AKP បន្ទាយមានជ័យ ថ្ងៃទី០៨ ខែកុម្ភៈ ឆ្នាំ២០២៥-- ឯកឧត្តម កែ គឹមយ៉ាន សមាជិកគណៈអចិន្ត្រៃយ៍គណៈកម្មាធិការកណ្ដាលគណបក្សប្រជាជនកម្ពុជា និងជាប្រធានក្រុមការងារគណបក្សចុះមូលដ្ឋានខេត្តបន្ទាយមានជ័យ បានបញ្ជាក់ថា ទោះបីសភាពការណ៍សន្តិសុខ នយោបាយ និងសេដ្ឋកិច្ចសកលលោកនៅតែបន្តប្រែប្រួល ប្រណាំងប្រជែង និងស្មុគស្មាញគួរឱ្យបារម្ភ តែប្រទេសកម្ពុជាក្រោមការដឹកនាំរបស់សម្តេចធិបតី ហ៊ុន ម៉ាណែត នាយករដ្ឋមន្រ្តីនៃព្រះរាជាណាចក្រកម្ពុជា នៅតែរក្សាការពារបានសុខសន្តិភាព ស្ថិរភាពនយោបាយ អធិបតេយ្យភាពទឹកដី និងការអភិវឌ្ឍគ្រប់វិស័យ។

ការថ្លែងយ៉ាងដូច្នេះរបស់ឯកឧត្ដម កែ គឹមយ៉ាន  បានធ្វើឡើងក្នុងឱកាសអញ្ជើញជាអធិបតីនៅក្នុងកិច្ចប្រជុំបូកសរុបលទ្ធផលការងារគណបក្សខេត្តឆ្នាំ២០២៤ និងទិសដៅបន្ត និងផ្សព្វផ្សាយលទ្ធផលស្មារតី នៃសន្និបាតគណៈកម្មាធិការកណ្តាល លើកទី៤៥ អាណត្តិទី៥ កាលពីថ្ងៃទី០៧ ខែកុម្ភៈ ឆ្នាំ២០២៥នេះនៅសាលប្រជុំគណបក្សខេត្តបន្ទាយមានជ័យ ដោយមានការអញ្ជើញចូលរួមពីក្រុមការងារគ្រប់ថ្នាក់ និងសមាជិកសមាជិកាបក្សជាច្រើនរូប។

ក្នុងឱកាសនោះ ឯកឧត្តម កែ គឹមយ៉ាន បានពាំនាំនូវបណ្តាំផ្ញើសួរសុខទុក្ខក្តីនឹករលឹកជូនពរជ័យមហាប្រសើរ និងថ្លែងអំណរគុណពីសម្ដេចតេជោ ហ៊ុន សែន ប្រធានព្រឹទ្ធសភា នៃកម្ពុជា និងជាប្រធានគណបក្សប្រជាជនកម្ពុជា សម្ដេចអគ្គមហាពញាចក្រី ហេង សំរិន ប្រធានកិត្តិយសគណបក្ស និងសម្តេចជាអនុប្រធានគណបក្ស ជូនដល់សមាជិកាគណបក្សទាំងអស់។

ឯកឧត្តម កែ គឹមយ៉ាន បានថ្លែងអំណរគុណ និងកោតសរសើរចំពោះឯកឧត្តម លោកជំទាវ លោក លោកស្រី ជាមន្រ្តីគណបក្ស ជាក្រុមការងារគណបក្សចុះមូលដ្ឋានគណបក្សគ្រប់ជាន់ថ្នាក់ និងសមាជិក សមាជិកាគណបក្ស អាជ្ញាធរដែនដីគ្រប់លំដាប់ថ្នាក់ ក្នុងខេត្តបន្ទាយមានជ័យ បន្តអភិវឌ្ឍមូលដ្ឋាន ធានាបាននូវភាពសុខដុមរមនា និងជីវភាពរស់នៅល្អប្រសើរដល់ប្រជាពលរដ្ឋ ស្របតាមកម្មវិធីនយោបាយរបស់គណបក្ស និងរាជរដ្ឋាភិបាលនៅគ្រប់អាណត្តិ។

ឯកឧត្តម កែ គឹមយ៉ានបានលើកឡើងថា គណបក្សប្រជាជនកម្ពុជាក្រោមមាគ៌ានយោបាយដឹកនាំរបស់សម្តេចតេជោ ហ៊ុន សែន ប្រធានព្រឹទ្ធសភា និងជាប្រធានគណបក្ស បានបន្តដឹកនាំពង្រឹងនិងពង្រីកការដឹកនាំគណបក្សទទួលបានសមិទ្ធផលជាប្រវត្តិសាស្ត្រឥតគណនា ដែលធ្វើឱ្យគណបក្សកាន់តែរឹងមាំខាងនយោបាយ សតិអារម្មណ៍ និងចាត់តាំងទទួលបានការស្រលាញ់គាំទ្រកាន់តែទូលំទូលាយពីមជ្ឈដ្ឋានប្រជាជន។

ជាមួយនឹងការសាទរពីលទ្ធផលការងារដ៏ត្រចះត្រចង់ក្នុងឆ្នាំ២០២៤ ក្នុងឱកាសនោះដែរឯកឧត្តម កែ គឹមយ៉ាន ឯកភាព និងគាំទ្រនូវរាល់ទិសដៅ ដោយបានណែនាំឱ្យបន្តរក្សានូវសាមគ្គីភាព ឯកភាពផ្ទៃក្នុង បន្តពង្រឹងលើការងារ សន្តិសុខ សណ្តាប់ធ្នាប់សាធារណៈ គោលនយោបាយភូមិ-ឃុំសង្កាត់មានសុវត្ថិភាព ច្បាប់ចរាចរណ៍ ព័ត៌មានក្លែងក្លាយ សេវាសាធារណៈ ដោះស្រាយនូវសំណូមពរប្រជាពលរដ្ឋ ដោះស្រាយបញ្ហាចំណាកស្រុក ការប្រើប្រាស់ទឹក កសិកម្ម នៅរដូវប្រាំង ត្រៀមជួយអន្តរាគមន៍នានាមានគ្រោះរាំងស្ងួត បង្ការគ្រោះអគ្គិភ័យ បំផុសចលនាឱ្យយុវជននៅតាមភូមិចូលរៀនជំនាញបច្ចេកទេស ការលើកទឹកចិត្តឱ្យបង្កើតមុខរបរអាជីវកម្មខ្នាតតូចនៅតាមសហគមន៍ និងជំនួយបច្ចេកទេសកសិកម្មនៅតាមមូលដ្ឋាន ជាដើម។ល។ ហើយត្រូវរួមគ្នាបន្តចូលរួមអនុវត្តតាមស្មារតីនៃអង្គសន្និបាតគណៈកម្មាធិការកណ្តាល លើកទី៤៥ អាណត្តិទី៥ ឱ្យទទួលបានជោគជ័យថែមទៀត៕

ដោយ ឈុន សារ៉ាត