AKP ភ្នំពេញ ថ្ងៃទី០៥ ខែកុម្ភៈ ឆ្នាំ២០២៥ -- ឯកឧត្តម នេត្រ ភក្ត្រា រដ្ឋមន្រ្តីក្រសួងព៏ត៌មានលើកទឹកចិត្តដល់និស្សិតទាំងអស់នៃសាកលវិទ្យាល័យ ប៊ែលធី អន្តរជាតិ ដែលប្រើប្រាស់បណ្តាញទំនាក់ទំនងសង្គមសូមចូលរួមជាមួយក្រសួងព័ត៌មាន ក្នុងការប្រយុទ្ធប្រឆាំងព័ត៌មានក្លែងក្លាយដើម្បីពង្រឹងសុវត្ថិភាពនៃការប្រើប្រាស់ព័ត៌មាន ហើយព័ត៌មានក្លែងក្លាយគឺជាព័ត៌មានដែលគ្មានប្រភពច្បាស់លាស់ ជាព័ត៌មានដែលមិនឆ្លុះបញ្ចាំងការពិត ជាព័ត៌មានដែលចរិតបំផ្លាញ ញុះញង់។  ឯកឧត្តមបានគូសបញ្ជាក់ថា ព័ត៌មានក្លែងក្លាយដែលធ្វើអោយអន្តរាយដល់សន្តិសុខជាតិ ស្ថិរភាព និងសន្តិភាព ហើយវាយប្រហារមកលើថ្នាក់ដឹកនាំជាតិ ត្រូវបានកត់សម្គាល់នៅឆ្នាំ២០២៤កន្លងទៅនេះ មានចំនួន ៣ ៦២១ ព័ត៌មានក្លែងក្លាយ បើបៀបធៀបទៅឆ្នាំ២០២៣ មានចំនួន ៣ ២០០ ព័ត៌មានក្លែងក្លាយ គឺមានការកើនឡើងយ៉ាងច្រើន ។ 

 ការគូសបញ្ជាក់របស់ ឯកឧត្តម  រដ្ឋមន្ត្រីក្រសួងព័ត៌មានបែបនេះក្នុងឱកាសអញ្ជើញជាវាគ្មិនកិត្តិយសកម្មវិធីចែករំលែក បទពិសោធន៍លើប្រធានបទ «ការចែករំលែកចំណេះដឹងពីសារព័ត៌មាន និងប្រព័ន្ធផ្សព្វផ្សាយ» ជូនដល់និស្សិតឆ្នាំទី១ ឆមាសទី១ ជាង ១ ៨០០ នាក់ នៃសាកល វិទ្យាល័យ ប៊ែលធី អន្តរជាតិ ទីតាំងទី២ (ស្ពានអាកាសចោមចៅ) រាជធានីភ្នំពេញ នាព្រឹកថ្ងៃទី០៥ ខែកុម្ភៈ ឆ្នាំ២០២៥ ។

 ឯកឧត្តម នេត្រ ភក្ត្រា បានថ្លែងថា ព័ត៌មានក្លែងក្លាយគឺជាកត្តាដ៏ចម្បងមួយដែលនាំឱ្យមានការប្រើប្រាស់នូវអំពើហឹង្សា ភាពស្អប់ខ្ពើមគ្នា ការរើសអើងជាតិសាសន៍ និងធ្វើឱ្យមានចលាចលសង្គមនៅក្នុងប្រទេសជាច្រើនជុំវិញពិភពលោក ។ ឯកឧត្តម បានរំលឹកឡើងវិញថា កាលពីអតីតកាល ព័ត៌មានពិតមានច្រើន ប្រព័ន្ធផ្សព្វផ្សាយផ្តល់ព័ត៌មានត្រឹមត្រូវ តែពេលបច្ចុប្បន្នមធ្យោបាយនៃការផ្សព្វផ្សាយគឺមានភាពចម្រុះ ហើយមានភាពងាយស្រួលក្នុងការបង្កើតព័ត៌មានដែលមានចំនួនច្រើន តែមិនប្រាកដថាព័ត៌មានទាំងអស់នោះពិតទាំងស្រុងនោះទេ មានព័ត៌មានក្លែងក្លាយខ្លះដែលចាំបាច់សម្រាប់អ្នកដែលប្រើប្រាស់យកចិត្តទុកដាក់ និងចេះកំណត់ថាតើប្រភពព័ត៌មាននោះពិតប្រាកដ ត្រឹមត្រូវដែរឬទេ។ ឯកឧត្តមរដ្ឋមន្រ្តីបានលើកឡើងថា បច្ចុប្បន្ននេះ បញ្ហាប្រឈមរបស់យើងមួយទៀត គឺ AI បច្ចេកវិទ្យាបញ្ញាសិប្បនិម្មិត ដែលគេបានបង្កើតដើម្បីជួយមនុស្សនោះទេ ប៉ុន្តែមានអ្នកខ្លះយកទៅប្រើដើម្បីបំផ្លាញមនុស្ស ( វិទ្យាសាស្រ្ត មានមុខពីរ ល្អផង អាក្រក់ផង ) វិទ្យាសាស្រ្តដែលប្រើប្រាស់គ្មានសីលធម៌ ជាវិទ្យាសាស្រ្តដែលបំផ្លាញមនុស្ស , វិទ្យាសាស្ត្រដែលមានសីលធម៌ គឺជា វិទ្យាសាស្រ្តដែលជួយមនុស្ស ។ ដូច្នេះហើយយើងទាំងអស់គ្នាត្រូវតែដឹង និងមើលឃើញនូវបញ្ហាប្រឈមនៃការវិវឌ្ឍរីកចម្រើននៃបច្ចេកវិទ្យានៅក្នុងប្រព័ន្ធទំនាក់ទំនងសង្គម ហើយក្រសួងព័ត៌មាន បានខិតខំប្រឹងប្រែងអនុវត្តន៍នូវវិធានការ ដោយធ្វើទំនើបកម្មស្ថាប័ននិងកសាងរដ្ឋបាលទំនើប ដើម្បីធ្វើយ៉ាងណាគ្រប់គ្រង និងរត់តាមឱ្យទាន់ការវិវឌ្ឍបច្ចេកវិទ្យា ។ ឯកឧត្តមរដ្ឋមន្រ្តីបានឱ្យដឹងទៀតថា ជាមួយនេះ ក៏ពង្រឹងបទដ្ឋានបច្ចេកទេស និងការទទួលខុសត្រូវវិជ្ជាជីវៈ ការអភិវឌ្ឍធនធានមនុស្ស បណ្តុះស្មារតីមនសិការវិជ្ជាជីវៈ ការរៀបចំប្រព័ន្ធ និងយន្តការគ្រប់គ្រងលំហព័ត៌មាន រួមទាំងសន្តិសុខព័ត៌មាន ការបង្កើតភាពបង្កើនភាពជាដៃគូប្រកបដោយបរិយាប័ន្ន និងស័ក្តិសិទ្ធិភាព ។

ឯកឧត្តម នេត្រ ភក្រ្តា បានបន្ថែមថា អ្វីដែលសំខាន់ដែរនោះ ក្រសួងព័ត៌មាន ក្នុងនាមសេនាធិការរបស់រាជរដ្ឋាភិបាលកម្ពុជា បានផ្តោតជាសំខាន់លើការធានាឱ្យបាននូវសន្តិសុខព័ត៌មានសម្រាប់ប្រជាពលរដ្ឋ ហើយភាពជឿជាក់នៃស្ថាប័នសារព័ត៌មាន មិនមែនគ្រាន់តែជាបញ្ហានៃក្រមសីលធម៌អ្នកសារព័ត៌មានប៉ុណ្ណោះទេ ប៉ុន្តែគឺជាមូលដ្ឋានគ្រឹះនៃសន្តិសុខជាតិ និងស្ថិរភាពសង្គមរបស់យើងផងដែរ ៕

ដោយ៖ រិទ្ធី រូបថត៖ ខឹម សុវណ្ណារ៉ា