AKP ភ្នំពេញ ថ្ងៃទី០៦ ខែកុម្ភៈ ឆ្នាំ២០២៥-- លោកជំទាវ ពុំ ចន្ទីនី អគ្គលេខាធិការកាកបាទក្រហមកម្ពុជា បានទទួលជួបសំណេះសំណាល និងទទួលសម្ភារវិជ្ជាសង្គ្រោះបឋមពីប្រតិភូអង្គការយូហាន់នីធើប្រចាំតំបន់អាស៊ីអាគ្នេយ៍ (JOHANNITER) ដឹកនាំដោយលោកស្រី Anette Muller នាយិកាប្រចាំតំបន់អាស៊ីអាគ្នេយ៍នៃអង្គការយូហាននីធើ នៅទីស្នាក់ការកណ្តាលកាកបាទក្រហមកម្ពុជា កាលព្រឹកថ្ងៃទី០៥ ខែកុម្ភៈ ឆ្នាំ២០២៥។

ជាកិច្ចចាប់ផ្តើមលោកស្រី Anette Muller បានថ្លែងអំណរគុណចំពោះកាកបាទក្រហមកម្ពុជា ពិសេសលោកជំទាវអគ្គលេខាធិការ ដែលបានចំណាយពេលវេលាទទួលជួបសំណេះសំណាល និងទទួលសម្ភារវិជ្ជាសង្គ្រោះបឋម និងបានជម្រាបជូនអំពីសកម្មភាពការងារ និងបេសកម្មរបស់អង្គការយូហាន់នីធើផងដែរ។

ជាការឆ្លើយតប លោកជំទាវ ពុំ ចន្ទីនី បានពាំនាំនូវប្រសាសន៍ផ្តាំផ្ញើសួរសុខទុក្ខពីសម្តេចកិត្តិព្រឹទ្ធបណ្ឌិត ប៊ុន រ៉ានី ហ៊ុនសែន ប្រធានកាកបាទក្រហមកម្ពុជា ព្រមទាំងថ្លែងអំណរគុណចំពោះអង្គការយូហាន់នីធើ ដែលបានផ្តល់សម្ភារវិជ្ជាសង្គ្រោះបឋមដល់កាកបាទក្រហមកម្ពុជា។

ជាមួយគ្នានេះដែរ លោកជំទាវក៏បានមានប្រសាសន៍លើកឡើងអំពីសកម្មភាពការងាររបស់កាកបាទក្រហមកម្ពុជាដែលបានធ្វើ កំពុងធ្វើ និងបន្តធ្វើលើសកម្មភាពមនុស្សធម៌ ដោយឡែកចំពោះសកម្មភាពបណ្តុះបណ្តាលវិជ្ជាសង្គ្រោះបឋម លោកជំទាវបានលើកឡើងយ៉ាងលម្អិតជូនប្រតិភូអង្គការយូហាន់នីធើ។

បន្ទាប់ពីជួបសំណេះសំណាល និងទទួលអំណោយ លោកជំទាវបញ្ជាក់បន្ថែមថា អង្គការយូហាន់នីធើបានចាប់ផ្តើមការងារក្នុងប្រទេសកម្ពុជាឆ្នាំ២០១១ មានបេសកម្មខាងជួយសង្គ្រោះបឋម តាំងពីយូរមកហើយតែមិនមានទំនាក់ទំនងជាមួយកាកបាទក្រហមកម្ពុជា។ តែមកដល់ឆ្នាំ២០២៤ អង្គការនេះក៏ចាប់ផ្តើមស្នើឱ្យកាកបាទក្រហមកម្ពុជាសូមឱ្យមានអ្នកទៅរៀនវិជ្ជាសង្គ្រោះបឋម ឆ្លើយតបកាកបាទក្រហមកម្ពុជាក៏បានចាត់មន្ត្រី៣នាក់ទៅរៀនតាមការស្នើសុំ។  ក្រោយពីមន្ត្រី៣នាក់ទៅរៀនរួចក៏ទៅជួយបង្រៀនឱ្យអង្គការវិញ។ ចំពោះការបណ្តុះបណ្តាលវិជ្ជាសង្គ្រោះបឋម យើងមានទិសដៅក្នុងការអភិវឌ្ឍចំណេះដឹងតទៅមុខហើយឱ្យខ្លាំងជាងបណ្តាឆ្នាំកន្លងទៅទៀត ព្រោះយើងត្រូវមានបណ្ដាញយុវជន និងអ្នកស្ម័គ្រចិត្តរឹងមាំដែលយល់ដឹងពីវិជ្ជាសង្គ្រោះបឋម ជាមួយយុទ្ធសាស្ត្រ ២០២១-២០៣០ របស់កាកបាទក្រហមកម្ពុជា ធ្វើយ៉ាងណាក្នុងមួយគ្រួសារឱ្យមានមនុស្សម្នាក់ចេះវិជ្ជាសង្គ្រោះបឋម គឺយល់ហើយចេះវិជ្ជាសង្គ្រោះបឋម ជួយជនរងគ្រោះភ្លាមៗនៅកន្លែងមុនពេលបញ្ជូនទៅកាន់មន្ទីរពេទ្យ។ អញ្ចឹងបានជាពេលនេះយើងត្រូវចាប់ដៃគូដើម្បីគាំទ្រទាំងសម្ភារ និងជំនាញបច្ចេកទេសក្នុងការបណ្តុះបណ្តាលគ្រូបំពេញបន្ថែមឱ្យកាន់តែច្រើនឡើងៗមានសមត្ថភាពបន្ថែមទៀត។

ទន្ទឹមនឹងនេះ លោកជំទាវអគ្គលេខាធិការបានបញ្ជាក់បន្ថែមថា សម្ភារដែលទទួលបាននឹងយកទៅប្រើប្រាស់សម្រាប់ការបង្រៀន និងដើម្បីសង្គ្រោះបឋមដល់មន្ត្រីបុគ្គលិកដែលមានបញ្ហាសុខភាពបានភ្លាមៗផងដែរ៕

ដោយ៖ ពេជ្រ សំអឿន (ប្រភព៖ កាកបាទក្រហមកម្ពុជា)