AKP ភ្នំពេញ ថ្ងៃទី០៦ ខែកុម្ភៈ ឆ្នាំ២០២៥ -- ឯកឧត្តម ឃួង ស្រេង អភិបាលរាជធានីភ្នំពេញ  បានរំលឹកនូវគុណបំណាច់របស់សាធារណរដ្ឋគុយបា ដែលជាមិត្តចាស់បានជួយឧបត្ថម្ភគាំទ្រ ដល់កម្ពុជា លើវិស័យសុខាភិបាល អប់រំ និងកសិកម្ម នាពេលកន្លងមក រាប់ចាប់តាំងពីការចាប់ផ្តើមទំនាក់ទំនងការទូតរវាងប្រទេសកម្ពុជា និងសាធារណរដ្ឋគុយបា អំឡុងឆ្នាំ១៩៧៩ និងអំឡុងទសវត្ស៨០ ជាពិសេសការជួយរបស់គុយបាមកកាន់កម្ពុជា ក្រោយកម្ពុជារំដោះប្រទេសជាតិចេញពីរបបប្រល័យពូជសាសន៍ប៉ុលពត ដោយគុយបាបានរួមចំណែកយ៉ាងធំធេងលើការអភិវឌ្ឍប្រទេសជាតិកម្ពុជា ក្រោយកម្ពុជារួចផុតពីសង្គ្រាម។ ឯកឧត្ដមបានបញ្ជាក់បែបនេះក្នុងជំនួបពិភាក្សាការងារជាមួយ លោកជំទាវ មីឡេនណាការីដាដ ស្សាលឌីវ៉ារ ពាដ្រា (Milena Carida d Zaldivar Piedra) ឯកអគ្គរដ្ឋទូតវិសាមញ្ញ និងពេញសមត្ថភាពនៃសាធារណរដ្ឋគុយបា ប្រចាំព្រះរាជាណាចក្រកម្ពុជា នាថ្ងៃទី០៦ ខែកុម្ភៈ ឆ្នាំ២០២៥ នៅសាលារាជធានីភ្នំពេញ។

ឯកឧត្តមអភិបាលរាជធានីបានរំលឹកថា ជាការពិតចំណងការទូតដែលផ្តួចផ្តើមឡើងដោយសម្តេចព្រះបរមរតនកោដ្ឋ និងឯកឧត្តម Fidel Castro បានធ្វើឱ្យកម្ពុជា និងគុយបាមានទំនាក់ទំនងការទូតតាំងពីបុរេប្រវត្តិមក។ ប៉ុន្តែមកដល់កម្ពុជា នៅសម័យរំដោះឱ្យរួចពីការកាប់សម្លាប់ពីរបស់ប៉ុលពត សម្តេចអគ្គមហាសេនាបតីតេជោ ហ៊ុន សែន ដែលជាមគ្គុទេសក៍ការទូតប្រចាំកម្ពុជានាពេលនោះ បានរៀបចំទំនាក់ទំនងជាមួយជាមួយបណ្តាប្រទេសជាច្រើន។ ដោយឡែក គុយបា ក៏ជាប្រទេសមួយក្នុងចំណោមប្រទេសដែលបានធ្វើកិច្ចការការទូតជាមួយនឹងសាធារណរដ្ឋប្រជាមានិតកម្ពុជានាពេលនោះផងដែរ។

ឯកឧត្តមបានមានប្រសាសន៍ថា ពាក្យស្លោកកម្ពុជាមួយ បានលើកឡើងថា ជួយគ្នាក្នុងគ្រាក្រ ហើយក្នុងពេលដែលកម្ពុជាក្រ ក៏មានប្រទេសគុយបាមួយ បានជួយប្រទេសកម្ពុជា នូវជំនួយឥតសំណងសព្វបែបយ៉ាង និងបានជម្រាបជូនលោកជំទាវឯកអគ្គរដ្ឋទូតគុយបាអំពីការត្រៀមលក្ខណៈរួចរាល់របស់អាជ្ញាធររាជធានីភ្នំពេញក្នុងការជួយជ្រោមជ្រែងលើកិច្ចការងារចាំបាច់ ជាពិសេសក្នុងបេសកកម្មការទូតរបស់លោកជំទាវ ក្នុងទីក្រុងភ្នំពេញ និងការការពារសុខសុវត្ថិភាព របស់ស្ថានទូតគុយបា នៅទីក្រុងភ្នំពេញផងដែរ។

ជាមួយគ្នានេះដែរ លោកជំទាវឯកអគ្គរដ្ឋទូតបានថ្លែងអំណរគុណចំពោះ ឯកឧត្ដម ឃួង ស្រេង ដែលបានចំណាយពេលវេលាដ៏មមាញឹក អនុញ្ញាតឱ្យលោកជំទាវ និងសហការី ចូលជួបសម្តែងការគួរសម ព្រមទាំងអរគុណដល់អាជ្ញាធររាជធានីភ្នំពេញ ដែលជានិច្ចជាកាលបានជួយដល់ស្ថានទូតគុយបា ទាំងការរក្សាអនាម័យបរិស្ថានជុំវិញស្ថានទូត និងជាពិសេសសុខសុវត្ថិភាពរបស់មន្ត្រីនៃស្ថានទូតគុយបា ដែលមានមូលដ្ឋាននៅទីក្រុងភ្នំពេញតែម្តង និងបានរម្លឹកនូវចំណងមិត្តភាពរវាងប្រទេសទាំងពីរ គុយបា-កម្ពុជា ដែលមានទំនាក់ទំនងការទូតយ៉ាងស្អិតរមួត ហើយប្តេជ្ញារក្សាឱ្យបាននូវតម្លៃមិត្តភាព សាមគ្គីភាព និងបន្តឱ្យកាន់តែល្អប្រសើរថែមទៀត។

លោកជំទាវឯកអគ្គរដ្ឋទូតបានស្នើដល់ឯកឧត្តម ឃួង ស្រេង ពិនិត្យលទ្ធភាពក្នុងការស្វែងរកសាលារៀនដែលធ្លាប់បានប្រើប្រាស់ឈ្មោះថាជាសាលាគុយបាកាលពីអតីតកាល នឹងអាចឱ្យស្ថានទូតគុយបាចុះធ្វើទស្សនកិច្ច និងមានបំណងចង់ដាំដើមឈើសម្រាប់ទុកជាអនុស្សាវរីយ៍ដែលបង្ហាញពីចំណងមិត្តភាព រវាងគុយបា និងកម្ពុជា ខណៈ ដែលកិច្ចការងារនេះ ឯកឧត្តម ឃួង ស្រេង បានឯកភាពលើការផ្តល់នូវការគាំទ្រចំពោះកិច្ចការមួយចំនួន ដែលជាសំណើររបស់លោកជំទាវឯកអគ្គរដ្ឋទូត។ តែយ៉ាងណាមិញ ឯកឧត្តមក៏បានផ្តល់អនុសាសន៍ណែនាំឱ្យឯកអគ្គរដ្ឋទូតគុយបា ពិនិត្យ និងពិភាក្សាការងារខាងលើជាមួយឧបនាយរដ្ឋមន្ត្រី រដ្ឋមន្ត្រីក្រសួងអប់រំជាមុនសិន ថាតើអាចរៀបចំអ្វីខ្លះ ដើម្បីឱ្យសាកសមនឹងតម្លៃនៃចំណងមិត្តភាពរវាងប្រទេសទាំងពីរ។

ឯកឧត្តម ឃួង ស្រេង និងលោកជំទាវឯកអគ្គរដ្ឋទូត ក៏បានឯកភាពគ្នាលើការជំរុញការផ្សព្វផ្សាយនូវទំនាក់ទំនង អំពីវប្បធម៌ប្រពៃណីដ៏ផូរផង់ រវាងប្រទេសទាំងពីរ ទៅកាន់ប្រជាជនគ្នាទៅវិញទៅមក និងសង្ឃឹមថានឹងអាចមានការចុះអនុស្សរណៈយោគយល់គ្នា រវាងទីក្រុងហាវ៉ាណា និងទីក្រុងភ្នំពេញផងដែរ៕

ដោយ សួស សំរិត