AKP ព្រះសីហនុ ថ្ងៃទី១០ ខែកុម្ភៈ ឆ្នាំ២០២៥-- ឯកឧត្តម ម៉ាង ស៊ីណេត ប្រធានគណៈកម្មាធិការសាខាកាកបាទក្រហមកម្ពុជា ខេត្តព្រះសីហនុ អញ្ជើញចែកអំណោយសង្គ្រោះជូនប្រជាពលរដ្ឋរងគ្រោះខ្យល់កន្ត្រាក់ចំនួន៧៤គ្រួសារ មកពីឃុំចំនួន០២ ក្នុងស្រុកកំពង់សិលា ខេត្តព្រះសីហនុ នៅក្នុងបរិវេណវត្តចំប៉ា ឃុំកំពង់សិលា ស្រុកកំពង់សិលា ខេត្តព្រះសីហនុ ដោយមានការអញ្ជើញចូលរួមពីតំណាងរាស្ត្រមណ្ឌលខេត្តព្រះសីហនុ មន្ត្រីសាខា អ្នកស្ម័គ្រចិត្តសាខា និងសប្បុរសជននារសៀលថ្ងៃអាទិត្យ ទី០៩ ខែកុម្ភៈ ឆ្នាំ២០២៥។

លោក ឆាយ សុគន្ធដា ប្រធានអនុគណៈកម្មការធិការសាខាកាកបាទក្រហមស្រុកកំពង់សិលា បានធ្វើរបាយការណ៍សង្ខេបស្តីពីខ្យល់កន្ត្រាក់កាលពីថ្ងៃទី១១ ដលថ្ងៃទី១៦ ខែមករា ឆ្នាំ២០២៥ ធ្វើឱ្យប៉ះពាល់ដល់ផ្ទះប្រជាពលរដ្ឋក្នុងឃុំចំនួន០២ ចំនួន៧៤គ្រួសាប៉ើងដំបូល ក្នុងនោះមានឃុំស្ទឹងឆាយ១៣គ្រួសារ និងឃុំកំពង់សិលាចំនួន៦១គ្រួសារ។

ឯកឧត្តម ម៉ាង ស៊ីណេត ប្រធានគណៈកម្មាធិការសាខាកាកបាទក្រហមកម្ពុជាខេត្តព្រះសីហនុ បានធ្វើការសំណេះសំណាលជាមួយបងប្អូនប្រជាពលរដ្ឋរងគ្រោះខ្យល់កន្ទ្រាក់ក្នុងឃុំចំនួនពីរ នៃស្រុកកំពង់សិលា ព្រមទាំងបានពាំនាំការសួរសុខទុក្ខ និងសេចក្តីនឹករលឹកពីសម្តេចកិត្តិព្រឹទ្ធបណ្ឌិត ប៉ុន រ៉ានី ហ៊ុន សែន ប្រធានកាកបាទក្រហមកម្ពុជា និងសម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រីនៃព្រះរាជាណាចក្រកម្ពុជា ដែលតែងតែយកចិត្តទុកដាក់ផ្នែកមនុស្សធម៌ និងបានធ្វើការណែនាំឱ្យសាខាខេត្ត យកចិត្តទុកដាក់ដល់បងប្អូនប្រជាពលរដ្ឋរងគ្រោះធម្មជាតិគ្រប់រូបភាព។

ក្នុងឱកាសនោះ ឯកឧត្តមបានសូមការអធ្យាស្រ័យចំពោះបងប្អូនពលរដ្ឋរងគ្រោះខ្យល់កន្ត្រាក់ ព្រោះយើងខ្ញុំមកយឺត ក៏ប៉ុន្តែដោយសារជាប់រវល់ ទើបពេលនេះបាននាំយកអំណោយចែកជូនបងប្តូនប្រជាពលរដ្ឋរងគ្រោះនៅក្នុងស្រុកកំពង់សិលារបស់យើង ព្រមទាំងឆ្លៀតយកឱកាសបានថ្លែងអំណរគុណប្រធានអនុសាខាកាកបាទក្រហមស្រុកកំពង់សិលា មន្ត្រីសាខា និងអ្នកស្ម័គ្រចិត្តរបស់យើងបានចូលរួមយ៉ាងសកម្មគ្រប់សកម្មភាពមនុស្សធម៌ជាស្មារតីទទួលខុសត្រូវ ព្រោះទីណាមានការលំបាក ទីនោះមានកាកបាទក្រហមនៅជាមួយបងប្អូនប្រជាពលរដ្ឋជានិច្ច ដោយមិនប្រកាន់វណ្ណៈ ពូជសាសន៍ ឬគណបក្សនយបាយនោះទេ។ ហើយអំណោយដែលបាននាំយកមកថ្ងៃនេះជួយសម្រួលជីវភាពខ្វះខាតរបស់បងប្អូនបានមួយគ្រា តែមិនអាចជួយបានមួយជីវិតនោះទេ។

ឯកឧត្តមបានបញ្ជាក់ថា រាជរដ្ឋាភិបាលកម្ពុជា ក្រោមការដឹកនាំរបស់សម្តេចមហាបវរធិបតី ហ៊ុន ម៉ាណែត បានដាក់ចេញនូវយុទ្ធសាស្ត្របញ្ចកោណ ដំណាក់កាលទី១ ក្នុងការជំរុញខេត្តព្រះសីហនុ ជាតំបន់សេដ្ឋកិច្ចពិសេសគំរូពហុបំណង និងបានដាក់ចេញនូវគោលនយោបាយលើកទឹកចិត្តជំរុញការវិនិយោគនៅខេត្តព្រះសីហនុ ឆ្នាំ២០២៤ និងបន្ត២០២៥ ក្នុងនោះសម្តេចបានធ្វើការផ្សព្វផ្សាយកម្មវិធីវិនិយោគទៅដល់អ្នកវិនិយោគក្នុង និងក្រៅប្រទេស ស្តីពីការអភិវឌ្ឍន៍ និងស្ថេរភាពនយោបាយរបស់កម្ពុជា ពិសេសគោលនយោបាយយុទ្ធសាស្ត្របញ្ចកោណ ដំណាក់កាលទី១ ដោយផ្តោតសំខាន់ទៅលើ មនុស្ស ផ្លូវ ទឹក ភ្លើង និងបច្ចេកវិទ្យា។

ឯកឧត្តមប្រធានបញ្ជាក់បន្ថែមថា សម្តេចតេជោ ហ៊ុន សែន អតីតនាយករដ្ឋមន្ត្រីកម្ពុជា បានកសាងសាលារៀន មន្ទីរពេទ្យ សាលាបច្ចេកទេសក្នុងការជួយបណ្តុះបណ្តាលដល់យុវជន ដូច្នេះសូមអណាព្យាបាយត្រូវបញ្ចូនកូនចៅទៅរៀន ដើម្បីយកចំណេះដឹង ជំនាញឪ្យបានមួយក្នុងជីវិត សម្រាប់បំរើការងារនៅតាមរោងចក្រ សហគ្រាស ព្រោះកម្ពុជាត្រូវការកម្លាំងពលកម្មដែលមានជំនាញវិជ្ជាជីវ:ស្របតាមបច្ចេកវិទ្យាទំនើបនាពេលបច្ចុប្បន្ន  និងបានធ្វើការណែនាំដល់ស្រ្តីមានផ្ទៃពោះ ត្រូវទៅទទួលសេវាសុខាភិបាលនៅតាមមណ្ឌលសុខភាព ពេលពិនិត្យផ្ទៃពោះទទួលបានថវិកាថែមទៀតផង រហូតកុមារអាយុពីរឆ្នាំ ដើម្បីឪ្យកូនចៅរបស់យើងដែលកើតមកមានសុខភាពល្អ ដែលជាធនធានមនុស្ស និងជាទំពាំងស្នងឬស្សីក្នុងការចូលរួមចំណែកក៏សាង និងអភិវឌ្ឍប្រទេសជាតិ។ ទន្ទឹមនោះយើងជាយុវជនត្រូវដាក់គោលដៅក្នុងការខិតខំសិក្សារៀនសូត្រយកនិទ្ទេស A ឱ្យបាន ព្រោះនៅពេលយើងប្រឡងបាននិទ្ទេស A និងទទួលបានអំណោយពីអាជ្ញាធរខេត្ត និងប្រធានក្រុមការងាររាជរដ្ឋាភិបាលចុះមូលដ្ឋានខេត្តព្រះសីហនុថែមទៀតផង ហើយសិស្សា នុសិស្សនៅស្រុកកំពង់សិលារបស់យើងមានសមត្ថភាពក្នុងការចូលរួមប្រឡងនូវកម្មវិធីផ្សេងៗទទួលបានលទ្ធផលល្អ ហើយអាណាព្យាបាលចង់ឃើញកូន ចៅរបស់ខ្លួនមានអនាគតល្អ ហើយក៏ត្រូវយកចិត្តទុកដាក់អំពីបញ្ហាគ្រុនឈាម សូមចូលរួមកម្ចាត់មូសក្លាទាំងអស់គ្នា ព្រោះរដូវនេះមានមូសច្រើន ត្រូវលុបបំបាត់ថ្លុកនៅជុំវិញផ្ទះ ដូចជាពាងទឹក សំបកកង់ឡាន ម៉ូតូ សំបកដូងជាដើម ដើម្បីកូនចៅរបស់យើងមានសុខភាពល្អ មិនមានជំងឺគ្រុនឈាម គ្រុនឈីក។

អំណោយដែលចែកជូនប្រជាពលរដ្ឋរងគ្រោះខ្យល់កន្ត្រាក់ចំនួន៧៤គ្រួសារ ក្នុងមួយគ្រួសារទទួលបានអង្ករ ២៥គីឡូក្រាម មី១កេស ត្រីខ១០កំប៉ុង ទឹកត្រី១យួរ កន្ទេល១ ឃីតមួយ (សារុង១ ក្រមា១ មុង១ ភួយ១) និងថវិកា ៥០០០០រៀល។  បន្ទាប់មកឯកឧត្តម ក៏បានប្រគេនអង្ករ ៤បាវ មី៤កេស ត្រីខ៤យួរ ទឹកបរិសុទ្ធ៤កេស និងបច្ច័យមួយចំនួន ដល់ព្រះចៅអធិកាវត្តចំប៉ាផងដែរ៕

ដោយ ងូ សុមុនី