AKP ភ្នំពេញ ថ្ងៃទី០៧ ខែកុម្ភៈ ឆ្នាំ២០២៥-- ឯកឧត្ដម ឃួង ស្រេង អភិបាលរាជធានីភ្នំពេញ ចុះពិនិត្យមហាវិថីសម្តេចតេជោហ៊ុន សែន (ផ្លូវ៦០ម៉ែត្រ) ក្នុងភូមិសាស្ត្រខណ្ឌមានជ័យ ដើម្បីពន្លឿនការងារដាក់របាំងចែកទ្រូងផ្លូវ៦០ម៉ែត្រ ខណៈក្រុមការងារនៃមន្ទីរសាធារណការ និងដឹកជញ្ជូនរាជធានីភ្នំពេញ បាន និងកំពុងដំឡើងរបាំងពុះចែកទ្រូងផ្លូវ ជាមួយការដាក់ស្លាកសញ្ញាកំណត់ល្បឿន និងស្លាកសញ្ញាផ្សេងទៀត នៅលើកំណាត់មហាវិថី ខណៈឯកឧត្ដមបានណែនាំការងារមួយចំនួនទៀតឱ្យមន្ទីរសាធារណការរាជធានីភ្នំពេញអនុវត្តការងារចរាចរណ៍បន្ថែមទៀតឱ្យបានល្អ  នៅថ្ងៃទី០៧ ខែកុម្ភៈ ឆ្នាំ២០២៥។

លោក សាំ ពិសិដ្ឋ ប្រធានមន្ទីរសាធារណការ និងដឹកជញ្ជូនរាជធានីភ្នំពេញ បានឱ្យដឹងថា ក្រោយពីមានការណែនាំពីឯកឧត្ដម ឃួង ស្រេង អភិបាលរាជធានីភ្នំពេញ មន្ទីរសាធារណការបានចាប់ផ្តើមដំឡើងរបាំងពុះចែកទ្រូងផ្លូវមហាវិថីសម្តេចតេជោហ៊ុនសែន (ផ្លូវ៦០ម៉ែត្រ) ចាប់តាំងពីព្រឹកថ្ងៃទី០៦ ខែកុម្ភៈ ឆ្នាំ២០២៥មក។

ទន្ទឹមនឹងនេះ លោកប្រធានមន្ទីរបានបញ្ជាក់ថា ការដាក់របាំងពុះចែកទ្រូងផ្លូវនេះត្រូវចែកចេញជា២ ប្រភេទ ដោយប្រភេទទី១. ដាក់របាំងដែកពុះចែកទ្រូងផ្លូវ ចាប់ផ្ដើមពីគល់ស្ពានអាកាសមរតកតេជោ រហូតទៅដល់ស្តុបក្បែរក្រុមហ៊ុនរថយន្ត Mercedes ដោយកំណត់នូវល្បឿន៤០គីឡូម៉ែត្រក្នុង១ម៉ោង និងប្រភេទទី២. ដាក់របាំងថ្មពុះចែកទ្រូងចាប់ពីចំណុចស្តុប Mercedes រហូតទៅដល់ផ្លូវជាតិលេខ២ កំណត់ល្បឿន៦០គីឡូម៉ែត្រក្នុង១ម៉ោង។ ក្រៅពីការរបាំងដែក និងរបាំងថ្មពុះចែកទ្រូងផ្លូវនេះហើយ មន្ទីរនៅបំពេញបន្ថែមនូវការងារមួយចំនួនទៀតដូចជា ដាក់ស្លាកសញ្ញាចរាចរណ៍បន្ថែម អ៊ុតគំនូសចរាចរណ៍ ដាក់ចំណាំងផ្លាត ដាក់គោមភ្លើងពញ្ញាក់អារម្មណ៍ជាដើម។

លោកបានបញ្ជាក់បន្ថែមថា ការងារនេះត្រូវប្រើរយៈពេលប្រមាណ១ខែកន្លះទើបបញ្ចប់ដោយសារ ផ្លូវសម្តេចតេជោហ៊ុន សែន (ផ្លូវ៦០ម៉ែត្រ) មានប្រវែងវែងរហូតដល់៩គីឡូម៉ែត្រ ដែលទាមទារពេលវេលាវែងដើម្បីអនុវត្ត និងបានធ្វើការអំពាវនាវឱ្យបងប្អូនប្រជាពលរដ្ឋទាំងអស់សូមបើកបរទៅតាមល្បឿនដែលបានកំណត់ និងសូមគោរពច្បាប់ចរាចរណ៍ទាំងអស់គ្នា ដើម្បីកាត់បន្ថយគ្រោះថ្នាក់ចរាចរណ៍៕

ដោយ សួស សំរិត