AKP ភ្នំពេញ ថ្ងៃទី១០ ខែកុម្ភៈ ឆ្នាំ២០២៥-- លោក សែម សំណាង ប្រធាននាយកដ្ឋានទឹកស្អាត និងអនាម័យ និងជាប្រធានគ្រប់គ្រងកម្មវិធីការគ្រប់គ្រងធនធានទឹក និងការផ្លាស់ប្តូរកសិកម្មនៅប្រទេសកម្ពុជា WAT4CAM ជំហានទី១ ក្នុងនាមតំណាងឯកឧត្តម ថោ ជេដ្ឋា រដ្ឋមន្ត្រីក្រសួងធនធានទឹក និងឧតុនិយម បានអញ្ជើញអមដំណើរលោកស្រី Alexia HOFMANN ប្រធានក្រុមបេសកកម្មទីភ្នាក់ការងារបារាំងសម្រាប់អភិវឌ្ឍន៍(AFD) ចុះពិនិត្យវឌ្ឍនភាពការអនុវត្តកម្មវិធីការគ្រប់គ្រងធនធានទឹក និងការផ្លាស់ប្តូរកសិកម្មនៅប្រទេសកម្ពុជា WAT4CAM ជំហានទី១ នៅក្នុងខេត្តបាត់ដំបង និងព្រះវិហារ កាលពីថ្ងៃទី០៧ ដល់ថ្ងៃទី០៩ ខែកុម្ភៈ ឆ្នាំ២០២៥។

ក្នុងដំណើរចុះបេសកកម្មនេះក៏មានការចូលរួមពីឯកឧត្តម ស្រ៊ុន សុខុម នាយកតំណាងសមាសភាគទី៤ នៃក្រសួងកសិកម្ម រុក្ខាប្រមាញ់ និងនេសាទ រួមទាំងទីប្រឹក្សាបច្ចេកទេសជាតិ-អន្តរជាតិ (TA-INFRA TA-ISWM&TA-AGRI) តំណាងមន្ទីរធនធានទឹក និងឧតុនិយមខេត្តបាត់ដំបង ប្រធានមន្ទីរធនធានទឹក និងឧតុនិយមខេត្តព្រះវិហារ និងក្រុមការងារបច្ចេកទេសក្រសួងធនធានទឹក និងឧតុនិយម ក្រសួងកសិកម្ម រុក្ខាប្រមាញ់ និងនេសាទ និងតំណាងសហគមន៍កសិករប្រើប្រាស់ទឹក និងសហគមន៍កសិកម្ម ជាច្រើនរូបផងដែរ។

ក្នុងឱកាសនោះ ក្រុមបេសកកម្មនៃទីភ្នាក់ងារបារាំងសម្រាប់អភិវឌ្ឍន៍(AFD) បានជួបសំណេះសំណាល និងពិភាក្សាជាមួយតំណាងសហគមន៍កសិករប្រើប្រាស់ទឹក និងសហគមន៍កសិកម្ម ដើម្បីស្វែងយល់អំពីការអនុវត្ត និងការយល់ដឹង ក្រោយពីបានឆ្លងកាត់វគ្គបណ្តុះបណ្តាលកសាងសមត្ថភាព ដើម្បីគ្រប់គ្រង និងកិច្ចដំណើរការរបស់សហគមន៍កសិករប្រើប្រាស់ទឹក និងសហគមន៍កសិកម្ម ព្រមទាំងការយល់ដឹងអំពីនីតិវិធីនៃការបង្កើត ការចងក្រង ការរៀបចំផែនការដាំដុះ ផែនការស្រោចស្រព ផែនការថែទាំប្រព័ន្ធ ដើម្បីធានានិរន្តរភាព។

ទន្ទឹមនឹងនេះ ក្រុមបេសកកម្មនៃទីភ្នាក់ងារបារាំងសម្រាប់អភិវឌ្ឍន៍ (AFD) បានផ្តាំផ្ញើដល់សហគមន៍កសិករប្រើប្រាស់ទឹក និងសហគមន៍កសិកម្ម ត្រូវបន្តយកចិត្តទុកដាក់បន្ថែមទៀត និងស្នើសុំឱ្យមានការចូលរួមរបស់អាជ្ញាធរដែនដី ប្រជាពលរដ្ឋ ក្នុងការប្រើប្រាស់ ការថែទាំប្រព័ន្ធធារាសាស្ត្រ និងចូលរួមថែរក្សាសមិទ្ធផលថ្មីនេះឱ្យមាននិរន្តរភាព៕

ដោយ៖ ពេជ្រ សំអឿន (ប្រភព៖ ក្រសួងធនធានទឹក និងឧតុនិយម)