោះ។ 

ឯកឧត្តមបណ្ឌិត អ៊ាង សុផល្លែត បានគូសបញ្ជាក់បន្ថែមថា ក្រសួងបរិស្ថានផ្តល់ការគាំទ្រយ៉ាងពេញទំហឹងលើសកម្មភាពទាំងនេះ ជាពិសេសដំបូងត្រូវអប់រំ និងពន្យល់ណែនាំដល់ប្រជាសហគមន៍ទាំងអស់ ឱ្យយល់អំពីសារៈសំខាន់នៃការរួមចំណែកក្នុង យុទ្ធនាការពន្លកបៃតង តាមរយៈការចូលរួមក្នុងការអភិរក្សធនធានធម្មជាតិ និងដាំដុះកូនកោងកាងដ៏មានតម្លៃនេះ ហើយនឹងផ្តល់ឱ្យពួកគាត់នូវភាពជាម្ចាស់ ក្លាយជាសហគ្រិនភាព អាចបន្តគ្រប់គ្រងសហគមន៍ដោយនិរន្តភាព និងជាប្រយោជន៍សម្រាប់មនុស្សជាតិ និងអ្នកជំនាន់ក្រោយរបស់កម្ពុជា។ ឯកឧត្តមរដ្ឋមន្រ្តីក៏បានជូនពរដល់ក្រុមការងារលោក ម៉េង ហេង ប្រធានអង្គការមេត្តាធម្មជាតិ ឱ្យការដំណើរការប្រព្រឹត្តពិធីបុណ្យកោងកាងនេះ ទទួលបានជោគជ័យ និងលទ្ធផលជាផ្លែផ្កា។ 

សូមជម្រាបជូនថា ព្រៃកោងកាងមិនត្រឹមតែជាជម្រកដ៏សំខាន់សម្រាប់ជីវៈចម្រុះប៉ុណ្ណោះទេ ប៉ុន្តែក៏ជាខែលការពារធម្មជាតិដ៏រឹងមាំ ពីគ្រោះមហន្តរាយធម្មជាតិ និងការប្រែប្រួលអាកាសធាតុផងដែរ។ ដូច្នេះ ការដាំស្តារព្រៃកោងកាងឡើងវិញ គឺជាការវិនិយោគដ៏សំខាន់សម្រាប់អនាគត និងជាការចូលរួមចំណែកក្នុងការសម្រេចបាននូវគោលដៅអភិវឌ្ឍន៍ប្រកបដោយចីរភាពរបស់ប្រទេសកម្ពុជា៕

ដោយ៖ គង់ សិរីរ័ត្ន, ប្រភព៖ ក្រសួងបរិស្ថាន