AKP ភ្នំពេញ ថ្ងៃទី០៤ ខែកុម្ភៈ ឆ្នាំ២០២៥--មន្ត្រីអង្គការ CI បានឱ្យដឹងនៅថ្ងៃទី០៣ ខែកុម្ភៈ ឆ្នាំ២០២៥ថា អង្គការ CI បានផ្តល់ជូនសម្ភារបរិក្ខារដល់មន្ទីរបរិស្ថានខេត្តស្ទឹងត្រែង ក្នុងគោលបំណងដាក់ឱ្យដំណើរការសាកល្បងមជ្ឈមណ្ឌលប្រព័ន្ធត្រួតពិនិត្យតំបន់ការពារធម្មជាតិសម្រាប់បម្រើការក្នុងការគ្រប់គ្រង និងវិភាគទិន្នន័យ ដើម្បីសម្រេចលើការងារអនុវត្តច្បាប់កាន់តែមានប្រសិទ្ធភាពនៅឧទ្យានជាតិវើនសៃ សៀមប៉ាង។ 

អង្គការ CI ធ្វើការយ៉ាងជិតស្និទ្ធជាមួយក្រសួងបរិស្ថាន និងដៃគូពាក់ព័ន្ធតាំងពីឆ្នាំ២០០៩ ក្នុងការអភិរក្សនៅឧទ្យានជាតិវើនសៃ-សៀមប៉ាង ដើម្បីអនុវត្តនូវគម្រោងការពារធនធានធម្មជាតិក្នុងតំបន់ការពារ រួមមានការរៀបចំគម្រោងប្រើប្រាស់ដីធ្លី កសិកម្មប្រកបដោយនិរន្តរភាព វគ្គបណ្តុះបណ្តាលមន្ត្រីបរិស្ថាន និងសហគមន៍មូលដ្ឋាន ការគាំទ្រអេកូទេសចរណ៍ និងការស្រាវជ្រាវជីវៈចម្រុះ។ ក្នុងនោះ កិច្ចការងារគ្រប់គ្រង និងវិភាគទិន្នន័យតាមរយៈប្រព័ន្ធត្រួតពិនិត្យ ក្នុងតំបន់ការពារធម្មជាតិ ដើរតួយ៉ាងសំខាន់ក្នុងការធានាបាននូវប្រសិទ្ធភាពនៃការអនុវត្តច្បាប់ ដោយជួយសម្រួលដល់ការរាយការណ៍ និងរៀបចំយុទ្ធសាស្រ្តឱ្យកាន់តែច្បាស់លាស់ក្នុងការអភិរក្ស។

សម្ភារបរិក្ខារនេះរួមមានទូរទស្សន៍ និងជើងទម្រមួយឈុត កុំព្យូទ័រមួយឈុត និងUPS ដែលមានតម្លៃសរុបប្រមាណជាង ៤ ៧០០ ដុល្លារអាមេរិក ដែលគាំទ្រដោយក្រុមហ៊ុនគ្លូប៊ល ហ្រ្គីន នែតជ្រលរា (GGN) តាមរយៈអង្គការ CI៕

ដោយ ណយ នឿន (ប្រភព៖ CI)