AKP បន្ទាយមានជ័យ ថ្ងៃទី០៣ ខែកុម្ភៈ ឆ្នាំ២០២៥--

លោក យឹម សំណាង អភិបាលរងខេត្ត តំណាងឱ្យឯកឧត្តម អ៊ុ រាត្រី អភិបាលនៃគណៈអភិបាលខេត្តបន្ទាយមានជ័យ បានអញ្ជើញជាអធិបតីក្នុងកម្មវិធីផ្សព្វផ្សាយ និងហាមឃាត់ការទទួលទាន ការចែកចាយ ការតាំងលក់ និងពាណិជ្ជកម្មផលិតផលភេសជ្ជៈប៉ូវកម្លាំងគ្រប់ប្រភេទនៅក្នុង និងជុំវិញជាប់បរិវេណគ្រឹះស្ថានសិក្សាចំណេះដឹងទូទៅសាធារណៈ និងឯកជន ជូនដល់លោកគ្រូអ្នកគ្រូ និងអាជ្ញាធរមូលដ្ឋានសមត្ថកិច្ចពាក់ពន្ធ័ គ្រប់ជាន់ថ្នាក់ក្នុងស្រុកមង្គលបូរី   ធ្វើនៅសាលារៀនចុងវ៉ា ស្រុកមង្គលបូរី  ខេត្តបន្ទាយមានជ័យ នាព្រឹកថ្ងៃទី០៣ ខែកុម្ភៈ ឆ្នាំ២០២៥នេះ។

ក្នុងឱកាសនោះ លោក យឹម សំណាង បានមានប្រសាសន៍ថា ការចុះផ្សព្វផ្សាយ និងហាមឃាត់ការទទួលទាន ការចែកចាយ ការតាំងលក់ និងពាណិជ្ជកម្មផលិតផលភេសជ្ជៈប៉ូវកម្លាំងគ្រប់ប្រភេទនៅក្នុង និងជុំវិញជាប់បរិវេណគ្រឹះស្ថានសិក្សានាពេលនេះដើម្បីឱ្យគ្រប់ភាគីពាក់ព័ន្ធចូលរួមអនុវត្តទាំងអស់គ្នាទប់ស្កាត់ឱ្យមានប្រសិទ្ធភាពសំដៅធានាថែរក្សាការពារចំពោះសុខភាពប្រជាពលរដ្ឋ ជាពិសេសគឺ កុមារ ដែលជាទំពាំងស្នងឫស្សី  ដែលចូលចិត្តទទួលទានភេសជ្ជៈកំប៉ុងមានផ្ទុកសារធាតុស្កររសជាតិផ្អែមខ្ពស់ បង្កឱ្យកើតជំងឺទឹកនោមផ្អែម នាពេលអនាគតនោះ។

អភិបាលរងខេត្តបន្ទាយមានជ័យរូបនេះបានកត់សម្គាល់ឃើញកុមារភាគច្រើន អាចប្រឈមមុខនឹងការកើតជំងឺទឹកនោមផ្អែមខ្ពស់ ដោយសារពួកគេចូលចិត្តទទួលទានភេសជ្ជៈ និងអាហារដែលមានផ្ទុកសារធាតុស្ករខ្ពស់ ដែលមានដាក់លក់នៅក្នុងបរិវេណសាលារៀននានា។ លោកបានមានប្រសាសន៍ថា ប្រសិនបើកុមារទាំងអស់ ពុំយល់ដឹង ពុំផ្លាស់ប្តូរទម្លាប់ហូបចុករសជាតិផ្អែម ដូចពេលបច្ចុប្បន្ននេះទេ នៅពេលទៅខាងមុខនោះពួកគេឈានអាចមានហានិភ័យខ្ពស់ ក្លាយជាអ្នកជំងឺទឹកនោមផ្អែម ដែលមានលក្ខណៈយូរអង្វែង ដាក់បន្ទុកសេដ្ឋកិច្ចធ្លាក់លើគ្រួសារ និងសង្គមជាតិទាំងមូល។

ជាមួយគ្នានោះដែរ លោកអភិបាលរងបានក្រើនរម្លឹកដល់ឪពុកម្តាយ អាណាព្យាបាល លោកគ្រូ អ្នកគ្រូ ពិសេសនាយកសាលា នាយិកា ដែលជាគណៈគ្រប់គ្រងអាជ្ញាធរសមត្ថកិច្ចពាក់ព័ន្ធសូម ឱ្យជួយអប់រំណែនាំពីផលប៉ះពាល់ទឹកផ្អែមដល់កុមារ ក្នុងម៉ោងសិក្សា ស្របតាមវិធានការណែនាំរបស់ក្រសួងអប់រំ យុវជន និងកីឡា កន្លងទៅ ដើម្បីឱ្យកុមារ មានការយល់ដឹង ចៀសវាងក្លាយជាអ្នកជំងឺទឹកនោមផ្អែម និងបានណែនាំដល់អាជ្ញាធរដែនដីគ្រប់លំដាប់ថ្នាក់ និងប្រជាពលរដ្ឋ ឱ្យចូលរួមសហការរាយការណ៍ទប់ស្កាត់គ្រឿងញៀន ក្មេងទំនើង និងគោរពច្បាប់ចរាចរណ៍ ដើម្បីធានាសន្តិសុខ សុវត្ថិភាព ផ្តល់សេចក្តីសុខក្សេមក្សាន្តក្នុងគ្រួសារ និងសង្គមជាតិទាំងមូលផងដែរ៕

ដោយ ឈុន សារ៉ាត