AKP បន្ទាយមានជ័យ ថ្ងៃទី០៦ ខែកុម្ភៈ ឆ្នាំ២០២៥-- ឯកឧត្តមបណ្ឌិត ប៉ាន់ខែម ប៊ុនថន ប្រធានក្រុមការងាររាជរដ្ឋាភិបាលចុះមូលដ្ឋានក្រុងប៉ោយប៉ែត ខេត្តបន្ទាយមានជ័យ បានកោតសរសើរចំពោះអាជ្ញាធរក្រុមការងាររដ្ឋបាលក្រុងប៉ោយប៉ែត កម្លាំងសមត្ថកិច្ចទាំងអស់ ព្រមទាំងសង្កាត់ទាំង៥ទូទាំងក្រុងប៉ោយប៉ែត ដែលបានយកចិត្តទុកដាក់សហការគ្នាបានល្អប្រកបដោយទំនួលខុសត្រូវខ្ពស់ចំពោះការអនុវត្តការងារភារកិច្ចជូនប្រជាពលរដ្ឋនាពេលកន្លងមកនេះ។ ការថ្លែងយ៉ាងដូច្នេះរបស់ឧត្តមបណ្ឌិតបានធ្វើឡើងក្នុងកិច្ចប្រជុំជាមួយគណៈបញ្ជាការឯកភាពរដ្ឋបាលក្រុងប៉ោយប៉ែត ដើម្បីពិនិត្យបូកសរុបលទ្ធផលការងារនាពេលកន្លងមក និងលើកទិសដៅការងារសំខាន់ៗចំពោះមុខដែលត្រូវអនុវត្តបន្តឱ្យមានប្រសិទ្ធភាព និងទាន់ពេលវេលាកាលពីថ្ងៃទី០៥ ខែកុម្ភៈ ឆ្នាំ២០២៥។

ឯកឧត្តមបណ្ឌិត ប៉ាន់ខែម ប៊ុនថន បានលើកឡើងថា ជាក់ស្តែងកិច្ចការងារកែលម្អសោភ័ណភាព និងគុណភាពហេដ្ឋារចនាសម្ព័ន្ធតាមមូលដ្ឋាន ការងារសន្តិសុខ សណ្តាប់ធ្នាប់ និងសុវត្ថិភាព របស់មូលដ្ឋានការបង្ក្រាបក្រុមក្មេងទំនើងជាដើម ហើយក្នុងនោះដូចជាករណីសត្វគោដែលម្ចាស់លែងដើរពាសវាលពាសកាល ក្នុងក្រុងប៉ោយប៉ែត ដែលធ្វើឱ្យខូចសណ្តាប់ធ្នាប់សាធារណៈ បង្កការរំខានដល់ការចរាចរណ៍តាមដងផ្លូវ និងអាចបណ្តាលឱ្យកើតមានគ្រោះថ្នាក់ចរាចរណ៍កន្លងមក ពេលនេះត្រូវបានលុបបំបាត់ទាំងស្រុង ដោយសារការសហការរបស់ក្រុមការងារគ្រប់ផ្នែក និងគ្រប់លំដាប់ថ្នាក់។

ជាមួយគ្នានោះដែរ ឯកឧត្តមបណ្ឌិត ប៉ាន់ខែម ប៊ុនថន  ក៏បានស្នើឱ្យរដ្ឋបាលក្រុង កងកម្លាំងសមត្ថកិច្ច និងក្រុមការងារទាំងអស់ក្នុងក្រុងប៉ោយប៉ែតត្រូវរួមគ្នាបន្តកិច្ចសហការ អនុវត្តការងារភារកិច្ចបន្តបន្ទាប់ទៀត ក្នុងនាមជាក្រុមគ្រួសារកក់ក្តៅ ដើម្បីបង្កើតភាពសុខសាន្តរុងរឿង និងការរីកចម្រើនក្នុងមូលដ្ឋានក្រុងប៉ោយប៉ែតយើងទាំងអស់គ្នា។ ត្រូវបន្តខិតខំបន្ថែមទៀត ក្នុងការបម្រើផលប្រយោជន៍ និងសេចក្តីត្រូវការរបស់ប្រជាពលរដ្ឋ ជាពិសេសត្រូវយកចិត្តទុកដាក់ខ្ពស់ទៅលើការដោះស្រាយបញ្ហាប្រឈមនានា ក៏ដូចជាបម្រើសេវាសាធារណៈជូនប្រជាពលរដ្ឋ ឱ្យបានឆាប់រហ័ស ទាន់សភាពការណ៍ និងមានប្រសិទ្ធភាពខ្ពស់ ស្របទៅនឹងគោលនយោបាយយុទ្ធសាស្ត្របញ្ចកោណ ដំណាក់កាលទី១ របស់រាជរដ្ឋាភិបាល អាណត្តិទី៧នេះ៕

ដោយ ឈុន សារ៉ាត