AKP ឧត្តរមានជ័យ ថ្ងៃទី០៦ ខែកុម្ភៈ ឆ្នាំ២០២៥--ឯកឧត្តម មាន ចាន់យ៉ាដា អភិបាលនៃគណៈអភិបាលខេត្តឧត្តរមានជ័យ រួមដំណើរដោយឯកឧត្តមអភិបាលរង ប្រធាន អនុប្រធានមន្ទីរ អភិបាលស្រុក និងមន្រ្តីជំនាញ កាលពីរសៀលថ្ងៃទី០៥ ខែកុម្ភៈ ឆ្នាំ២០២៥ បានអញ្ជើញចុះពិនិត្យមើលការងារចុះបញ្ជីក្បាលដីធ្លីមានលក្ខណៈជាប្រព័ន្ធនៅក្នុងស្រុកអន្លង់វែង ខេត្តឧត្តរមានជ័យ។

ឯកឧត្តម មាន ចាន់យ៉ាដា បានមានប្រសាសន៍ថា ពិតជារីករាយដែលបងប្អូនមន្ត្រីសុរិយោដីបានប្តេជ្ញាចិត្តជាមួយរដ្ឋបាលខេត្តឧត្តរមានជ័យក្នុងការបញ្ចប់ការវាស់វែងដីជូនប្រជាពលរដ្ឋឱ្យចប់ក្នុងរយៈពេល៤០ថ្ងៃទៀត។ ឯកឧត្តម និងមន្ទីរអង្គភាពពាក់ព័ន្ធ បានចុះជួបដោយផ្ទាល់ជាមួយបងប្អូនមន្ត្រីចុះវាស់វែងដីធ្លីលក្ខណៈជាប្រព័ន្ធជូនបងប្អូនប្រជាពលរដ្ឋនៅក្នុងស្រុកអន្លង់វែង និងសូមកោតសរសើរចំពោះទំនួលខុសត្រូវខ្ពស់របស់បងប្អូនមន្ត្រីសុរិយោដីទាំងអស់។

ទន្ទឹមនឹងនេះ ឯកឧត្តមបានជំរុញដល់លោកប្រធានមន្ទីរ និងមន្រ្តីជំនាញ ការិយាល័យភូមិបាលស្រុកថា ធ្វើយ៉ាងណាត្រូវតែពន្លឿនបន្ថែមនៅក្នុងការចុះបញ្ជីដីធ្លីជាលក្ខណៈប្រព័ន្ធនេះឱ្យបានលឿននៅលើទីតាំងដីដែលនៅសេសសល់ជូនដល់បងប្អូនប្រជាពលរដ្ឋយើងនៅតាមមូលដ្ឋានរបស់ពួកគាត់ឱ្យបានរួចរាល់គ្រប់ៗគ្នា។ ដីធ្លីនៅខេត្តឧត្តរមានជ័យទាំងអស់នឹងត្រូវបានបញ្ចប់ការវាស់វែងលក្ខណៈជាប្រព័ន្ធចប់សព្វគ្រប់ នៅក្នុងដំណាច់ខែឧសភាខាងមុខ ក្នុងឆ្នាំ២០២៥នេះ។

បន្ទាប់មកទៀត ឯកឧត្តមអភិបាលខេត្ត និងក្រុមការងារបានអញ្ជើញបន្តពិនិត្យមើលស្ពានឈើ និងស្ពានថ្មមួយកន្លែងបន្ថែមទៀត ស្ថិតនៅភូមិទួលប្រាសាទ ដែលតភ្ជាប់ពីឃុំថ្លាត ទៅឃុំត្រពាំងប្រិយ៍ ស្ថិតនៅក្នុងស្រុកអន្លង់វែង ដោយស្ពានថ្មមានប្រវែងបណ្តោយ២១ម៉ែត្រ គុណទទឹង៤ម៉ែត្រ និងស្ពានឈើប្រវែង៧៥ម៉ែត្រគុណទទឹង៤ម៉ែត្រ ដោយមានការគាំទ្រថវិកាចូលរួមយកចិត្តទុកដាក់ខ្ពស់ពីឯកឧត្តម កិត្តិសង្គហបណ្ឌិត គន់ គីម ទេសរដ្ឋមន្រ្តី អនុប្រធានទី១គណៈកម្មាធិការជាតិគ្រប់គ្រងគ្រោះមហន្តរាយ ឯកឧត្តម មាន ចាន់ យ៉ាដា អភិបាលខេត្ត លោក ងួន ធីរិទ្ធ អភិបាលស្រុកអន្លង់វែង អាជ្ញាធភូមិ ឃុំ ប្រជាពលរដ្ឋ និងព្រះសង្ឃចូលរួមផងដែរ។

ឯកឧត្តមអភិបាលខេត្តបានបញ្ជាក់ថា កន្លងមកក៏ដូចជាច្រើនឆ្នាំមកហើយ បងប្អូនប្រជាពលរដ្ឋរស់នៅក្នុងមូលដ្ឋានតំបន់នេះ គឺពិបាកក្នុងការធ្វើដំណើរជាខ្លាំង ជាពិសេសស្ត្រីមានពោះធំមុន និងក្រោយសម្រាល គឺពិបាកក្នុងការធ្វើដំណើទៅមណ្ឌលសុខភាព រួមទាំងសិស្សានុសិស្សក៏ពិបាកធ្វើដំណើទៅសាលារៀនផងដែរ។ នៅរដូវខែវស្សាត្រូវបានទឹកលិចជាប់ជាច្រើនខែ ហេតុនេះទើបបានថ្នាក់ដឹកនាំផ្តួចផ្តើមកសាងស្ពាននេះឡើង ដើម្បីជួយសម្រួលដល់បងប្អូនប្រជាពលរដ្ឋដល់ការធ្វើដំណើរ ក៏ដូចជាការដឹកកសិផលលើដំណាំកសិកម្មផ្សេងៗផងដែរ៕

ដោយ ទិត ស្រ៊