AKP ព្រះវិហារ ថ្ងៃទី០៨ ខែកុម្ភៈ ឆ្នាំ២០២៥-- សាខាកាកបាទក្រហមកម្ពុជាខេត្តព្រះវិហារ បានបើកវគ្គបណ្តុះបណ្តាលស្តីអំពី ចំណេះដឹងជាមូលដ្ឋាន ប្រវត្តិចលនា គោលការណ៍គ្រឹះកាកបាទក្រហម អឌ្ឍចន្ទក្រហម វិជ្ជាសង្គ្រោះបឋមកាកបាទក្រហមកម្ពុជា និងផ្សព្វផ្សាយពីការប្រើប្រាស់ថង់ប្លាសស្ទិច សុវត្ថិភាពចរាចរណ៍ ជូនយុវជនកាកបាទក្រហមកម្ពុជាវិទ្យាល័យ ស្រអែមចំនួន៨៥នាក់ ស្រី៥១នាក់ និងយុវជនទើបរើសថ្មីចំនួន៣១នាក់ ស្រី១១នាក់ កាលពីថ្ងៃទី០៧ ខែកុម្ភៈ ឆ្នាំ២០២៥ ស្ថិតនៅភូមិស្រអែមត្បូង ឃុំកន្ទួត ស្រុកជាំក្សាន្ត ខេត្តព្រះវិហារ ក្រោមវត្តមានលោក ហែម ថុន ប្រធានគណៈកម្មាធិការ អនុសាខាកាកបាទក្រហមកម្ពុជា ស្រុកជាំក្សាន្ត។

លោក ហ៊ីម យ័ន្ត នាយកវិទ្យាល័យស្រអែម បានបង្ហាញនូវការសប្បាយរីករាយនិងថ្លែងអំណរគុណដល់សាខាកាកបាទក្រហមកម្ពុជាខេត្តព្រះវិហារ បានចំណាយពេលវេលាដ៏មានតម្លៃចុះមកបើកវគ្គបណ្ដុះបណ្ដាលដ៏មានសារៈសំខាន់ជូនដល់យុវជននៅក្នុងវិទ្យាល័យស្រអែមនាពេលនេះ និងបានជំរុញដល់ប្អូនៗទាំងអស់ត្រូវយកចិត្តទុកដាក់តាមដានស្ដាប់នូវការធ្វើបទបង្ហាញរបស់គ្រូឧទ្ទេសដើម្បីទទួលបាននូវចំណេះដឹងថ្មីល្អៗពីវគ្គបណ្ដុះបណ្ដាលនឹងយកទៅអនុវត្តក្នុងនាមជាយុវជនកាកបាទក្រហមកម្ពុជាឱ្យមានប្រសិទ្ធភាពខ្ពស់ និងចំគោលដៅ។

លោក ហែម ផុន មានប្រសាសន៍លើកឡើងថា វគ្គបណ្ដុះបណ្ដាលនេះពិតជាមានសារៈសំខាន់ខ្លាំងណាស់សម្រាប់ប្អូនៗជាយុវជនកាកបាទក្រហម ជាពិសេសប្អូនៗជាយុវជនដែលទើបរើសបញ្ចូលថ្មីជំនួសឲ្យយុវជនចាស់ដោយបានប្រឡងជាប់ ទៅបន្តការសិក្សានៅឆ្ងាយដើម្បីឱ្យប្អូនៗបានយល់ដឹងអំពីប្រវត្តិគោលការណ៍គ្រឹះចលនាអន្តរជាតិកាកបាទក្រហម អឌ្ឍចន្ទក្រហម តួនាទីរបស់យុវជនកាកបាទក្រហមពិសេសវិជ្ជាសង្គ្រោះបឋម។

លោកបានបន្ថែមទៀតថា ក្នុងនាមជាយុវជនកាកបាទក្រហមត្រូវតែធ្វើខ្លួនជាគំរូល្អសម្រាប់យុវជនដទៃទៀតដែលត្រូវប្រកាន់ខ្ជាប់នូវសីលធម៌ចរិយាធម៌ និងគុណធម៌ ត្រូវជៀសឱ្យឆ្ងាយពីគ្រឿងញៀន និងអំពើអបាយមុខផ្សេងៗដែលសង្គមស្អប់ខ្ពើម។ ត្រូវគោរពច្បាប់ចរាចរណ៍ឱ្យបានខ្ជាប់ខ្ជួនជាពិសេសត្រូវខិតខំប្រឹងប្រែងរៀនសូត្រដើម្បីឱ្យក្លាយខ្លួនជាយុវជនល្អពោរពេញទៅដោយសមត្ថភាពក្នុងការចូលរួមអភិវឌ្ឍប្រទេសជាតិឱ្យកាន់តែរីកចម្រើននាថ្ងៃអនាគត៕

ដោយ ទិត ស្រ៊