AKP ភ្នំពេញ ថ្ងៃទី០៥ ខែកុម្ភៈ ឆ្នាំ២០២៥ -- សារព័ត៌មានមានតូនាទីក្នុងការចូលរួមថែរក្សាសន្តិភាព ស្ថិរភាព និងកុំឱ្យមានចលនានៅក្នុងសង្គម ហើយប្រព័ន្ធផ្សព្វផ្សាយជាយន្តការចែករំលែកព័ត៌មានសម្រាប់ចំណេះដឹងសង្គម ដែលជាមូលដ្ឋានក្នុងការសម្រចចិត្តត្រឹមត្រូវ ឬខុស ។

នេះគឺជាថ្លែងរបស់ ឯកឧត្តម នេត្រ ភក្រ្តា រដ្ឋមន្ត្រីក្រសួងព័ត៌មាន ក្នុងឱកាសអញ្ជើញជាវាគ្មិនកិត្តិយសកម្មវិធីចែករំលែកបទពិសោធន៍លើប្រធានបទ«ការចែករំលែកចំណេះដឹងពីសារព័ត៌មាន និងប្រព័ន្ធផ្សព្វផ្សាយ» ជូនដល់និស្សិតជាង ១ ៨០០នាក់ នៃសាកលវិទ្យាល័យ ប៊ែលធី អន្តរជាតិ ទីតាំងទី២ ស្ពានអាកាសចោមចៅ រាជធានីភ្នំពេញ នាព្រឹកថ្ងៃទី០៥ ខែកុម្ភៈ ឆ្នាំ២០២៥ ។

ឯកឧត្តម នេត្រ ភក្ត្រា បានគូសបញ្ជាក់ថា ព័ត៌មានបានដើរតូនាទីសំខាន់ដោយសារវាភ្ជាប់ជាមួយការរស់នៅជាមួយយើងតែម្តង ហើយ។ ជាមួយនេះ ប្រព័ន្ធផ្សព្វផ្សាយបានដើរតូនាទីសំខាន់ណាស់ ជាកញ្ចក់ឆ្លុះបញ្ចាំងនូវ តថភាពពិតនៅក្នុងសង្គម ហើយជាការបំពេញបន្ថែមទៅជាមួយការងាររបស់យើងផ្ទាល់តែម្តង ។ ឯកឧត្តម រដ្ឋមន្ត្រី ក៏បានជម្រាបជូនពីការវិវត្តិនៃប្រព័ន្ធផ្សាយនៅកម្ពុជា រវាងប្រព័ន្ធផ្សព្វផ្សាយបុរាណ និងប្រព័ន្ធផ្សព្វផ្សាយទំនើប រួមទាំងចំណូលចិត្តរបស់ប្រជាពលរដ្ឋលើបច្ចេកវិទ្យាទំនើប និងកំណើននៃការ ប្រើប្រាស់អ៊ីនធឺណិតនៅកម្ពុជា បានផ្លាស់ប្តូរទំលាប់របស់ប្រជាពលរដ្ឋភាគច្រើនក្នុងការទទួល ព័ត៌មាន ការប្រើប្រាស់បណ្តាញទំនាក់ទំនងសង្គមនៅប្រទេសកម្ពុជា ដែលមានភាពសម្បូរបែប និងសេរី ។ ឯកឧត្តមរដ្ឋមន្រ្តីអះអាងថា បច្ចុប្បន្នភាពប្រព័ន្ធផ្សព្វផ្សាយនៅកម្ពុជា រួមមាន ទូរទស្សន៍អាណាឡូក ចំនួន ១៤៣ ទូរទស្សន៍ផ្សាយផ្ទាល់ ១៩ ទូរទស្សន៍ផ្សាយបន្ត ១៦៥ ទូរទស្សន៍ឌីជីថល ១២ ទូរទស្សន៍ ខ្សែកាប ៤៤ ទូរទស្សន៍ ផ្សាយតាមផ្កាយរណប ២ និងទូរទស្សន៍ប្រព័ន្ធ Over the Top ចំនួន ៨ ។

ស្ថានីយវិទ្យុ FM ២៨៣ ស្ថានីយ វិទ្យុ AM ១ ស្ថានីយ ។ គេហទំព័រ និងទូរទស្សន៍ អនឡាញ ៩៣៣ អង្គភាព សមាគមសារព័ត៌មាន ៥២អង្គភាព រួមទាំងទស្សនាវដ្តី ទីភ្នាក់ងារសារព័ត៌មានបរទេស ព្រឹត្តិបត្រ ជាច្រើនផ្សេងទៀត ។ តែទោះជាយ៉ាងនេះក្តី ឯកឧត្តមរដ្ឋមន្រ្តីបានបន្ថែមថា កម្រិតនៃការប្រើប្រាស់ប្រព័ន្ធផ្សព្វផ្សាយបុរាណគឺនៅតែសំខាន់ដដែល ដោយក្នុងនោះប្រមាណ ៨០% នៃការទទួលព័ត៌មានរបស់ប្រជាពលរដ្ឋ ហើយចំណែកឯប្រព័ន្ធផ្សព្វផ្សាយទំនើបប្រមាណ ៩០% នៃការទទួលបានព័ត៌មាន ។

យោងតាមរយៈរបាយការណ៍ដែលបានសិក្សាស្រាវជ្រាវបានបង្ហាញថា ស្ថានភាពសេរីភាពសារព័ត៌មាននៅកម្ពុជា មានភាពល្អប្រសើរ ដោយក្នុងចំណោមអ្នកចូលរួមឆ្លើយក្នុងការ ស្ទង់មតិសរុបចំនួន ៣៤១នាក់ មានមនុស្សចំនួន ៧៩,៨% បានឆ្លើយថាសេរីភាពសារព័ត៌មាននៅកម្ពុជាមានភាពល្អប្រសើរ ។ ឯកឧត្តម នេត្រ ភក្រ្តា បានថ្លែងបញ្ជាក់ថា នេះជាចំណុចនៃការយល់ដឹងជារួមនៃនិន្នាការនៃការផ្លាស់ប្តូររបស់ប្រជាពលរដ្ឋ ក្នុងការទទួលព័ត៌មាន ។ ដូច្នេះប្រព័ន្ធផ្សាយត្រូវតែដើរតូនាទីសំខាន់ក្នុងការធ្វើយ៉ាងមិចអោយការផ្សព្វផ្សាយព័ត៌មានធានាបានការពិត ដើម្បីគ្រប់គ្រងសាធារណៈមតិប្រកបដោយប្រសិទ្ធភាព ។

បើតាមឯកឧត្តម លី ណាវុឌ្ឍ អគ្គនាយករង ប៊ែលធី គ្រុប និងជាសាកលវិទ្យាធិការនៃសាកលវិទ្យាល័យ ប៊ែលធី អន្តរជាតិ បានបញ្ជាក់ជូនពីគោលបំណងនៃកម្មវិធីចែករំលែកបទពិសោធន៍ លើប្រធានបទ «ការចែករំលែក ចំណេះដឹងពីសារព័ត៌មាន និងប្រព័ន្ធផ្សព្វផ្សាយ» គឺជាប្រធានបទមួយដ៏មានគុណតម្លៃយ៉ាងវិសេស វិសាល ប្រកបដោយសារប្រយោជន៍ ចំពោះនិស្សិតក្នុងការកសាងចំណេះដឹង ជំនាញ និងបទពិសោធន៍ ឱ្យក្លាយជាបញ្ញវ័ន្តដ៏ឆ្នើមសម្រាប់ខ្លួនឯង គ្រួសារ សង្គមជាតិ និងសាកលលោក ស្របតាមបាវចនារបស់ សាកលវិទ្យាល័យ ប៊ែលធី អន្តរជាតិ គឺ៖ « BELTEI International University-The Future of Global Leaders » ។

ឯកឧត្តម លី ណាវុឌ្ឍ បានជម្រាបជូនថា ចាប់តាំងពីឆ្នាំ២០០២ មកដល់ឆ្នាំ២០២៥ ក្នុងរយៈពេល ២៣ឆ្នាំកន្លងមកនេះ ប៊ែលធីគ្រុបខិតខំចូលរួមយ៉ាងសកម្មក្នុងការអភិវឌ្ឍវិស័យអប់រំ និងបណ្តុះបណ្តាលធនធានមនុស្សនៃព្រះរាជាណាចក្រកម្ពុជា ដែលបច្ចុប្បន្នមានបុគ្គលិកកំពុងបម្រើការចំនួន ៣ ៨០០ នាក់ និងសិស្ស-និស្សិត សរុបចំនួនប្រមាណជាង ៦១ ០០០ នាក់ និងមានអគារផ្ទាល់ខ្លួនសរុប ៣៥ ទីតាំង នៅរាជធានីភ្នំពេញ។ ជាមួយគ្នានេះ ប៊ែលធីគ្រុបបាននិងកំពុងសាងសាង់អគារស្នាក់ការកណ្តាលកម្ពស់ ៣២ជាន់ នៅកណ្តាលរាជធានី ភ្នំពេញដែលនឹងបញ្ចប់ការសាងសង់នាពេលឆាប់ៗនេះ ។  ឯកឧត្តបន្តទៀតថា ក្រោមការដឹកនាំដ៏ឈ្លាសវៃ និងប៉ិនប្រសប់របស់ ឯកឧត្តមបណ្ឌិត លី ឆេង តំណាងរាស្ត្រ មណ្ឌលរាជធានីភ្នំពេញ ស្ថាបនិក-អគ្គនាយកប៊ែលធីគ្រុប និងជាប្រធានក្រុមប្រឹក្សាភិបាលនៃសាកលវិទ្យា ល័យប៊ែលធី អន្តរជាតិ គឺ ប៊ែលធី គ្រុប មានការរីកចម្រើនជាបន្តបន្ទាប់រហូតមានស្ថាប័ន និងក្រុមហ៊ុន ចំណុះចំនួន ៩ ដូចជា៖ ១-ប៊ែលធី សំណង់ ២-សាលា ប៊ែលធី អន្តរជាតិ ៣-សាកលវិទ្យាល័យ ប៊ែលធី អន្តរជាតិ ៤-ប៊ែលធី ទំនាក់ទំនងអន្តរជាតិ ៥-មជ្ឈមណ្ឌលតេស្ត អន្តរជាតិ ប៊ែលធី ៦-ប៊ែលធី ទេសចរណ៍ ៧-សប្បុរសធម៌ ប៊ែលធី ៨-អាហារូបករណ៍ឧកញ៉ា លី ឆេង ៩-សមាគមអតីតនិស្សិតអាហារូបករណ៍ឧកញ៉ា លី ឆេង ៕

ដោយ៖ រិទ្ធី រូបថត៖ ខឹម សុវណ្ណារ៉ា