AKP សៀមរាប ថ្ងៃទី០៥ ខែកុម្ភៈ ឆ្នាំ២០២៥-- អាជ្ញាធរអាកាសចរណ៍របស់កម្ពុជានឹងធ្វើសមយុទ្ធទ្រង់ទ្រាយធំមួយនៅព្រលានយន្តហោះអន្តរជាតិសៀមរាបអង្គរ នៅថ្ងៃទី២៧ ខែកុម្ភៈនេះ គឺដើម្បីផ្តល់នូវការសម្របសម្រួល និងឆ្លើយតបទាន់ពេលវេលាទៅនឹងគ្រោះថ្នាក់ដែលកើតឡើងនៅអាកាសយានដ្ឋាន។ ថ្លែងនៅក្នុងកិច្ចប្រជុំត្រៀមសម្រាប់ការធ្វើសមយុទ្ធនេះ លោក សេង រ៉ាវុធ ជាអគ្គនាយករងនៃរដ្ឋលេខាធិការដ្ឋានអាកាសចរស៊ីវិល បានលើកឡើងថា ការធ្វើសមយុទ្ធនេះ ជាតម្រូវការចាំបាច់ ដែលគ្រប់ព្រលានយន្តហោះអន្តរជាតិត្រូវធ្វើ ដើម្បីវាយតម្លៃថា មានលទ្ធភាពគ្រប់គ្រាន់នៅក្នុងការគ្រប់គ្រងគ្រាមានអាសន្នណាមួយនៅក្នុងព្រលាន ឬនៅជិតព្រលាន។ 

លោក ប៊ុន រដ្ឋា នាយកព្រលានយន្តហោះអន្តរជាតិសៀមរាប អង្គរ ក៏បានលើកឡើងផងដែរថា ការធ្វើសមយុទ្ធនេះជាផែនការគ្រប់គ្រងគ្រោះអាសន្ន។ វាបានកំណត់យ៉ាងច្បាស់នូវតួនាទីរបស់ស្ថាប័ន/អង្គការដែលមានការពាក់ព័ន្ធ ទាំងអស់ទាំងក្នុង និងក្រៅអាកាសយានដ្ឋាន បន្ថែមពីនេះទៀត ផែនការនេះបានធ្វើការទំនាក់ទំនង យល់ដឹង និងរៀបចំជាស្រេចក្នុងបំណងដើម្បីឆ្លើយតបយ៉ាងមានប្រសិទ្ធិភាព ក្នុងគ្រោះអាសន្នមួយដែលកើតមាននៅក្នុង បរិវេណ ឬក្បែរអាកាសយានដ្ឋាន។ ដូចជាកំណត់នូវបែបបទនៃការទំនាក់ទំនង រវាងស្ថាប័ន និងអាជ្ញាធរនានាដែលមានការពាក់ព័ន្ធ។ ពិពណ៌នានូវរបៀបការពារមនុស្ស និងទ្រព្យសម្បត្តិក្នុងកំឡុងពេលមានគ្រោះអាសន្ន ឬគ្រោះមហន្តរាយដែលកើតឡើង។ ជាមួយនេះ សមយុទ្ធនេះក៏ជាការរៀបចំកម្លាំងមនុស្ស សម្ភារបរិក្ខារ មធ្យោបាយនានា និងធនធានដទៃទៀតដែលមាន ដើម្បីប្រើប្រាស់ក្នុងអំឡុងពេលធ្វើអន្តរាគមន៍ និងប្រតិបត្តិការស្ដារស្ថានភាពឱ្យប្រសើរឡើងវិញ។

សូមជម្រាបថា កាលពីខែវិច្ឆិកា ឆ្នាំ១៩៩៧ កម្ពុជាបានជួបឧបទ្ទវហេតុធ្លាក់យន្តហោះមួយគ្រឿងនៅក្បែរព្រលានយន្តហោះអន្តរជាតិភ្នំពេញ។ បន្ទាប់មកនៅឆ្នាំ២០០៦ ក៏មានហេតុការណ៍ធ្លាក់យន្តយន្តហោះនៅភ្នំបូកគោ នៅឆ្នាំ២០០៧ យន្តហោះមួយគ្រឿងទៀតបានធ្លាក់នៅរាជធានីភ្នំពេញ និងឆ្នាំ២០២៤កន្លងទៅថ្មីៗនេះ ក៏មានហេតុការណ៍ធ្លាក់ឧទ្ធម្ភាគចក្រនៅខេត្តពោធិ៍សាត់។

ជាមួយនឹងការធ្វើសមយុទ្ធនេះ អភិបាលរងខេត្តសៀមរាប លោក សំកុល សុចិត្រា ក៏បានអំពាវនាវដល់ប្រជាពលរដ្ឋក្នុងខេត្តសៀមរាប សូមកុំមានការភ្ញាក់ផ្អើល ចំពោះសមយុទ្ធនាថ្ងៃទី២៧ ខែកុម្ភៈនេះ។ លោកអភិបាលរងក៏បានណែនាំដល់បណ្តាអាជ្ញាធរក្រុងស្រុកដែលនៅតាមតម្រាយផ្លូវរបស់រថយន្តសង្គ្រោះឆ្លងកាត់ឱ្យពួកគាត់បានដឹងអំពីព្រឹត្តិការណ៍នេះ ចៀសវាងការយល់ច្រលំណាមួយកើតឡើង៕

ដោយ ឃុត សៅ