AKP ភ្នំពេញ ថ្ងៃទី១២ ខែកុម្ភៈ ឆ្នាំ២០២៥--

ឯកឧត្តមទេសរដ្ឋមន្ត្រី លី ធុជ អនុប្រធានទី១ អាជ្ញាធរមីន បានអញ្ជើញដឹកនាំកិច្ចប្រជុំគណៈកម្មាធិការសម្របសម្រួលសកម្មភាពកម្ចាត់មីន (MACC) ដោយមានការចូលរួមពីប្រតិបត្តិករបោសសម្អាតមីន រួមមាន បញ្ជាការដ្ឋានកងទ័ពជើងគោក មជ្ឈមណ្ឌលជាតិរក្សាសន្តិភាព អង្គភាពស៊ីម៉ាក់ អង្គការ HALO Trust, MAG, NPA, CSHD, APOPO និងមជ្ឈមណ្ឌលតំបន់អាស៊ានសម្រាប់សកម្មភាពមីន (ARMAC) នារសៀលថ្ងៃទី១២ ខែកុម្ភៈ ឆ្នាំ២០២៥ នៅទីស្នាក់ការអាជ្ញាធរមីនកម្ពុជា។

ក្នុងនាមតំណាងសម្តេចមហាបវរធិបតី ហ៊ុន ម៉ាណែត នាយករដ្ឋមន្រ្តី និងជាប្រធានអាជ្ញាធរមីន ឯកឧត្តមទេសរដ្ឋមន្រ្តី លី ធុជ បានថ្លែងអំណរគុណដល់គ្រប់ប្រតិបត្តិករបោសសម្អាតមីនជាតិ-អន្តរជាតិ ចំពោះកិច្ចខិតខំប្រឹងប្រែង និងការពលីគ្រប់បែបយ៉ាងក្នុងការដោះស្រាយបញ្ហាមីន និងសំណល់ជាតិផ្ទុះពីសង្រ្គាមនៅកម្ពុជា ជាពិសេសទទួលបានជោគជ័យយ៉ាងត្រចះត្រចង់ក្នុងការអនុវត្តផែនការយុទ្ធសាស្រ្តជាតិសកម្មភាពមីន ២០១៨-២០២៥ ដែលបាននាំមកនូវសមិទ្ធផលយ៉ាងធំធេងសម្រាប់វិស័យសកម្មភាពមីននៅកម្ពុជា ដែលជាកត្តាមួយដ៏សំខាន់ក្នុងការរួមចំណែកជំរុញកំណើនសេដ្ឋកិច្ចជាតិ និងកាត់បន្ថយភាពក្រីក្រ។ ជាក់ស្តែងឆ្នាំ២០២៤ កន្លងនេះ ផ្ទៃដីមានមីន និងសំណល់ជាតិផ្ទុះពីសង្រ្គាមចំនួន ២៧៣ គីឡូម៉ែត្រក្រឡា ត្រូវបានបោសសម្អាតរួច ដោយរកឃើញ និងបំផ្លាញចោលមីនប្រឆាំងមនុស្សចំនួនប្រមាណជាង១,៧ ម៉ឺនគ្រាប់ មីនប្រឆាំងរថក្រោះជាង២០០គ្រាប់ និងសំណល់ជាតិផ្ទុះពីសង្គ្រាមចំនួនជាង៩ម៉ឺនគ្រាប់ ហើយអត្រាគ្រោះថ្នាក់បានធ្លាក់ចុះគួរឱ្យកត់សម្គាល់។

ឯកឧត្តម លី ធុជ បានបញ្ជាក់ថា ការងារចំពោះមុខក្នុងឆ្នាំ២០២៥ និងជាឆ្នាំចុងក្រោយនៃការអនុវត្តផែនការយុទ្ធសាស្រ្តជាតិសកម្មភាពមីន ២០១៨-២០២៥ កម្ពុជាបាន និងកំពុងរៀបចំកំណត់នូវគោលដៅថ្មី «ឆ្ពោះទៅរកកម្ពុជាមួយគ្មានផលប៉ះពាល់ដោយសារមីន និងសំណល់ជាតិផ្ទុះពីសង្គ្រាម» ដើម្បីអាចធានាបាននូវការរស់នៅរបស់ប្រជាពលរដ្ឋ និងការអភិវឌ្ឍជាតិប្រព្រឹត្តទៅបានប្រកបដោយសុវត្ថិភាពខ្ពស់គ្រប់ទីកន្លែង។ ដើម្បីគាំទ្រដល់គោលដៅថ្មីនេះ អាជ្ញាធរមីនកំពុងរៀបចំនូវឯកសារគោលសំខាន់មួយ គឺសេចក្តីព្រាងនៃគោលនយោបាយជាតិសកម្មភាពមីន (NMAP) ២០២៦-២០៣៥ និងកំពុងប្រមូលធាតុចូលជាបន្តបន្ទាប់ពីគ្រប់ភាគីពាក់ព័ន្ធ ដោយឈរលើមូលដ្ឋាននៃការវិវត្តសកម្មភាពមីននាពេលបច្ចុប្បន្ន និងរួមបញ្ចូលគ្នាទាំងគោលនយោបាយបាយ និងយុទ្ធសាស្ត្រ ក្នុងឯកសារតែមួយ។

ទន្ទឹមនឹងនេះ ឯកឧត្តម លី ធុជ បានថ្លែងអំណរគុណចំពោះប្រតិបត្តិករបោសសម្អាតមីនទាំងអស់ ដែលបានគាំទ្រដល់ភាពជាប្រធាន និងជាម្ចាស់ផ្ទះរបស់កម្ពុជា ក្នុងការរៀបចំកិច្ចប្រជុំត្រួតពិនិត្យឡើងវិញលើកទី៥ នៃអនុសញ្ញាអូតាវ៉ា ឬ «កិច្ចប្រជុំកំពូលសៀមរាប-អង្គរ ស្តីពីពិភពលោកមួយដែលគ្មានមីន» ដោយទទួលបានជោគជ័យយ៉ាងត្រចះត្រចង់។ ដោយមើលឃើញពីករណីគ្រោះថ្នាក់ចំពោះអ្នកដោះមីននាដើមឆ្នាំ២០២៥ ឯកឧត្តមបណ្ឌិត លី ធុជ បានជំរុញឱ្យអង្គភាពដោះមីនទាំងជាតិ-អន្តរជាតិ ត្រូវពង្រឹងការអនុវត្តវិធានការដែលមានស្រាប់ដល់ប្រតិបត្តិករដោះមីនទាំងអស់ ដើម្បីឱ្យមានការប្រុសប្រយ័ត្នខ្ពស់ និងចៀសវាងកុំឱ្យមានឧបទ្ទេវហេតុគ្រោះថ្នាក់ណាមួយ៕

ដោយ សួស សំរិត