AKP កំពង់ធំ ថ្ងៃទី០៣ ខែកុម្ភៈ ឆ្នាំ២០២៥--

ឯកឧត្តម នួន ផារ័ត្ន អភិបាលខេត្តកំពង់ធំ បានផ្តាំផ្ញើ និងជំរុញលើកទឹកចិត្តដល់ក្មួយៗ សិស្សានុសិស្ស ត្រូវយកចិត្តទុកដាក់ប្រឹងប្រែងសិក្សារៀនសូត្រក្រេបជញ្ជក់នូវចំណេះដឹងដែលផ្តល់ដោយលោកគ្រូ អ្នកគ្រូ ចៀសឱ្យឆ្ងាយពីអំពើអបាយមុខនានាដើម្បីកសាងខ្លួនឱ្យក្លាយជាពលរដ្ឋល្អក្នុងសង្គម។ ឯកឧត្តមអភិបាលខេត្តបានថ្លែងដូចនេះក្នុងពិធីសម្ពោធអគារបណ្ណាល័យ ឯកឧត្តមកិត្តិកោសលបណ្ឌិត ងួន ញ៉ិល និងសមិទ្ធផលនានា នៅវិទ្យាល័យ ហ៊ុន សែន តាំងគោក ស្រុកតាំងគោកខេត្តកំពង់ធំ នាព្រឹកថ្ងៃទី០៣ ខែកុម្ភៈ ឆ្នាំ២០២៥ ដោយមានការអញ្ជើញចូលរួមពីឯកឧត្តម ឈន សារ៉ាណេ អនុរដ្ឋលេខាធិការក្រសួងមហាផ្ទៃ មន្ទីរអង្គភាពពាក់ព័ន្ធ លោកគ្រូ អ្នកគ្រូ និងសិស្សានុសិស្សជាច្រើននាក់។

ឯកឧត្តម នួន ផារ័ត្ន បានមានប្រសាសន៍ថា សមិទ្ធផលថ្មីដែលបានសម្ពោធនៅពេលនេះនឹងក្លាយជាចំណែកមួយដ៏សំខាន់ក្នុងការជំរុញការកសាងធនធានមនុស្ស ប្រកបដោយសីលធម៌និងគុណធម៌ ដើម្បីក្លាយជាដើមទុនដ៏ចាំបាច់ក្នុងការអភិវឌ្ឍមាតុភូមិកម្ពុជា និងសូមឱ្យគណៈគ្រប់គ្រងសាលា សហការជាមួយអាជ្ញាធរមានសមត្ថកិច្ច ពង្រឹងការអនុវត្តវិន័យផ្ទៃក្នុងឱ្យបានម៉ឺងម៉ាត់បំផុត ទប់ស្កាត់បញ្ហាក្មេងទំនើងក្នុងសាលារៀន។

ជាមួយគ្នានោះដែរ ឯកឧត្តម នួន ផារ័ត្ន ក៏បានថ្លែងអំណរគុណ ឯកឧត្តមកិត្តិកោសលបណ្ឌិត ងួន ញ៉ិល និងលោកជំទាវ ឯកឧត្តម ឈន សារ៉ាណេ និងលោកជំទាវ និងសប្បុរសជន ដែលតែងតែឧបត្តម្ភគាំទ្រក្នុងការសាងសង់អគារបណ្ណាល័យនេះឡើង ដើម្បីធានានូវការទទួលបានការអប់រំដែលមានគុណភាពខ្ពស់ ដែលអាចកសាង និងអភិវឌ្ឍធនធានមនុស្សប្រកបដោយមនសិកាវិជ្ជាជីវៈ និងសមត្ថភាពជំនាញពិតប្រាកដលើគ្រប់វិស័យ ជាប្រយោជន៍ដល់ការកសាងសង្គមជាតិមួយដែលមានសុខសន្តិភាព ស្ថិរភាព សណ្តាប់ធ្នាប់សង្គម មានការអភិវឌ្ឍប្រកបដោយចីរភាព បរិយាបន្ន និងសមធម៌ មានប្រជាជនប្រកបដោយចំណេះដឹងខ្ពស់ និងវប្បធម៌ជ្រៅជ្រះ មានជីវភាពសមរម្យ និងមានការរស់នៅប្រកបដោយសុខដុមរមនាទាំងក្នុងសង្គមជាតិ និងនៅក្នុងក្រុមគ្រួសារ។

បន្ទាប់មកទៀត ឯកឧត្តមអភិបាលខេត្តបានចុះពិនិត្យស្ថានភាពទីតាំងសាលាវិទ្យាល័យទ្រៀល ស្ថិតនៅឃុំទ្រៀលស្រុកតាំងគោកខេត្តកំពង់ធំដែលអគារសិក្សាមានសភាពចាស់ទ្រុឌទ្រោម ព្រមទាំងខ្វះអាគារសិក្សាព្រមទាំងមានបរិមាណសិស្សកើនឡើងជាលំដាប់៕

ដោយ ស៊ុម វណ្ណា