AKP ភ្នំពេញ ថ្ងៃទី១២ ខែកុម្ភៈ ឆ្នាំ២០២៥--

ឯកឧត្តម ជា វ៉ាន់ដេត រដ្ឋមន្រ្តីក្រសួងប្រៃសណីយ៍ និងទូរគមនាគមន៍ បានអញ្ជើញចូលរួមជាវាគ្មិនក្នុងកិច្ចពិភាក្សាកម្រិតរដ្ឋមន្រ្តី ស្តីពីការវាយតម្លៃភាពរួចរាល់ផ្នែកសីលធម៌បញ្ញាសិប្បនិម្មិត (AI Ethics Readiness Assessment Methodology - RAM) កាលពីថ្ងៃទី១១ ខែកុម្ភៈ ឆ្នាំ២០២៥ ដែលរៀបចំដោយអង្គការយូណេស្កូ ក្រោមប្រធានបទ “ការរៀបចំបញ្ញាសិប្បនិម្មិតសម្រាប់សកលលោក និងរៀបចំសកលលោកសម្រាប់បញ្ញាសិប្បនិម្មិត” (Preparing AI for the World. Prepare the World for AI) ក្នុងអំឡុងពេលនៃកិច្ចប្រជុំកំពូលស្តីពីបញ្ញាសិប្បនិម្មិត។

ក្នុងបទអន្តរាគមន៍នៃកិច្ចពិភាក្សានេះ ឯកឧត្តមរដ្ឋមន្រ្តីបានចែករំលែកអំពីដំណើរការនៃការធ្វើបរិវត្តកម្មឌីជីថលនៅកម្ពុជា ជាពិសេសការចាប់យកនិងការប្រើបាស់បច្ចេកវិទ្យាឈានមុខថ្មីៗ ជាពិសេសបច្ចេកវិទ្យាបញ្ញាសិប្បនិម្មិត និងបានបញ្ជាក់អំពីបទពិសោធន៍របស់កម្ពុជា ដោយផោ្តតលើកត្តាសំខាន់ៗចំនួន ៣ គឺ៖ ទី១. ឆន្ទៈនយោបាយ និងការកំណត់អាទិភាពលើការអភិវឌ្ឍបច្ចេកវិទ្យារបស់រដ្ឋាភិបាល ទី២. បរិយាបន្ន និងភាពជាម្ចាស់របស់គ្រប់តួអង្គ ក្នុងការរៀបចំនិងការអនុវត្តគោលនយោបាយ និងយុទ្ធសាស្រ្តអភិវឌ្ឍបញ្ញាសិប្បនិម្មិត និងទី៣. ការសម្រេចចិត្តនិងការរៀបចំគោលនយោបាយ និងយុទ្ធសាស្រ្តដោយផ្អែកលើទិន្នន័យ និងការប្រើប្រាស់ឧបករណ៍វាយតម្លៃភាពរួចរាល់ផ្នែកសីលធម៌បញ្ញាសិប្បនិម្មិតរបស់អង្គការយូណេស្កូ។

កិច្ចពិភាក្សានេះមានគោលបំណងចែករំលែកឧត្តមានុវត្តន៍ យុទ្ធសាស្រ្ត គោលនយោបាយ និងបទពិសោធល្អៗ ព្រមទាំងពង្រឹងកិច្ចសហប្រតិបត្តិការក្នុងការធ្វើអភិបាលកិច្ចបញ្ញាសិប្បនិម្មិត ក្នុងចំណោមប្រទេសដែលចូលរួមក្នុងដំណើរការនៃការវាយតម្លៃភាពរួចរាល់ផ្នែកសីលធម៌បញ្ញាសិប្បនិម្មិតរបស់អង្គការយូណេស្កូ។ កិច្ចពិភាក្សាទទួលបានការចូលរួមពីរដ្ឋមន្រ្តីទទួលបន្ទុកវិស័យឌីជីថល ស្ថានតំណាងអចិន្រ្តៃយ៍ប្រចាំអង្គការយូណេស្កូ តំណាងក្រសួងស្ថាប័ន ក្រុមហ៊ុនបច្ចេកវិទ្យាធំៗ គ្រឹះស្ថានស្រាវជ្រាវ និងអង្គការអន្តរជាតិ៕

ដោយ ណយ នឿន (ប្រភព៖ ក្រសួងប្រៃសណីយ៍)